އިއްޔެގެ ނިޔަލަށް 248 ސިޔާސީ މުވައްޒަފުން ވަކިކޮށްފިން: ސަރުކާރު

ދައުލަތުގެ ހަރަދު ކުޑަކުރުމަށްޓަކައި ސިޔާސީ މުވައްޒަފުން މަދުކުރަން ފަށާފައިވާ މަސައްކަތުގެ ދަށުން، އިއްޔެގެ ނިޔަލަށް އެކި މިނިސްޓްރީތަކުން 248 ސިޔާސީ މުވައްޒަފުން ވަކިކޮށްފައިވާ ކަމަށް ސަރުކާރުން ބުނެފި އެވެ.

އިގުތިސާދު ރިފޯމް އެޖެންޑާގެ ތެރެއިން 15 ދުވަހުގެ ތެރޭގައި އެކި މިނިސްޓްރީތަކުން 228 މުވައްޒަފުން ވަކިކުރަން ނިންމާފައިވާ ކަން ރައީސް ޑރ. މުހައްމަދު މުއިއްޒު އިއުލާނު ކުރެއްވީ މިދިޔަ މަހުގެ 15 ގަ އެވެ.

އެ މުއްދަތަށް އިއްޔެ 15 ދުވަސް ހަމަވިއިރު، ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ އެ މުއްދަތުގައި 248 ސިޔާސީ މުވައްޒަފުން މަދު ކުރެވިފައިވާ ކަމަށެވެ.

އަދި، ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕާފޯމަންސް ބަލާނެ ނިޒާމެއް ގާއިމް ކުރަން ނިންމާފައިވާ ކަމަށާއި އެ ނިޒާމަށް ވަރަށް އަވަހަށް އަމަލު ކުރަން ފަށާނެ ކަމަށް ވެސް ހީނާ ވިދާޅުވި އެވެ.

ވަކިކުރަން ނިންމާފައިވާ ކަމަށް ރައީސް އިއުލާނު ކުރައްވާފައިވަނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 109 ސީނިއާ ޕޮލިޓިކަލް ޑިރެކްޓަރުން އަދި 69 ޕޮލިޓިކަލް ޑިރެކްޓަރުންނެވެ.

ނަމަވެސް ވަކި ކުރި މުވައްޒަފުންގެ ތަފްސީލެއް ހީނާ ނުދެއްވަ އެވެ.

މި ނިންމުމާއެކު ދައުލަތުގެ ބަޖެޓުން މަހަކު 5.7 މިލިއަނަށް ވުރެ ގިނަ ރުފިޔާ ސަލާމަތް ކުރެވޭނެ ކަމަށް ރައީސް ވަނީ ވިދާޅުވެފަ އެވެ.

ސިޔާސީ މުވައްޒަފުންގެ އަދަދު މަދުކުރުމުގެ މަސައްކަތްތައް މީގެ ހަތަރު މަސް ދުވަސް ކުރިން ފެށި އެވެ. އޭރު ލިބުނު މައުލޫމާތަށް ބަލާއިރު ބައެއް މީހުންގެ ޕާފޯމަންސަށް ބަލައި ވަޒީފާ އިން ވަކި ކުރާއިރު އަނެއްބައި މީހުން ސަރުކާރު ހިއްސާވާ ކުންފުނިތަކަށް ބަދަލު ކުރުމުގެ މަޝްވަރާތައް ކުރާކަން ވެސް ވަނީ އެނގިފަ އެވެ.

ސިޔާސީ މުވައްޒަފުންގެ މުސާރައަކީ ޖުމްލަ ބަޖެޓުގެ އެއް ޕަސެންޓެވެ. އެހެންކަމުން ސިޔާސީ މުވައްޒަފުންގެ މުސާރަ އަށް އަހަރު ހޭދަކުރާނީ ގާތްގަނޑަކަށް 120 މިލިއަން ރުފިޔާ އެވެ. އެއީ ކޮންމެ މަހަކު ގާތްގަނޑަކަށް 10 މިލިއަން ރުފިޔާ އެވެ. "މިހާރު" އާ ސަރުކާރުގެ އެކި އިދާރާތަކުން ހިއްސާ ކޮށްފައިވާ މައުލޫމާތުތަކަށް ބަލާއިރު، މިވަގުތު ސިޔާސީ މުވައްޒަފުންގެ އަދަދު އުޅެނީ 1،200 އިން ވުރެ މަތީގަ އެވެ.