ފިއުލް ސަބްސިޑީ އަށް އިތުރު 590 މިލިއަން، ޖުމްލަ 1.3 ބިލިއަން ހަރަދުވާނެ

ތެލުގެ ސަބްސިޑީ އަށް 590 މިލިއަން ރުފިޔާ އިތުރު ކުރުމުން މި އަހަރު ނިމޭއިރު ތެލަށް ކުރާ ހަރަދު 1.3 ބިލިއަން ރުފިޔާ ހަރަދުވާނެ ކަމަށް ސަޕްލިމެންޓްރީ ބަޖެޓުގެ ހިސާބުތަކުން ދައްކައިފި އެވެ.

ފިނޭންސް މިނިސްޓްރީން އާންމުކޮށްފައިވާ ސަޕްލިމެންޓްރީ ބަޖެޓުގެ ތަފްސީލުގައިވާ ގޮތުން ތެލުގެ ސަބްސިޑީ އަށް މިއަހަރުގެ ބަޖެޓަށް އެންމެ ފުރަތަމަ ކަނޑައަޅާފައި އޮތީ 775 މިލިއަން ރުފިޔާ އެވެ. ނަމަވެސް ފިނޭންސް މިނިސްޓަރު މޫސާ ޒަމީރު މިދިޔަ ބުރާސްފަތި ދުވަހު ރައްޔިތުންގެ މަޖިލިހަށް ހުށަހެޅުއްވި 5.1 ބިލިއަން ރުފިޔާގެ ބަޖެޓުން ވަނީ ތެލުގެ ސަބްސިޑީ އަށް 590 މިލިއަން އިތުރުކޮށްފަ އެވެ.

މިދިޔަ އަހަރު ވެސް ތެލުގެ ސަބްސިޑީއަށް ވަނީ 1.9 ބިލިއަން ރުފިޔާ ހޭދަކޮށްފަ އެވެ.

ކައުންސިލްތަކަށް ދޭ އެހީ އާއި އާސަންދައަށް ފަހު ދައުލަތުން އެންމެ ބޮޑު ސަބްސިޑީއެއް ހޭދަކުރަނީ ތެލަށެވެ.

ސަބްސިޑީ އަށް އިތުރު ކުރި އަދަދުތައް

- ކަރަންޓު އަގު ހެޔޮކުރަން: 223 މިލިއަން ރުފިޔާ

- ކާބޯތަކެތި އަގުހެޔޮ ކުރަން: 181 މިލިއަން ރުފިޔާ

- ރާއްޖެއިން ބޭރުން ކުރާ ބޭސްފަރުވާ: 166 މިލިއަން ރުފިޔާ

- ރާއްޖެއިން ކުރާ ބޭސްފަރުވާ: 96 މިލިއަން ރުފިޔާ

- ކުނި މެނޭޖްކުރުމަށް: 26 މިލިއަން ރުފިޔާ

- ތެލުގެ ސަބްސިޑީ: 590 މިލިއަން

ސަޕްލިމެންޓްރީ ބަޖެޓަށް ސަބްސިޑީގެ ގޮތުގައި އިތުރު ކުރި 1.3 ބިލިއަން ރުފިޔާއާ އެކު މި އަހަރު ސަބްސިިޑީ އަށް ކުރާ ހޭދަ 11 ބިލިއަން ރުފިޔާއަށް އަރާނެ އެވެ. މިއީ މިދިޔަ އަހަރަށް ވުރެ 1.3 ބިލިއަން ރުފިޔާ އިތުރު އަދަދެކެވެ. މިދިޔަ އަހަރު ސަބްސިޑީ އަށް ހޭދަކުރީ 9.7 ބިލިއަން ރުފިޔާ އެވެ.

ސަބްސިޑީގެ ހަރަދުތައް ކުޑަ ނުކުރެވުނު އެއް ސަބަބަކީ މިއަހަރު ގެންނަން ކަނޑައަޅާފައިވާ ރިފޯމުގެ މަސައްކަތްތައް ނުކުރެވުމެވެެ.