އެއާޕޯޓުގައި "އެޕެކްސް އިން ސެކިއުރިޓީ" ޕްރޮގްރާމް ފަށައިފި

އެއާޕޯޓްސް ކައުންސިލް އިންޓަނޭޝަނަލް (އޭސީއައި) ގެ "އެއާޕޯޓް އެކްސެލެންސް (އެޕެކްސް) އިން ސެކިއުރިޓީ" އެސެސްމަންޓް ޕްރޮގްރާމް ވެލާނާ އިންޓަރނޭޝަނަލް އެއާޕޯޓުގައި ފަށައިފި އެވެ.

މި ޕްރޮގްރާމްގެ މަގުސަދަކީ ވެލާނާ އިންޓަނޭޝަނަލް އެއާޕޯޓުގެ ސަލާމަތާއި ރައްކާތެރިކަން ހުރިގޮތް ބަލައި، އެކްޝަން ޕްލޭނެއް ތައްޔާރު ކުރުމެވެ. މި އެސެސްމަންޓް ފަސް ދުވަހުގެ މުއްދަތަށް ކުރިއަށް ގެންދާނެ އެވެ.

އެޕެކްސް ސެކިއުރިޓީ އެސެސްމަންޓުގެ ސަބަބުން އެއާޕޯޓުގެ ސެކިއުރިޓީ އޮޕަރޭޝަންސްގެ ތަޖުރިބާ ލިބިފައިވާ ފަރާތްތަކުގެ ހިޔާލާއި މަޝްވަރާއާއެކު ވީއައިއޭގެ ސެކިއުރިޓީ އިތުރަށް ހަރުދަނާ ވެގެންދާނެ ކަމަށް އެމްއޭސީއެލްއިން ބުންޏެވެ. މި އެސެސްޓްމެންޓް ކުރިއަށް ގެންދަނީ ޔޫރަޕިއަން ސިވިލް އޭވިއޭޝަން ކޮންފަރެންސް (އީކާކް)ގެ އެހީގަ އެވެ.

މި ޕްރޮގްރާމް ފެށުމުގެ ރަސްމިއްޔާތުގައި ވާހަކަ ދައްކަވަމުން އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވީ ވެލާނާ އިންޓަނޭޝަލް އެއާޕޯޓުގެ ހިދުމަތް ހޯދާ އެއާލައިންތަކާއި ޕެސެންޖަރުންގެ އަދަދު އިތުރު ވަމުންދާއިރު، ހިދުމަތް ހޯދާ ފަރާތްތަކުގެ ސަލާމަތާއި ރައްކާތެރި ކަމަށް އަބަދުވެސް އިސްކަން ދޭނެ ކަމަށެވެ. އެގޮތުން އެޕެކްސް ސެކިއުރިޓީ މި އެސެސްމަންޓުގެ ނަތީޖާއަށް ބިނާކޮށް، ހާއްސަ އެކްޝަން ޕްލޭނެއް އެކުލަވާލެވޭނެ ކަމަށް ވެސް ސީއީއޯ ވިދާޅުވި އެވެ.

އެމްއޭސީއެލްއިން އަބަދުވެސް މަސައްކަތް ކުރަމުން ދަނީ، ބައިނަލްއަގުވާމީ ފެންވަރުގައި އެއާޕޯޓުގެ ސަލާމަތާއި ރައްކާތެރިކަން ހިފެހެއްޓުމަށް ކަމަށް އެ ކުންފުނިން ބުނެ އެވެ. އެ ކުންފުނިން އޭސީއައި އާއި އިންޓަނޭޝަނަލް ސިވިލް އޭވިއޭޝަން އޮގަނައިޒޭޝަން (އައިކާއޯ) އާއި އިންޓަނޭޝަނަލް އެއާ ޓްރާންސްޕޯޓް އެސޯސިއޭޝަން (އަޔާޓާ) ފަދަ ބައިނަލްއަގުވާމީ ޖަމާއަތްތަކާއި ގުޅިގެން ސަލަމާތާއި ރައްކާތެރިކަން އިތުރަށް ހަރުދަނާ ކުރުމަށް ގިނަ މަސައްކަތްތަކެއް ދަނީ ކުރަމުންނެވެ.