ޣައިސް: އޯ ލެވެލް ޕޭޕަރުތައް ރީޗެކްކުރުމުން އެއް ވަނައަށް

އޯ ލެވެލްގެ ނަތީޖާގައި ހދ. ހިރިމަރަދޫ، މޫސާ ޣައިސް އަށް އޭ ލިބުނީ ހަމައެކަނި ދިވެހިންނެވެ. އެހެން ހުރިހާ މާއްދާތަކުން އޭނާ އަޒުމް ކަނޑައެޅި ގޮތަށް އޭ ސްޓާ ހޯދި އެވެ. މި ނަތީޖާއާ އެކު އޭނާ އެރީ އޯ ލެވެލް ގަދަ ދިހައެއްގެ ދެ ވަނަ އަށެވެ. މިއީ، އޭނާ ވަރަށް ފަޚުރުވެރިވި ކާމިޔާބީ އެކެވެ.

އެހެންވިޔަސް ދިވެހި މާއްދާ ރީޗެކްކުރަން ބޭނުންވި ސަބަބެއް އޮތެވެ. އެއީ، ހިރިމަދޫ ސްކޫލްގައި ކިޔެވި ޣައިސްއަށް މޮކް އެގްޒާމްގައި ދިވެހި މާއްދާ އިން ވެސް އޭ ސްޓާއެއް ލިބިފައިވާތީ އެވެ.

"ރީޗެކަށް ލިއިރު ވެސް އުންމީދު ކުރިން އޭ ސްޓާއެއް ލިބޭނެ ކަމަށް. ޗެކްކޮށްފައި ދިވެހިން ވެސް އޭ ސްޓާއެއް ލިބުނީމަ ވަރަށް އުފާވި،" ޣައިސް ބުންޏެވެ.

ދިވެހި ޕޭޕަރު ރީޗެކްކޮށް ލިބުނު މާކްސްއާ އެކު އޭނާ ވަނީ މިދިޔަ އަހަރުގެ އޯ ލެވެލްގެ ގަދަ 10ގެ އެއް ވަނަ އަށް އަރައިފަ އެވެ.

ޣައިސް ބުނި ގޮތުގައި ހިރިމަރަދޫ ފަދަ މީހުން މަދު ރަށެއްގެ ސްކޫލުގައި ކިޔަވައިގެން ރަނގަޅު ނަތީޖާއެއް ލިބުމަކީ އޭނާއަށް ކުޑަ އުފަލެއް ނޫނެވެ. ޣައިސް ގަބޫލުކުރާ ގޮތުގައި، އެ ރަށަށް އޭނާއަށް ހޯދައިދެވުނީ، ވަރަށް ފަޚުރުވެރި ކާމިޔާބީއެކެވެ.

މީގެ ކުރިން އޯ ލެވެލްގެ ގަދަ 10 ގެ އެއް ވަނަ އަށް އެ ރަށުގެ ދަރިވަރަކު ނާރަ އެވެ.

"ރަށަށް ވަރަށް ރީތި ނަމެއް ހޯދައި ދެވުނީ. ވަރަށް ފަޚުރުވެރިވަން މި ކާމިޔާބީއަށް،" ޣައިސް ބުންޏެވެ.

ޕޭޕަރު ޗެކްކުރީ ޔަގީންކަން އޮތީމަ

މިދިޔަ މެއި/ޖޫންގައި ޣައިސް އޯ ލެވެލް ހެދީ އިސްލާމާއި އިނގިރޭސި އާއި ހިސާބާއި އެކައުންޓާއި އިކޮނޮމިކްސްގެ އިތުރުން ބަޔޮލޮޖީ އާއި ކެމިސްޓްރީންނެވެ.

އޭނާ ބުނި ގޮތުގައި، މޮކް އެގްޒާމް ހެދީ، އޯ ލެވެލްއަށް ވަރަށް ބޮޑަށް ތައްޔާރުވެގެންނެވެ. އެހެންވެ، ކޮންމެ މާއްދާއަކުން ވެސް ބޭނުންވި ވަރަށް ދަސްކުރެވިފައި ހުރި ކަމަށް ބުންޏެވެ.

ގްރޭޑް 10 ގައި އޭނާ އަކީ ސްކޫލްގެ ކެޕްޓަނެވެ. އެ ޒިންމާއާ އެކު ވެސް އޭނާގެ ޓާގެޓަކީ އޯ ލެވެލްގެ ގަދަ 10 ގައި ހިމެނުމަށެވެ.

"އަޅުގަނޑުގެ ބޭބެއަކަށް ލިބުނު އޯލެވެލް ޓޮޕް 5. އެހެންވެ އުންމީދު ކުރިން 10 އާއި 5އާ ދެމެދުން ޖާގައެއް ލިބޭނެ ކަމަށް. އެކަމަކު ދެވަނަ ލިބުމުން ވަރަށް ސަޕްރައިޒްވި. ރީޗެކް ކުރުމުން މި ލިބުނީ އެއް ވަނަ،" ޣައިސް ބުންޏެވެ.

މިއީ، ސްކޫލުގެ ޕްރިންސިޕަލާއި ޓީޗަރުންނަށް ވެސް ލިބުނު ވަރަށް ބޮޑު އުފަލެކެވެ.

އެ އަތޮޅު ކުޅުދުއްފުށީ ޖަލާލުއްދީން ސްކޫލުގެ ގުރޭޑް 11 ގައި މިހާރު ކިޔަވަމުން އަންނަ ޣައިސްއަކީ ގްރޭޑް ހަޔަކުން ފެށިގެން ކޮންމެ އަހަރެއްގެ ވެސް ހިރިމަރަދޫ ސްކޫލުގެ ޕްރިފެކްޓެކެވެ.

އެ ސްކޫލާ ހަވާލުވެ ހުންނެވި ލީޑިން ޓީޗަރު އައިމިނަތު މާޖިދާ ވިދާޅުވީ ޣައިސްއަށް ލިބުނު ކާމިޔާބީ އަކީ އެ ސްކޫލަށް ލިބުނު ރީތި ނަމެއް ކަމަށެވެ.

"ޣައިސް އަކީ އަބަދު ވެސް ކިޔެވުމަށް ވަރަށް ރަނގަޅު ކުއްޖެއް. ކިޔަވަން މަސައްކަތް ކުރާ، އަހުލާގު ރަނގަޅު ދަރިވަރެއް. އެހެންވެ އަޅުގަނޑުމެން ވެސް އުންމީދު ކުރިން ރަނގަޅު ނަތީޖާއެއް ގެންނާނެ ކަމަށް،" އޭނާ ވިދާޅުވި އެވެ.

އެ ސްކޫލުގެ ނަތީޖާ މި އަހަރު ވަރަށް ރަނގަޅުކަން ފާހަގަ ކުރައްވައި މާޖިދާ ވިދާޅުވީ އެ ނަތީޖާ ހޯދައިދިނުމުގައި ޓީޗަރުން ވަރަށް މަސައްކަތް ކޮށްދީފައިވާ ކަމަށެވެ. އެ ދަރިވަރުން ޓޮޕް 10ގައި ނުހިމެނު ނަމަވެސް ހަތް މާއްދާ އިން ފާސްވި ކަމަށް އޭނާ ވިދާޅުވި އެވެ.

ޣައިސް ޓެސްޓަށް ތައްޔާރުވި ގޮތް

މޮކް އެގްޒާމް ނިމުމާ އެކު ޣައިސް ފެށީ އޯލެވެލްއަށް ތައްޔާރުވާށެވެ. ފޮތްތަކާ އެކު އުޅުނު ނަމަވެސް އެންމެ މުހިންމު ކަމެއްގެ ގޮތުގައި، ގަޑިން ގަޑިއަށް ނަމާދުކޮށް ދުއާކުރި އެވެ.

"ސްކޫލުގެ އެކްސްޓްރާ ކްލާހަށް ދަމުން ފޮތް ކިޔުމުގެ އިތުރުން ވީޑިއޯ ބަލައިގެންނާއި އޮންލައިންކޮށް ޓިއުޝަން ނަގައިގެން ވެސް ދަސްކުރީ ހަމަ. ވަރަށް މަސައްކަތް ކުރިން، އަބަދު ވެސް ހަމަ ފޮތްތަކާ އެކީ އުޅުނީ،" ޣައިސް ބުންޏެވެ.

"އެންމެ މުހިންމު ކަމަކަށް ދުއާ ކުރާށޭ. ކޮންމެ ކަމަކަށް ވެސް އުންމީދުކޮށްފިއްޔާ ބޭނުންވާ ނަތީޖާ ހާސިލްވާނެ. ހިތްވަރާ އެކު ކުރިއަށްދާށޭ. ކިޔަވަން މަސައްކަތް ކުރުމުން އޭގެ ނަތީޖާ ވެސް ފެންނާނެ،"

ރަނގަޅު ނަތީޖާއެއް ހޯދަން ޒަމާނީ ވަސީލަތްތައް ބޭނުންކޮށް ޔޫޓިއުބްގައި ހުންނަ ވީޑިއޯތައް ބެލުމާއި ނޭނގޭ އެއްޗެހި ޓީޗަރުން ކައިރިން އޮޅުން ފިލުވުމަކީ ޣައިސް ދެކޭ ގޮތުގައި ކޮންމެހެން ވެސް ކުރަން ޖެހޭ ކަމެކެވެ.

އޯ ލެވެލް ނިންމުމަށް ފަހު ކުރިއަށްދާނެ ވަކި ދާއިރާއެއް އަދި ނުނިންމަ އެވެ. އޭ ލެވެލްގެ ދެ އަހަރު އޮތީ ކިޔެވުން ކަމަށް އޭނާ ބުންޏެވެ.

އޭނާގެ އުއްމީދުކުރަނީ އޭ ލެވެލްގައި ވެސް ވަރަށް ރަނގަޅު ނަތީޖާއެއް ހޯދުމަށެވެ.