ހުޅުމާލެ ސްޕާއެއްގައި ހަށިވިއްކަން އުޅުނު ހަތް މީހަކު އަތުލައިގެންފި

ސްޕާއެއްގެ ނަމުގައި ހިންގަމުންދިޔަ ހަށި ވިއްކާ ތަނެއް ކޯޓު އަމުރެއްގެ ދަށުން ބަލައި ފާސްކޮށް ހަތް މީހަކު ހައްޔަރުކޮށްފި އެވެ.

ފުލުހުން ބުނީ ހުޅުމާލޭގައި ހުންނަ އެ އެތަން ބަލައި ފާސްކުރީ އެ ތަނުގައި ހަށިވިއްކާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައި ކަމަށެވެ.

އެ މައްސަލާގައި ހައްޔަރުކޮށްފައިވަނީ ދިވެހި ތިން އަންހެނަކާއި ދިވެހި ފިރިހެނެއްގެ އިތުރުން ތައިލެންޑު ތިން އަންހެނެކެވެ.

އެ ހަތް މީހުންގެ ބަންދާ މެދު ގޮތެއް ނިންމަން ހުޅުމާލެ މެޖިސްޓްރޭޓް ކޯޓަށް ހާޒިރު ކުރުމުން ތައިލެންޑު ތިން އަންހެނުން 10 ދުވަހަށް އަދި ދިވެހި ތިން އަންހެނުން ހަތް ދުވަހަށް ވަނީ ބަންދު ކޮށްފަ އެވެ. ފިރިހެން މީހާ ވެސް ވަނީ ފަސް ދުވަހަށް ބަންދުކުރަން އަމުރުކޮށްފަ އެވެ.

މާލޭގައި ޕްރޮފެޝަނަލް މަސާޖުކުރާ ކަމަށް ބުނެ ގިނަ އަދަދަކަށް މަސާޖު ޕާލާތައް ހިންގި ނަމަވެސް އެއީ ފުޅާ ދާއިރާއެއްގައި ހަށިވިއްކާ ތަންތަން ކަމުގެ ތުހުމަތު އެތައް ބަޔަކު ކުރެ އެވެ. އަދި އެކަންކުރާ ބިދޭސީ މީހުން ދަނީ އެ މީހުންގެ ފޮޓޯ އާއި ނަމްބަރު ވެސް ޖަހައިގެން ސޯޝަލް މީޑިއާގައި އިޝްތިހާރު ކުރަމުންނެވެ.

އެ ގޮތަށް ހިންގާ ސްޕާތައް ހުއްޓުވުމަށް ދޭތެރެދޭތެރެއިން އޮޕަރޭޝަންތައް ހިންގަ އެވެ. ނަމަވެސް ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފަށާފައިވާ މަސައްކަތުގައި، ބިދޭސީން ދިރިއުޅޭ ތަންތަން ފާސް ކުރުމާއި ގަވާއިދާ ހިލާފަށް އުޅޭ ބިދޭސީން ހޯދުމުގެ ހާއްސަ އޮޕަރޭޝަނެއް މިހާރު ދަނީ ކުރިއަށެވެ.

އެގޮތުން މި މަހު ދެވަނަ ދުވަހު ހިންގި އޮޕަރޭޝަނެއްގައި ވެސް ވަނީ ފުޅާ ދާއިރާއެއްގައި ހަށިވިއްކަމުންދިޔަ ހަ މީހަކު ހައްޔަރުކޮށްފަ އެވެ.

ގަވާއިދާ ހިލާފަށް އުޅޭ ބިދޭސީން ހޯދައި، އެ މީހުން ރާއްޖެއިން ފޮނުވާލަން ކުރިއަށް ގެންދާ އޮޕަރޭޝަނުގައި މިހާތަނަށް 4،000 އަށް ވުރެ ގިނަ ބިދޭސީން ޑީޕޯޓްކޮށްފައިވެ އެވެ. މިހާރު ވެސް އެ އޮޕަރޭޝަން ކުރިއަށް ގެންދާއިރު، ބައެއް ބިދޭސީން ވަނީ ފިލަން ބައެއް ރަށްރަށަށް ވެސް ގޮސްފަ އެވެ.