މަސައްކަތްތަކުގެ ކޮލިޓީ ޔަގީންކުރަން އެމްޓީސީސީގެ ސުޕަވައިޒަރުންނަށް ފޯރަމެއް

އެމްޓީސީސީން ކޮންމެ އަހަރަކު ބާއްވަމުން އަންނަ ސުޕަވައިޒުންގެ މަހާސިންތާ މި އަހަރު ވެސް ބާއްވައި މުވައްޒަފުންނަށް ބޭނުންވާ މުހިންމު މައުލޫމާތާއި ތަމްރީންތައް ދީފި އެވެ.

މި ފޯރަމްގައި މި އަހަރު އެ ކުންފުނީގެ 107 ސައިޓް ސުޕަވައިޒަރުން ބައިވެރިވި އެވެ. މަޝްރޫއުތައް ކުރިއަށްގެންދިއުމާ ގުޅޭގޮތުންނާއި ލީޑަރެއްގެ ގޮތުގައި މަސައްކަތްތައް ކުރަންވީ ގޮތާއި ޓީމެއްގެ ގޮތުގައި ގުޅިގެން މަސައްކަތްކުރުމާ ގުޅޭ ގޮތުން ސެޝަންތައް މި މަހާސިންތާގައި ކުރިއަށް ގެންދިޔަ އެވެ.

މަހާސިންތާގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ފޯރަމުގެ ބައިވެރިއަކު ވަނީ މި ހަރަކާތުން މުހިންމު ކަންތައްތަކެއް ދަސްވިކަން ފާހަގަކޮށްފަ އެވެ.

"ލީޑަރެއްގެ ހުންނަންވީ ސިފަތަކާއި ލީޑަރަކީ ކޮބައިކަން އަދި ލީޑަރަކަށް ވާން ކުރަންވީ ކަންތައްތަކުގެ މައުލޫމާތުތައް އެނގިއްޖެ،" އޭނާ ބުންޏެވެ.

އޭނާ ބުނީ މި ފޯރަމުގައި ޕްރެކްޓިކަލް ތަމްރީނުތަކެއް ވެސް ލިބުނު ކަމަށެވެ. އަދި އެކި ސުޕަވައިޒަރުންގެ މެދުގައި ހިޔާލު ބަދަލުކޮށް، މުހިންމު މަޝްވަރާތަކެއް ކުރެވި، މަސައްކަތްތައް އިތުރަށް ފުރިހަމައަށް ކުރިއަށް ގެންދަންވީ ގޮތުގެ އާ ވިސްނުން ލިބުނު ކަމަށް ބުންޏެވެ.

މި ރަސްމިއްޔާތުގައި އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ ވަނީ މި ފޯރަމުން ލިބުނު މައުލޫމާތުގެ އަލީގައި މަސައްކަތްތައް ބައްޓަންކޮށް، މަސައްކަތުގެ ކޮލިޓީ ކަށަވަރުކުރުމަށް ކުރެވެން ހުރި ހުރިހާ މަސައްކަތެއް ކުރުމަށް ގޮވާލައްވައިފަ އެވެ.

"މިހާރު ކުރިއަށްދާ ތަރައްގީގެ މަސައްކަތްތައް ވީ އެންމެ އަވަހަކަށް ނިންމާލުމަށް ފަހު، ޕްރައިވެޓް ޕްރޮޖެކްޓުތަކަކާ ދިމާލަށް އަޅުގަނޑުމެން ދާން މި ތައްޔާރު ވަނީ. މި މަސައްކަތްތައް ނަގާއިރު، މި ކުންފުންޏަކީ އިތުބާރުކުރެވޭ، ކޮލިޓީ މަސައްކަތްތަކެއް ކުރާ ކުންފުންޏެއްގެ ގޮތުގައި ވާން ޖެހޭނެ،" އޭނާ ވިދާޅުވި އެވެ.

އެމްޓީސީސީން ކުރިއަށް ގެންދިޔަ މި ފޯރަމްގައި މައުލޫމާތުތައް ދީފައި ވަނީ ކުންފުނީގެ އެކި ޑިވިޝަންތަކުގެ އިސް ވެރިންނެވެ. މި ފޯރަމުގައި މަޝްރޫއުތައް އަވަހަަށް ނިންމުމާއި ވަގުތު މެނޭޖުކުރުމާއި ހަރަދު ކުޑަކުރުމާއި މަޝްރޫއުތަކުގެ ކޮލިޓީ ރަނގަޅުކުރުން ފަދަ ކަންތައްތަކަށް ސުޕަވައިިޒަރުން ވަނީ ހޭލުންތެރިކޮށްފަ އެވެ.

މި ފޯޜަމަކީ އެމްޓީސީސީގެ އެޗްއާރު ޑިވިޝަނުން އިންތިޒާމްކުރާ އަހަރީ ފޯރަމެކެވެ. މި އަހަރުގެ މި ފޯރަމް ބޭއްވީ ހޮނިހިރު ދުވަހުން އާދިއްތަ ދުވަހުގެ ނިޔަލަށެވެ. މި ފޯރަމުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ބައިވެރިންނަށް ވަނީ ސެޓްފިކެޓް ދީފަ އެވެ.