އެމްޓީސީސީގެ އާ ސީއީއޯއަކަށް ސައުދީ، ޒިޔާދު އެންވަޔަރްމަންޓަށް!

އެމްޓީސީސީގެ ސީއީއޯ އަދި މެނޭޖިން ޑިރެކްޓަރުގެ މަގާމުގައި ހުންނެވި އަބްދުﷲ ޒިޔާދު އެންވަޔަރަންމަންޓް މިނިސްޓަރީ އަށް ބަދަލުކޮށް، އެ ކުންފުނީގެ އެންމެ އިސްވެރިއަކަށް ކުރީގެ ޑެޕިއުޓީ ކޮމިޝަނަރު އަހުމަދު ސައުދީ މިއަދު ހަމަޖައްސައިފި އެވެ.

ކުރީގެ ސަރުކާރުތަކުގައި ވެސް އިސް މަގާމުތައް ފުރުއްވި ޒިޔާދު ބަދަލުކުރެއްވީ އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރަކަށެވެ.

އެމްޓީސީސީގެ އާ ސީއީއޯ އަދި މެނޭޖިން ޑިރެކްޓަރުގެ މަގާމަށް އައްޔަން ކުރެއްވި ސައުދީ އެންމެ ފަހުން ހުންނެވީ މާލޭ ސިޓީ ކައުންސިލްގަ އެވެ. އޭނާ އެންމެ ފަހުން ފުރުއްވީ މިހާރުގެ ރައީސް ޑރ. މުހައްމަދު މުއިއްޒު މޭޔަރުގެ މަގާމު ފުރުއްވި ދުވަސްވަރު މާލޭގެ މަގުމަތީގެ އެކިއެކި ކަންކަން ބަލަހައްޓަން އުފެއްދި "މަގުފާރަވެރިން" ގެ ޔުނިޓް ނުވަތަ "ކޮމިޔުނިޓީ އެންގޭޖްމެންޓް ޔުނިޓް" ގެ އެންމެ އިސްވެރިޔާގެ މަގާމެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ޑެޕިއުޓީ ކޮމިޝަނަރު އޮފް ޕޮލިސްގެ މަގާމުގައި ހުންނަވަނިކޮށް 2018 ވަނަ އަހަރު ފުލުހުންގެ އިދާރާ ހިންގުން ވެސް ސައުދީއާ ހަވާލު ކުރެއްވި އެވެ. ނަމަވެސް ފަހުން އޭނާ ވަނީ ޔޫތު މިނިސްޓްރީގެ ޑެޕިއުޓީ މިިނިސްޓަރަކަށް އައްޔަން ކުރައްވައިފަ އެވެ.

އެމްޓީސީސީގެ ސީއީއޯ އަދި އެމްޑީގެ މަގާމުގައި މިހާތަނަށް ހުންނެވި ޒިޔާދު އެ މަގާމަށް އައްޔަން ކުރެއްވީ މިދިޔަ އަހަރުގެ ނޮވެމްބަރު 28 އެވެ. އޭނާ ކުރިން ވެސް އެންވަޔަރަންމަންޓް މިނިސްޓްރީގައި މަސައްކަތް ކުރެއްވި އެވެ.