ނަފްސާނީ ބަލީގެ ހާލަތު ދަނީ ނުރައްކާވަމުން، އޯގާތެރިކަން އިސްކުރަން މިނިސްޓަރު އިލްތިމާސްކުރައްވައިފި

ރާއްޖޭގައި ނަފްސާނީ ބަލީގެ ހާލަތު ނުރައްކާވަމުންދާތީ އޯގާތެރިކަން އިސްކުރަން ހެލްތު މިނިސްޓަރު އަބްދުﷲ ނާޒިމް މިއަދު އިލްތިމާސްކުރައްވައިފި އެވެ.

ދުނިޔޭގައި މިއަދު ފާހަގަކުރާ ނަފްސާނީ ސިއްހަތު ދުވަހާ ގުޅިގެން މިނިސްޓަރު ނެރުއްވި ހިތޯބުގައި ވިދާޅުވީ ރާއްޖޭގައި ވެސް ނަފްސާނީ ބަލީގެ ހާލަތު އެއް ދުވަހުން އަނެއް ދުވަހަށް ނުރައްކާވަމުންދާކަން ތަފާސްހިސާބުތަކުން ދައްކާ ކަމަށެވެ. އެހެންވެ، އެކަކު އަނެކަކަށް އަޅާލައި، އޯގާތެރިކަން އިސްކުރުމަށް އޭނާ އެދިވަޑައިގެންނެވި އެވެ.

ނަފްސާނީ ސިއްހަތުގެ ދުވަހަށް މި އަހަރު ކަނޑާއަޅާފައިވާ ޝިއާރަކީ "މަސައްކަތުގެ މާހައުލުގައި ނަފްސާނީ ދުޅަހެޔޮކަން" އެވެ.

ނާޒިމް ވިދާޅުވީ ވަޒީފާގައި މުވައްޒަފުންނަށް ރައްކާތެރި، އަޅާލާ އަދި އޯގާތެރި މާހައްލެއް ބިނާކުރުމަކީ ނަފްސާނީ ދުޅަހެޔޮ ސިއްހަތަކަށް މަގުފަހިކޮށް، ވަޒީފާގެ މަގުސަދުތައް ހާސިލްކުރަން ވަރަށް މުހިއްމު ކަމެއް ކަމަށެވެ.

މަސައްކަތު މާހައުލުގައި ނަފްސާނީ ސިއްހަތަށް އިސްކަން ދީފިނަމަ މުވައްޒަފުންގެ ދުޅަހެޔޮކަން ރަނގަޅުވެ މުއައްސަސާތަކުގެ އުފެއްދުންތެރިކަން އިތުރުވެގެންދާނެ ކަމަށް އޭނާ ވިދާޅުވި އެވެ.

"ނަފްސާނީ ސިއްހަތާ ގުޅޭ ކަންކަމަށް ހޭދަކޮށް އިންވެސްޓް ކުރުމަކީ ވަރަށް މުހިއްމު އެހާމެ ބޭނުންތެރި ކަމެއް،" ނާޒިމް ވިދާޅުވި އެވެ.

ނަފްސާނީ ސިއްހަތާ ނުލައި ސިއްހަތު ފުރިހަމަވެގެން ނުދިއަސް ގިނަ ފަހަރު ސަމާލުކަންދެވެނީ، މިނިސްޓަރު ވިދާޅުވި ގޮތުގައި، ހަމައެކަނި ޖިސްމާނީ ސިއްހަތަށެވެ. ބޮޑު ރޯގާއެއް ޖެހުމުން ނުވަތަ ހަށިގަނޑުގެ ގުނަވަނަކަށް ބޮޑު ޒަހަމެއް ލިބުމުން އުފުލަންޖެހޭ ތަދަށް ފަރުވާކުރިއަސް ނަފްސާނީ ސިއްހަތަށް ވަރަށް ގިނަ ފަހަރު އިހުމާލުވެވޭކަން ނާޒިމް ފާހަގަކުރެއްވި އެވެ.

ޑަބްލިއުއެޗްއޯގެ ތަފާސްހިސާބުތަކާ ހަވާލާދީ މިނިސްޓަރު ވިދާޅުވި ގޮތުގައި ދުނިޔޭގެ ނިސްބަތުން ކޮންމެ އަށް މީހަކުން އެކަކު ނަފްސާނީ އުނދަގޫތައް ތަހައްމަލުކުރެ އެވެ. އެ ޖަމިއްޔާއިން 2022 ވަނަ އަހަރު ހެދި ސްޓެޕް ސާވޭއިން ވެސް ކޮންމެ ފަސް މީހަކު އެކަކު ޑިޕްރެޝަންގެ އަލާމަތްތައް ތަހައްމަލުކުރާކަން ދެއްކި ކަމަށް މިނިސްޓަރު ވިދާޅުވި އެވެ.

ނަފްސާނީ ބައްޔެއްގެ ސަބަބުން އަމިއްލަ ނަފްސަށް ގެއްލުން ދިނުމުގެ ހިޔާލު ކޮންމެ 20 މީހަކުން އެކަކު ހުންނައިރު ޑިޕްރެޝަނާއި ހާސްކަމުގެ ސަބަބުން އަހަރަކު 12 ބިލިއަން މަސައްކަތު ދުވަހުގެ ގެއްލުން ލިބޭ ކަމަށް ވިދާޅުވި އެވެ.

"ނަފްސާނީ ބަލިތަކަށް ކުރިއާލާ ރައްކާތެރި ނުވެވިއްޖެ ނަމަ ފަރުވާ ދިނުމަށް ހުންނަ ގިނަ ގޮންޖެހުންތަކުގެ އިތުރުން ބޮޑު ހޭދައެއް ކުރަންޖެހޭއިރު ނަފުސާނީ ބަލިތަކާ ހާލަތްތަކުގެ ސަބަބުން، އެއްގޮތަކަށް ވެސް މަސައްކަތް ނުކުރެވުމާއި ގަވާއިދުން މަސައްކަތުގައި ޝާމިލްނުވެވުމުގެ ސަބަބުން އާއިލާތަކަށް ލިބޭ އާމްދަނީއަށާއި އަދި ގައުމުގެ އުފެއްދުންތެރިކަމަށް ނޭދެވޭ އެތައް އަސަރު ކުރޭ،" އޭނާ ވިދާޅުވި އެވެ.

"ނަތީޖާއެއްގެ ގޮތުން ދުނިޔޭގެ އިގުތިސޯދަށް ކޮންމެ އަހަރަކު ގާތްގަނޑަކަށް އެއް ޓްރިލިއަން އެމެރިކާ ޑޮލަރުގެ ގެއްލުން ލިބޭ."

ނަފްސާނީ ސިއްހަތު ރައްކާތެރިކުރުމަކީ ހަމައެކަނި ފަރުދީ ޒިންމާއެއް ނޫން ކަމަށާއި ވަޒީފާދޭ ފަރާތްތަކުގެ އިތުރުން މުޅި މުޖުތަމައު ހޭލުންތެރިވެ ނަފްސާނީ ބައްޔާ ދެކޮޅަށް އެޅެން ހުރި ފިޔަވަޅުތައް އެޅުމަކީ ވަރަށް މުހިއްމު ކަމެއް ކަމަށް ވިދާޅުވި އެވެ.

ނާޒިމް ވިދާޅުވީ ނަފްސާނީ ދުޅަހެޔޮކަމުގެ ފަރުވާ ރަށްރަށަށް ފުޅާކުރުމަކީ ސަރުކާރުގެ ސިޔާސަތެއް ކަމަށެވެ. އޭގެ ތެރެއިން، ހަފްތާ14 ގެ އެޖެންޑާގެ ތެރޭގައި ނަފްސާނީ ސިއްހަތުގެ ހެލްޕްލައިން ނަމްބަރެއްގެ ގޮތުގައި 1677 ހަމަޖައްސައި އެ ހިދުމަތް މިހާރު ކޮންމެ ގަޑިއެއްގައި ވެސް ލިބޭނެ ގޮތް ވަނީ ހަދައިފަ އެވެ. މިހާރު ވެސް ގިނަ ބަޔަކު އެ ހެލްޕްލައިންގެ ބޭނުން ހިފާ ކަމަށް މިނިސްޓަރު ވިދާޅުވި އެވެ.