ދުންފަތާއި ވޭޕްކުރުމާ ދެކޮޅަށް ވަކާލާތު ކޮށްދިނުމަށް ނާޒިމް އެދިވަޑައިގެންފި

ދިވެހިންގެ ދުޅަހެޔޮކަމަށް ހެޔޮއެދޭ ހުރިހާ އެންމެން ދުންފަތުގެ އިސްތިއުމާލު ކުރުމާއި ވޭޕްކުރުމާ ދެކޮޅަށް ވަކާލާތުކޮށްދިނުމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ޔުނިސެފުން އިސް ނަގައިގެން ފަށާފައިވާ ސިލްސިލާ މަޝްވަރާތަކުގެ ތެރެއިން، ދުންފަތުގެ އިސްތިއުމާލު ކުރުން ހުއްޓުވުމާއި ވޭޕް މަނާކުރުން ތަންފީޒުކުރުމުގެ މައުލޫއު އަށް ބޭއްވި ހަރަކާތް ފެށުމުގެ ރަސްމިއްޔާތުގައި ނާޒިމް ވިދާޅުވީ ގިނަ ދުވަސްވީ އެ ފަދަ އާދަތައް ނައްތައިލުމަކީ ފަސޭހަކަމެއް ނޫން ކަމަށެވެ.

ނަމަވެސް، އެންމެން ގުޅިގެން މަސައްކަތް ފަށައިފި ނަމަ ކާމިޔާބުވާނެ ކަމަށް އޭނާ ވިދާޅުވި އެވެ.

"އަޅުގަނޑުގެ އިލްތިސާމަކީ ދިވެހި ގައުމުގެ ދުޅަހެޔޮކަމަށް ހެޔޮއެދޭ ކޮންމެ ފަރާތަކުން، ކޮންމެ ދިވެހި ރައްޔިތެއް އެ މައުލޫއުގައި އިހުލާސްތެރިކަމާ އެކު ވާހަކަ ދައްކަވައި، މިކަމުގައި އެޑްވޮކޭޓް ކުރައްވާ ބޭފުޅަކަށް ވެ ލެއްވުން. އަދި މި ވިސްނުމުގައި ހުރިހާ ބޭފުޅުން މަސައްކަތް ކުރެއްވީމާ ދެން ހުރި ގޮންޖެހުންތައް މާ ފަސޭހަ ގޮންޖެހުންތަކަށް ވާނެ،" މިނިސްޓަރު ވިދާޅުވި އެވެ.

އޭނާ ވިދާޅުވިގޮތުގައި، ދުޅަހެޔޮ ޖީލެއް ބިނާކުރުމަކީ ދައުލަތުގެ ވަރަށް ބޮޑު ޒިންމާއެކެވެ. އެ އަމާޒަށް ވާސިލް ވާން ޕްރިވެންޓިވް ހެލްތު ކެއާ ހަރުދަނާކޮށް، ފުޅާކުރުމަކީ އުއްމީދެއް ކަމަށް ނާޒިމް ވިދާޅުވި އެވެ. އެގޮތަށް، އަންނަ އަހަރު ނިމުމުގެ ކުރިން މީހުން ތަމްރީނުކޮށް، ދެމެހެއްޓެނިވި ގޮތެއްގައި އެކަން ކުރާނެ ކަމަށް ވެސް ވިދާޅުވި އެވެ.

ދެމެހެއްޓެނިވި އާބާދީއަކަށް ކުރަންޖެހޭ އެއް ކަމަކީ ދުންފަތާ މީހުން ދުރުކުރުން ކަމަށާއި އަންނަން އޮތް ޖީލު، ދުންފަތުން ޅަ ދަރިން ސަލާމަތްކުރަން އުނދަގޫ ވިއަސް މުހިއްމު ފިޔަވަޅު އަޅާ ކަމަށް ނާޒިމް ވިދާޅުވި އެވެ.

މިނިސްޓަރު ވިދާޅުވީ މިދިޔަ މަހުގެ 15 އިން ފެށިގެން ރާއްޖެ އަށް ވޭޕް އެތެރެކުރުން މަނާކުރުން އަދި މިދިޔަ އާދިއްތަ ދުވަހުން ފެށިގެން ރާއްޖޭގައި ވޭޕް ބޭނުންކުރުން މަނާކުރުމަކީ އޭގެ ތެރެއިން ފިޔަވަޅުތަކެކެވެ.

އޭގެ އިތުރުން ދުންފަތުގެ ވަބާއިން ސަލާމަތްވާން ސިޒޭޝަން ކްލިނިކްތައް ގާއިމްކުރަން ބޭނުންވާ އިސްލާހުތައް ގާނޫނަށް ގެނެސްފައިވާ ކަމަށް ނާޒިމް ވިދާޅުވި އެވެ.

"އަޅުގަނޑު މިއަދު ކަށަވަރު ކޮށްދޭން ބޭނުންވާ ކަމަކީ މިފަދަ ސިޒޭޝަން ކްލިނިކެއްގެ އެހީތެރިކަން އަމިއްލަ އަށް ބޭނުން ވެގެން އެކަމަށް އެދިއެދި ހުރި އެއްވެސް ދިވެހި ރައްޔިތަކަށް އެ ހިދުމަތް ނުލިބި ނުހުންނާނެކަން. ރާއްޖޭގެ ހުރިހާ ރަށެއްގެ ހެލްތު ސެކްޓާގައި މީހުން ވަނީ ތަމްރީނު ކުރެވިފައި،" އޭނާ ވިދާޅުވި އެވެ.

ނާޒިމް ވިދާޅުވީ އިތުރަށް ކްލިނިކިލް އެހީ ބޭނުންވާ ނަމަ އާސަންދައިން ގަމް އަދި ބޭސް ލިބޭނެކަން ކަށަވަރުކުރާ ކަމަށެވެ.

ނާޒިމް ވިދާޅުވިގޮތުގައި، ދުނިޔެ ދޫކޮށް ދާއިރު އަމިއްލަ ފަރުދެއްގެ ގޮތުން އަދި އާއިލާގެ ގޮތުގައި ވިސްނާއިރު އެންމެ ބޮޑު ހިތްހަމަޖެހިވަޑައިގަތުމަކަށް ވާނީ އޭނާގެ ކުދިން އުފާވެރި ދިރިއުޅުމެއް އުޅޭތަން ދެކެވަޑައިގަތުމެވެ. އެ އުމުރުގައި އިތުރު އުއްމީދެއް ކުރާނެ ތަނެއް ނެތް ކަމަށް ވެސް ވިދާޅުވި އެވެ.

ސަރުކާރުން މި ގެނައި ބަދަލުތަކުގެ ނަތީޖާ ފެންނަން ދުވަސްތަކެއް ނަގާފާނެ ކަމަށާއި އެކަމަކު ބުރަ މަސައްކަތް ކުރި މީހުންގެ ނަން މުޅި އުމުރަށް ތާރީހުގައި ލިޔާނެ ކަމަށް ވިދާޅުވެ، ނާޒިމް ވަނީ އެ މަސައްކަތުގައި ބައިވެރިވުމުގެ ޝަރަފު ކޮންމެ މީހަކު ވެސް ހޯދަން އިލްތިމާސް ކުރައްވައިފަ އެވެ.

ޔުނިސެފުން ރާއްޖެ އަށް ކަނޑައަޅާފައިވާ މަންދޫބު ޑރ. އެޑްވާޑް އަޑާއި ވިދާޅުވީ ދުންފަތާއި ވޭޕުން ސިއްހަތަށް ބޮޑެތި ގެއްލުންތަކެއް ލިބޭކަން ކަށަވަރުވާ ކަމަށެވެ. އަދި ދުޅަހެޔޮ ޖީލެއް ބިނާކުރަން މުހިއްމު ނިންމުންތަކެއް ދިވެހި ސަރުކާރުން ނިންމާފައިވާ ކަން އޭނާ ފާހަގަކުރެއްވި އެވެ.