ޓޫރިޒަމް ދާއިރާގެ ކުރިއެރުން 10 ޕަސެންޓުގައި

މި އަހަރުގެ މިހާތަނަށް ރާއްޖޭގެ ޓޫރިޒަމް ދާއިރާ 10 ޕަސެންޓުގައި ކުރިއަރަމުން އަންނަ ކަމަށް ޓޫރިޒަމް މިނިސްޓްރީން ބުނެފި އެވެ.

ޓޫރިޒަމް ދުވަހާ ގުޅިގެން އެ މިނިސްޓްރީން ނެރުނު ސަޕްލިމެންޓެއްގައިވާ ގޮތުން، ޓޫރިސްޓުން އަންނަ އަދަދު ވަރަށް ބާރު ސްޕީޑުގައި ކުރިއަރަމުން އަންނަ ކަމަށެވެ. އޭގެ ތެރެއިން ވެސް މިވަގުތު އެންމެ ގިނަ ޓޫރިސްޓުން އަންނަ ޗައިނާގެ ހިއްސާ ވަނީ 14 ޕަސެންޓަށް އިތުރުވެފައި ކަމަށް އެ މިނިސްޓްރީން ބުންޏެވެ.

ޓޫރިޒަމް ދާއިރާގައި 1،216 ތަނަކުން ހިދުމަތްދޭއިރު، އޭގެ ތެރޭގައި ހިމެނެނީ 182 ރިސޯޓާއި 795 ގެސްޓް ހައުސް އެވެ.

ޓޫރިޒަމް ދާއިރާ އަށް އެހާ ބޮޑު ކުރިއެރުމެއް އެރި އެއް ސަބަބަކީ ދުނިޔޭގައި ލަގްޒަރީ ޓޫރިޒަމަށް އޮތް ޑިމާންޑު އިތުރުވުން ކަމަށް ޓޫރިޒަމް މިނިސްޓްރީން ބުންޏެވެ. ތިމާވެއްޓާ ރައްޓެހި، ދެމެހެއްޓެނިވި ޓޫރިޒަމަށް ދަތުރު ކުރާ ފަރާތްތަކުގެ ޝައުގުވެރިކަން އިތުރުވުން ކަމަށް އެ މިނިސްޓްރީން ބުންޏެވެ.

ރާއްޖެ އަށް އަންނަ ޓޫރިސްޓުން އިތުރުވެ، ދާއިރާ ފުޅާވަން ދިމާވި އަނެއް ސަބަބަކީ، އެކި ސަރަހައްދުތަކުން އަންނަ ޓޫރިސްޓުން އިތުރުވުމެވެ. ޓޫރިޒަމް މިނިސްޓްރީން ބުނީ، މިވަގުތު ރާއްޖެއަށް ޓޫރިސްޓުން އަންނަ އިންޑިއާ އާއި ޖަރުމަނާއި ފްރާންސަކީ ޓޫރިސްޓުން އެންމެ ބޮޑަށް އިތުރުވަމުން އަންނަ މާކެޓުތައް ކަމަށެވެ.

ސަރުކާރުގެ އަމާޒަކީ މިއަހަރު ނިމޭ އިރު ރާއްޖެ އަށް ދެ މިލިއަން ޓޫރިސްޓުން ގެނައުމެވެ.

މި އަހަރުގެ މިހާތަނަށް ރާއްޖެއަށް ވަނީ 1.4 މިލިއަން ޓޫރިސްޓުން އައިސްފަ އެވެ. އޭގެ ތެރެއިން އެންމެ ގިނަ ޓޫރިސްޓުން ޒިޔާތަޔްކުރި ޗައިނާ އިން 218،000 ޓޫރިސްޓުން އައިސްފައި ވެ އެވެ.