މަޓީގެ ޝަކުވާ: ހުށަހެޅި ކަންކަމަށް އެމްއެމްއޭ އިން އިޖާބައެއް ނުދިން

މަރުކަޒީ ބޭންކް، އެމްއެމްއޭ އިން އާންމު ކުރި ފައިސާއާ ބެހޭ ގަވާއިދާއި މަނީ ޗޭންޖިން ވިޔަފާރިއާ ބެހޭ ގަވައިދު ގެޒެޓު ކުރިއިރު، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ފަރާތުން ހުށަހެޅި އެއްވެސް ކަންބޮޑުވުމަކަށް އެމްއެމްއޭގެ ފަރާތުން އިޖާބަ ނުދޭ ކަމަށް އެ ޖަމިއްޔާ އިން މިއަދު ބުނެފި އެވެ.

ޓޫރިޒަމް ދާއިރާގެ ވިޔަފާރިވެރިންގެ ޖަމިއްޔާ އިން ނެރުނު ބަޔާނެއްގައި ބުނީ، އެމްއެމްއޭގެ އެދުމުގެ މަތިން މަޓީން އެ އޮތޯރިޓީއާ ބައްދަލުކުރި ކަމަށެވެ. ބޭރު ފައިސާއާ ބެހޭ ގަވާއިދުގައި ހިމަނަން އެމްއެމްއޭ އިން ހިމެނީ މަޓީ އަށް އެއްބަސްވެވޭނެ ކަންތައްތަކެއް ނޫން ކަމަށް އެ ބައްދަލުވުމުގައި ބުނެފައިވާ ކަމަށް ވެސް މަޓީން ބުންޏެވެ.

މަޓީން ބުނީ، އާ ގަވާއިދުގައި ހުރި ކަންކަމަށް އެއްބަސްނުވެވުނު ނަމަވެސް ގައުމަށް ދިމާވާ ކޮންމެ ކަމެއްގައި ވެސް އެ ޖަމިއްޔާ އިން ފުރިހަމައަށް އެއްބާރުލުން ދޭނެ ކަމަށެވެ.

އެމްއެމްއޭ އިން ރޭ އާންމުކުރި ބަޔާނުގައި ބުނެފައިވަނީ އާ ގަވައިދުތައް އެކުލަވައިލީ ސްޓޭކްހޯލްޑަރުންގެ މަޝްވަރާއާ ލަފާ ހޯދައިގެން ކަމަށެވެ.

އެމްއެމްއޭ އިން ރޭ އާންމުކުރި ފައިސާއާ ބެހޭ ގަވާއިދުގައިވާ ގޮތުން، ޓޫރިޒަމަށް ވަންނަ ހުރިހާ އާމްދަނީއެއް ރާއްޖޭގެ ބޭންކަކަށް ޖަމާކުރަން ޖެހޭނެ އެވެ. ނަމަވެސް، އެ ފައިސާ ބަހައްޓަން އެއްވެސް މުއްދަތެއް ދީފައެއް ނުވެ އެވެ. އާ ގަވައިދުގައި ޓޫރިޒަމްގެ ބޭނުންތަކަށް ޑޮލަރުގެ މުއާމަލާތް ކުރުމުގެ ފުރިހަމަ ބާރު ވެސް ދީފައިވެ އެވެ.

އެ ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކުތައް މެދުވެރިކޮށް މާރުކުރަން ޖެހޭނެ އެވެ. ރިސޯޓުތަކާއި ހޮޓާތަކާއި ޓޫރިސްޓުން އުޅަނދުތަކަށް ކޮންމެ މަހަކު އަންނަ ޓޫރިސްޓެއްގެ ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކުތަކުގައި މާރުކުރަން ޖެހޭނެ އެވެ.

ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަށް 25 ޑޮލަރުގެ ރޭޓުން ކޮންމެ މަހަކު އަންނަ ޖުމްލަ ޓޫރިސްޓުންނަށް ޖެހޭ އަދަދު ވެސް ރާއްޖޭގެ ބޭންކަކަށް މާރުކުރަން ޖެހޭނެ އެވެ.

މަނީ ޗޭންޖިން ވިޔަފާރިއާ ބެހޭ ގަވައިދުގައިވަނީ ކުރިން ހުރި ގިނަ ލުއިތަކެއް އުވާލާ، މަނީ ޗޭންޖިން ވިޔަފާރިތައް ހިންގާ ނަމަ ބޮޑެތި ފީތަކެއް ދައްކަން ޖެހޭނެ ކަމަށް ކަނޑައަޅާފަ އެވެ.