ނޯޓިސް ދިނީ ފައިސާ ނުދައްކާ މީހުންނަށް އެކަނި: އެޗްޑީސީ

ހުޅުމާލޭގައި އެކިއެކި އަމިއްލަ ފަރާތްތަކުން އިމާރާތްކުރާ ފްލެޓްތަކުގެ ތެރެއިން އެޗްޑީސީގެ މުވައްޒަފުންނަށް ކުރީގެ ސަރުކާރުގެ ދުވަސްވަރުން ފެށިގެން ފްލެޓްތަކެއް ހާއްސަ ކޮށްފައިވާއިރު، އެއްބަސްވުމުގައި ކަނޑައަޅާފައިވާ ގޮތަށް ފައިސާ ނުދައްކާ މުވައްޒަފުންނަށް ނޯޓިސް ފޮނުވަމުންދާ ކަމަށް އެ ކުންފުނިން މިއަދު ބުނެފި އެވެ.

ބައެއް މުވައްޒަފުންނަށް ދޫކޮށްފައިވާ ފްލެޓްތައް އަތުލަމުންދާ ކަމަށް ދެއްކެވޭ ވާހަކަތަކާ ގުޅިގެން "މިހާރު" އިން ސުވާލު ކުރުމުން އެ ކުންފުނީގެ އިސް އޮފިޝަލަކު ވިދާޅުވީ، ބަރާބަރަށް އެޗްޑީސީ އަށް ފައިސާ ނުދައްކާ މުވައްޒަފުން ފިޔަވައި އެހެން މުވައްޒަފުންގެ ފްލެޓްތައް އަތުނުލާ ކަމަށެވެ.

"ފައިސާ ނުދައްކާ ނަމަ އެ އޮންނަ އުސޫލުގެ ތެރެއިން އެ ފްލެޓްތައް ނަގާނެ. އެއީ އަބަދުވެސް ކުރާ ކަމެއް،" އޭނާ ވިދާޅުވި އެވެ.

އޮފިޝަލް ވިދާޅުވީ، ބައެއް މުވައްޒަފުން ފްލެޓަށް އެއްފަހަރާ ފައިސާ ދައްކާފައިވީ ނަމަވެސް އެޗްޑީސީން ދިން މުއްދަތަށް ވުރެ ފަހުން ފައިސާ ދައްކާފައިވާތީ އެ ތަންތަން އަތުލަން ނިންމާފައިވާ ކަމަށެވެ. އެއީ ފައިސާ ދައްކަން އެއްބަސްވުމުގައި ވަކި މުއްދަތެއް ދީފައި ވަނިކޮށް، އެ ތާރީހަށް ވުރެ ފަހުން ޓްރާންސެކްޝަން ހެދި މީހުން ކަމަށް އޭނާ ވިދާޅުވި އެވެ.

އެނގިފައިވާ ގޮތުގައި އެޗްޑީސީން ނިންމާފައި ވަނީ އެއްބަސްވުމުގައި ބުނާ ތާރީހަށް ވުރެ ފަހުން ފްލެޓްތަކަށް ދެއްކި ފައިސާ ތިން މަހަށް ބަހާލައިގެން އަނބުރާ ދޫކުރާ ގޮތަށެވެ. އެކަން އެ މީހުންނަށް މިހާރު އަންގާފައިވާ ކަމަށް އެޗްޑީސީގެ އޮފިޝަލް ވިދާޅުވި އެވެ.

އެޗްޑީސީގެ ކުރީގެ މެނޭޖްމެންޓުން ވަނީ، އެ ކުންފުނީގެ އިސް މަގާމުތަކުގައި ތިއްބެވި ބޭފުޅުން ހިމެނޭ ގޮތަށް، ގިނަ މުވައްޒަފުންތަކަށް އަމިއްލަ އިމާރާތްތަކުން ފްލެޓް ދީފަ އެވެ. އޭގެ ތެރޭގައި ކުންފުނީގެ ޑިރެކްޓަރުންގެ ބޯޑުގެ މެމްބަރުން ވެސް ހިމެނެ އެވެ.

އެޗްޑީސީން އަބަދުވެސް، ދޭތެރެދޭތެރެއިން އެ ކުންފުނީގެ މުވައްޒަފުންނަށް ފްލެޓް ދޭން ހުޅުވައިލަ އެވެ.

މިދިޔަ އަހަރުގެ ކުރީ ކޮޅު އެޗްޑީސީން އެ ކުންފުނީގެ ބޯޑު މެންބަރުންނާއި އެހެން ވެސް ބައެއް އިސްވެރިން ހިމެނޭ ގޮތަށް 34 މުވައްޒަފަކަށް ފްލެޓް ބަހަން ނިންމާފައިވާ ކަމަށް ތުހުމަތުކޮށް، ނަން ލިސްޓެއް ސޯޝަލް މީޑިއާގައި ދައުރުވެފައިވެ އެވެ. ނަމަވެސް، އޭރު އެޗްޑީސީން ވަނީ އެކަން ދޮގުކޮށްފަ އެވެ.

އެޗްޑީސީން ބުނީ، އެ 34 ފްލެޓަކީ "ސްޓާފް ހައުސިން ސްކީމް" ގެ ދަށުން "އެންޑް ޔޫސާ ފައިނޭންސް މޮޑެލް"ގެ ދަށުން ވިއްކުމަށް ހުޅުވާލި ފްލެޓްތަކުގެ ތެރެއިން ނުވިކި ބާކީ ހުރި ފްލެޓްތައް ކަމަށެވެ.

އެޗްޑީސީގެ މުވައްޒަފުންނަށް ހުޅުވައިލި އެ ފުރުސަތުގައި އެ ކުންފުނީގެ އިސް މަގާމުތަކުގައި ތިއްބެވި ބޭފުޅުންނަށް ކުރިމަތިލެވޭ ގޮތް ހަދައި، ބައެއް ބޭފުޅުންނަށް ފްލެޓް ދީފައިވެ އެވެ.