ކާރެއްގެ ދަށުވެ، މީހަކު މަރުވި މައްސަލާގައި ދުއްވި މީހާއަށް ދައުވާކޮށްފި

ހުޅުމާލޭގައި ކާރަކާއި ސައިކަލެއް ޖެހި ހިނގި އެކްސިޑެންޓެއްގައި ކާރު ދަށުވެ، މީހަކު މަރުވި މައްސަލާގައި ކާރު ދުއްވި މީހާގެ މައްޗަށް ދައުލަތުން ދައުވާކޮށްފި އެވެ.

މިދިޔަ އޭޕްރީލް މަހު ހުޅުމާލޭ އުރީދޫ ބިލްޑިންގެ ހުޅަނގަށް އޮންނަ މަގުގައި ކާރަކާއި ސައިކަލެއް ޖެހި ހިނގި އެކްސިޑެންޓްގައި، ސައިކަލްގައި ތިބި ބަންގްލަދޭޝް ދެ މީހުން ކަމުގައިވާ ޝެއިހް ޝުވައިބް އާއި މަސްއޫދު ރަނާ އަށް ބޮޑެތި އަނިޔާތަކެއް ލިބުނެވެ. އޭގެ ތެރެއިން މަރުވީ ސައިކަލު ދުއްވަން އިން މަސްއޫދެވެ.

އެ މައްސަލާގައި، ކާރު ދުއްވަން އިން ކ. ކާށިދޫ ކެތި، މައުސޫމް ހަލީމްގެ މައްޗަށް ދައުލަތުން ވަނީ ތިން ދައުވާއެއް އުފުލައިފަ އެވެ. އެގޮތުން މީހަކު މަރުވެދިއުމުގެ ފަރުވާކުޑަ އަމަލެއް ކުރުމުގެ ދައުވާ އާއި އަނިޔާއެއް ދިނުމުގެ ދައުވާ އާއި މުދަލަށް ގެއްލުން ދިނުމުގެ ދައުވާއެއް ދައުލަތުން ކުރެ އެވެ.

ޕްރޮސެކިއުޓާ ޖެނެރަލްގެ އޮފީހުން ބުނިގޮތުގައި ފަރުވާ ކުޑަ އަމަލަކުން މީހަކު މަރުވުމުގެ ދައުވާ އާއި އަނިޔާއެއް ދިނުމުގެ ދައުވާކުރީ ކާރު ސިގްނަލް ނުދީ ގޯޅި އެޅި ވަގުތު، ކާރު އޯވަޓޭކް ކުރަން އުޅުނު ސައިކަލުގައި ޖެހި އެކްސިޑެންޓްވެ، ކާރުގެ ދަށުގައި މަސްއޫދު ތާށިވެފައި އޮއްވާ އޭނާގެ ހަށިގަނޑު މަތިން ބާރު ސްޕީޑްގައި ކާރު ފަހަތަށް ޖެއްސުމުގެ ސަބަބުން އޭނާއަށް އަނިޔާ ވެފައިވާތީ އާއި އެ އަނިޔާތަކުގެ ސަބަބުން އޭނާ މަރުވެފައިވާތީ އެވެ.

މުދަލަށް ގެއްލުން ދިނުމުގެ ދައުވާކުރީ ސައިކަލުގައި އެ އެކްސިޑެންޓްގައި ކާރު ކޮންޓްރޯލް ނުކުރެވި، އެ ސަރަހައްދުގައި ޕާކު ކޮށްފައި އޮތް އެހެން ކާރެއްގައި ޖެހުމުގެ ސަބަބުން އެ ކާރަށް ވެސް ގެއްލުން ވެފައިވާތީ އެވެ.

ހުޅުމާލޭގައި އެކްސިޑެންޓްތައް އިތުރުވަމުންދާ މައްސަލާގައި ފުލުހުން ވަނީ ފިޔަވަޅުތަކެއް އަޅަން ފަށައިފަ އެވެ. ދާދިފަހުން ވެސް ނުރައްކާތެރި އެކްސިޑެންޓްތަކެއް މާލެ ސަރަހައްދުގައި ހިނގާފައިވާއިރު، ހުޅުމާލޭގައި ބާރު ސްޕީޑްގައި ސްޕޯޓް ކާރެއްގައި ޖެހި ޒުވާނަކު ވެސް މިދިޔަ މަހު ވަނީ މަރުވެފައިވެ އެވެ.

އެ ކާރު ދުއްވި މީހާ ޝަރީއަތް ނިމެންދެން ބަންދުކޮށްފައި ވާއިރު، ބާރު ސްޕީޑްގައި ދުއްވާފައި ދިޔަ ސްޕޯޓްސް ކާރެއް ކޮންޓްރޯލް ނުވެ މީހެއްގެ ގައިގާ ޖެހުނު މައްސަލައެއްގައި ވެސް ވެސް ތިން މީހަކު ހައްޔަރު ކޮށްފައިވެ އެވެ.