ހެލްތުގެ އެންގުމަށް އަމަލު ނުކުރުމުން ފަޒީސް ހިޖާމާ ބަންދުކޮށްދޭން ޕޮލިހުގައި އެދިއްޖެ

ހުއްދަ ނެތި ހިޖާމާ ޖަހާތީ، ފަޒީލާ އުސްމާންގެ ކްލިނިކް ބަންދުކޮށްދޭން ފުލުސް އޮފީހުގައި ހެލްތު މިނިސްޓްރީން އެދިއްޖެ އެވެ.

ހެލްތު މިނިސްޓްރީގެ މީޑިއާ އޮފިޝަލަކު މިއަދު ވިދާޅުވީ ހުއްދަ ނުހޯދުމުގެ އިތުރަށް ރަޖިސްޓްރީނުކޮށް ހިޖާމާ ޖެހުމުގެ ހިދުމަތް ދޭތީ "ފަޒީސް ހިޖާމާ ތެރަޕީ" ސެންޓަރު ބަންދުކޮށްދޭން މިދިޔަ ހަފުތާގައި ޕޮލިހަށް ހުށަހަޅާފައިވާ ކަމަށެވެ. އެ މައްސަލަ ޕޮލިހަށް ހުށަހެޅީ ހެލްތު މިނިސްޓްރީގެ އެންގުމަށް ހިޖާމާ ކްލިނިކް ބަންދު ނުކުރުމުންނެވެ.

ފުލުހުންގެ މީޑިއާ އޮފިޝަލަކު ވިދާޅުވީ ހެލްތު މިނިސްޓްރީގެ ހުއްދަ ނުހޯދައި، ހުޅުމާލޭގައި ހިޖާމާ ކްލިނިކެއް ހިންގާ މައްސަލަ ބަލައިދިނުމަށް އެދިފައިވާތީ، އެ މައްސަލަ ތަހުގީގުކުރަމުން އަންނަ ކަމަށެވެ.

އެ މިނިސްޓްރީން މި މަހުގެ 12 ވަނަ ދުވަހު ނެރުނު އިއުލާނުގައި ބުނީ ރަޖިސްޓްރީކޮށް، އޮޕަރޭޓިން ލައިސެންސް ލިބެންދެން އެ ތެރަޕީގެ ހިދުމަތްތައް ހުއްޓާލުމަށް ފަޒީލާއަށް އަންގާފައިވާ ކަމަށެވެ. އެއާ ހިލާފަށް މަސައްކަތްކުރާ ނަމަ ގާނޫނުގެ ދަށުން ފިޔަވަޅު އަޅާނެ ކަމުގެ އިންޒާރު މިނިސްޓްރީން ދިނެވެ.

އޭގެ އިތުރުން ފަޒީލާގެ ހިޖާމާ ހިދުމަތް ޕްރޮމޯޓް ކުރަން ސޯޝަލް މީޑިއާގައި ކޮށްފައިވާ އިޝްތިހާރުތަކަކީ މިނިސްޓްރީގެ ހުއްދަ ލިބިގެން ނޫނީ ކުރެވޭނެ ކަމަކަށް ނުވާތީ އެ އިޝްތިހާރުތައް ނެގުމަށް ވެސް ވަނީ އަންގައިފަ އެވެ. އަދި ބަލި މީހުންގެ މެޑިކަލް ރިޕޯޓުތަކުގެ މައުލޫމާތަކީ އެންމެ ރައްކާތެރި އަދި ސައްހަ މައުލޫމާތުކަން ކަށަވަރު ނުވާތީ އެ ރިޕޯޓުތައް ނެގުމަށް ވެސް އޭނާއަށް ވަނީ އަންގައިފަ އެވެ.

ނަމަވެސް، މިނިސްޓްރީން އިންޒާރު ދިން ފަހުން ފަޒީލާ ވަނީ ދެ ދުވަހެއްގެ މަތިން، 43،000 އަށް ވުރެ ގިނަ މީހުން ފޮލޯކުރާ އޭނާގެ ޕޭޖުގައި ބަލި މީހުންގެ ފޮޓޯ އާއްމުކޮށްފަ އެވެ. އޭގެ ގިނަ ޕޯސްޓުތަކެއް އިއްޔެ އެކަނި ވެސް ފޭސްބުކްގައި ހިއްސާކޮށްފައިވެ އެވެ.

ހުއްދަ ނެތި ހިޖާމާ ޖަހާތީ އެކަން ނުކުރަން ތަކުރާރުކޮށް ފަޒީލާއަށް ކުރިން ވެސް އެންގި އެވެ. އަދި ހަކުރުބައްޔަކީ ހިޖާމާއިން ކޮންޓްރޯލް ކުރެވޭ ބައްޔެއް ކަމަށާއި ބޭސްތަކުގެ ބަދަލުގައި ހިޖާމާ ޖެހުމަށް ބާރު އަޅައި އިޝްތިހާރުތައް ކުރުމުން ޑައިބެޓިކްސް ސޮސައިޓީ ފަދަ ތަންތަނުން ވެސް ވަނީ ނުރުހުން ފާޅުކޮށްފަ އެވެ.

ފަޒީލާ "މިހާރު" އަށް ކުރިން ދިން އިންޓަވިއުއެއްގައި ބުނީ ދުވާލެއްގެ މައްޗަށް ތިރީހަކަށް މީހުން އޭނާ ކައިރިން ހިދުމަތް ހޯދާ ކަމަށެވެ. އަދި އޭގެ ކޮންމެ ސެޝަނަކަށް 1،000ރ. ގެ މަގުން އޭނާ ނަގަމުން އަންނައިރު ދުވާލެއްގެ މައްޗަށް 30،000ރ. އަށް ވުރެ ބޮޑު އާމްދަނީއެއް އޭނާ ބުނާ ނިސްބަތުން ބަލާއިރު ލިބޭނެ އެވެ. އެއީ މަހެއްގެ މައްޗަށް 800،000 އެއްހާ ރުފިޔާ އެވެ.