ފުލުހުން އަންގައިގެން ފަޒީސް ހިޖާމާ ކްލިނިކް ބަންދުކޮށްފި

ހެލްތު މިނިސްޓްރީގެ ހުއްދަ ނުހޯދައި ހިންގާ "ފަޒީސް ހިޖާމާ ކްލިނިކް" ފުލުހުން އަންގައިގެން ބަންދުކޮށްފި އެވެ.

ފުލުހުން ބުނީ ހުއްދަ ނުހޯދައި ހިޖާމާ ޖަހާ ކްލިނިކެއްގެ މައްސަލަ ބަލައިދޭން ހެލްތު މިނިސްޓްރީން އެދިފައިވާތީ، އެ މައްސަލައާ ގުޅިގެން ފުލުހުން ބަލަން ޖެހޭ ކަންކަން ބަލާފައިވާ ކަމަށެވެ. ގާނޫނާއި ގަވާއިދާ އެއްގޮތަށް ނަގަން ޖެހޭ ހުއްދަތައް ނަގައިގެން ހިދުމަތް ދޭން ކްލިނިކްގެ ވެރިފަރާތަށް އަންގާފައިވާ ކަމަށް ފުލުހުން ބުންޏެވެ.

ފުލުހުން ބުނި ގޮތުގައި ހުއްދަ ލިބެންދެން ހިދުމަތް ހުއްޓާލަން ވެސް ލިއުމުން ވަނީ ނަސޭހަތްތެރިވެފަ އެވެ.

"ފަޒީސް ހިޖާމާ ތެރަޕީ"ގެ ފޭސްބުކް ޕޭޖުގައި ރޭ ކުރި ޕޯސްޓުގައި ބުނީ އެ ހިދުމަތްތައް އަލުން ފަށާނީ ހެލްތު މިނިސްޓްރީގެ ހުއްދަ ލިބުމުން ކަމަށެވެ. ކްލިނިކް ހިންގުމުގެ ހުއްދަ ހޯދުމަށް އެދި މިހާރު ވެސް މަސައްކަތް ކުރަމުން އަންނަ ކަމަށް އެ ޕޭޖުގައި ބުންޏެވެ.

އޭނާ ވަނީ ހިޖާމާ ޖަހައިދިނުމުގެ ހިދުމަތް މެދުކެނޑިފައި އޮތުމުގެ ސަބަބުން ކަސްޓަމަރުންނަށް ލިބިދާނެ ދަތިތަކަށް މައާފަށް އެދިފަ އެވެ.

ރަޖިސްޓްރީކޮށް، އޮޕަރޭޓިން ލައިސެންސް ލިބެންދެން އެ ތެރަޕީގެ ހިދުމަތްތައް ހުއްޓާލުމަށް ހެލްތު މިނިސްޓްރީން ވަނީ މި މަހުގެ 12 ވަނަ ދުވަހު ފަޒީލާއަށް އަންގައިފަ އެވެ. އެއާ ހިލާފަށް މަސައްކަތްކުރާ ނަމަ ގާނޫނުގެ ދަށުން ފިޔަވަޅު އަޅާނެ ކަމުގެ އިންޒާރު މިނިސްޓްރީން ދިނެވެ.

އޭގެ ފަހުން، އެ އިދާރާއިން ވަނީ ހުއްދަ ނުހޯދައި އަދި ރަޖިސްޓްރީނުކޮށް ހިޖާމާ ޖެހުމުގެ ހިދުމަތް ދޭތީ އެ ކްލިނިކް ބަންދުކޮށްދޭން މިދިޔަ ހަފުތާގައި ޕޮލިހަށް ހުށަހަޅައިފަ އެވެ. އޭގެ އިތުރުން ސިއްހީ ހިދުމަތް ދިނުމާ ބެހޭ ގާނޫނާ ހިލާފަށް އެ މަސައްކަތް ކުރާތީ ފުލުހުން ދަނީ މައްސަލަ ތަހުގީގުކުރަމުންނެވެ. ނަމަވެސް، އޭރު އޭނާ ވަނީ ހިޖާމާގެ ހިދުމަތް ހުއްޓާނުލައި ކުރިއަށްގެންދާނެ ކަމަށް ބުނެފަ އެވެ.

މިނިސްޓްރީން ބުނީ ހިޖާމާ ހިދުމަތް ޕްރޮމޯޓް ކުރަން ސޯޝަލް މީޑިއާގައި ކޮށްފައިވާ އިޝްތިހާރުތަކަކީ މިނިސްޓްރީގެ ހުއްދަ ލިބިގެން ނޫނީ ކުރެވޭނެ ކަމަކަށް ނުވާތީ އެ އިޝްތިހާރުތައް ނެގުމަށް އަންގާފައިވާ ކަމަށެވެ. އަދި ބަލި މީހުންގެ މެޑިކަލް ރިޕޯޓުތަކުގެ މައުލޫމާތަކީ އެންމެ ރައްކާތެރި އަދި ސައްހަ މައުލޫމާތުކަން ކަށަވަރު ނުވާތީ އެ ރިޕޯޓުތައް ނެގުމަށް ވެސް އޭނާއަށް ވަނީ އަންގައިފަ އެވެ.

ހުއްދަ ނެތި ހިޖާމާ ޖަހާތީ އެކަން ނުކުރަން ތަކުރާރުކޮށް ފަޒީލާއަށް ކުރިން ވެސް އެންގި އެވެ. އަދި ހަކުރުބައްޔަކީ ހިޖާމާއިން ކޮންޓްރޯލް ކުރެވޭ ބައްޔެއް ކަމަށާއި ބޭސްތަކުގެ ބަދަލުގައި ހިޖާމާ ޖެހުމަށް ބާރު އަޅައި އިޝްތިހާރުތައް ކުރުމުން ޑައިބެޓިކްސް ސޮސައިޓީ ފަދަ ތަންތަނުން ވެސް ވަނީ ނުރުހުން ފާޅުކޮށްފަ އެވެ.

ފަޒީލާ "މިހާރު" އަށް ކުރިން ދިން އިންޓަވިއުއެއްގައި ބުނީ ދުވާލެއްގެ މައްޗަށް ތިރީހަކަށް މީހުން އޭނާ ކައިރިން ހިދުމަތް ހޯދާ ކަމަށެވެ. އަދި އޭގެ ކޮންމެ ސެޝަނަކަށް 1،000ރ. ގެ މަގުން އޭނާ ނަގަމުން އަންނައިރު ދުވާލެއްގެ މައްޗަށް 30،000ރ. އަށް ވުރެ ބޮޑު އާމްދަނީއެއް އޭނާ ބުނާ ނިސްބަތުން ބަލާއިރު ލިބޭނެ އެވެ. އެއީ މަހެއްގެ މައްޗަށް 800،000 އެއްހާ ރުފިޔާ އެވެ.