ޓްރެފިކް ފުލުހުންގެ މަސައްކަތް ތަފާސްހިސާބުތަކުން އާންމުކުރަން ފަށައިފި

މާލެ ސަރަހައްދުގައި ޓްރެފިކް މައްސަލަތައް އިތުރުވި ނަމަވެސް އެކަށީގެންވާ ގޮތަކަށް އަޅާނުލައި ގިނަ ދުވަސްތަކެއް ވަންދެން ތިބުމަށް ފަހު، ރައީސް ޑރ. މުހައްމަދު މުއިއްޒުގެ އެންގެވުމާ އެކު ފެށި ޓްރެފިކް އޮޕަރޭޝަންތަކުގެ ތަފާސްހިސާބުތައް ފުލުހުން މިއަދު އާންމުކުރަން ފަށައިފި އެވެ.

މާލެ އާއި ހުޅުމާލޭގެ ޓްރެފިކް ހާލަތު ގޯސްވެފައިވާ ވަރު އެނގި، ހާއްސަ ފިޔަވަޅުތަކެއް ރައީސް މުއިއްޒު އިއުލާން ކުރެއްވީ މި މަހުގެ ފަސް ވަނަ ދުވަހުގެ ރޭ މެންދަމު ހުޅުމާލޭގައި ސްޕޯޓްސް ކާރަކާއި ސައިކަލެއް ޖެހި ހިނގި އެކްސިޑެންޓުގައި ޒުވާނަކު މަރުވުމުންނެވެ. ހުޅުމާލެ އިން ރޭސިން އަދި ޑްރިފްޓިން އަށް އެޗްޑީސީން ދީފައިވާ ހުއްދަ ބާތިލްކުރުމާ އެކު، ހަރުކަށި ފިޔަވަޅުތަކެއް ރައީސް ވަނީ އިއުލާން ކުރައްވައިފަ އެވެ. އޭގެ ތެރެއިން އިތުރު ފިޔަވަޅުތައް މިހާރު ވަނީ އަޅަން ފަށައިފަ އެވެ.

ފުލުހުން މިއަދު އާންމުކުރި ތަފާސްހިސާބުތަކުގެ ތެރޭގައި މިދިޔަ ހޯމަ ދުވަހާއި އިއްޔެ މަގުމަތީގެ ސަލާމަތާ ރައްކާތެރިކަމަށް މާލެ އާއި ހުޅުމާލޭގައި ކުރި މަސައްކަތްތައް ހިމެނެ އެވެ.

އެ ދެ ދުވަހު މާލޭގައި ހިންގި ޓްރެފިކް އޮޕަރޭޝަނުގައި 22 ސައިކަލާއި 10 ކާރެއް ހުއްޓުވައި ބެލި އެވެ. އޭގެ ތެރެއިން ތިން ކާރާއި 19 ސައިކަލު ދުއްވި މީހުންނަށް ފިޔަވަޅު އެޅުމުގެ ގޮތުން ސައިކަލު ވަނީ ޓޯކޮށްފަ އެވެ. އަދި ލައިސަންސް ނެތި ދެ ކާރާއި 15 ސައިކަލު ދުއްވައިގެން މީހުން ހުއްޓުވިއިރު، ނުރައްކާތެރިކޮށް ދުއްވި އުޅަނދުތައް ވެސް ހިފެހެއްޓި އެވެ.

މިދިޔަ އާދިއްތަ ދުވަހާއި ހޯމަ ދުވަހުގެ ހަވީރު 6:00 އާ ހަމައަށް ހުޅުމާލެ އިން 30 ކާރާއި 229 ސައިކަލް ހުއްޓުވައި ބަލައި ފާސްކުރި އެވެ. އޭގެ ތެރެއިން ފިޔަވަޅު އެޅީ ދެ ކާރާއި 53 ސައިކަލު ދުއްވި މީހަކަށެވެ. ލައިސެންސް ނެތި ސައިކަލު ދުއްވި 8 މައްސަލައަކާއި ނުރައްކާތެރިކޮށް ސައިކަލު ދުއްވި ފަސް މީހަކު ހިފެހެއްޓި އެވެ. ހުޅުމާލެ އިން ވަނީ ތިން ކާރާއި 14 ސައިކަލު ޓޯކޮށްފަ އެވެ.

މިދިޔަ ހޯމަ ދުވަހު ޓްރެފިކް ފުލުހުން މާލޭ ސަރަހައްދުގެ މަގުތަކަށް ނުކުމެ ބޮޑު އޮޕަރޭޝަނެއް ފެށީ ޓްރެފިކް މައްސަލަތައް ފާލުން ނެއްޓުމުންނެވެ. ނުރައްކާތެރިކޮށް ބާރަށް ސައިކަލު ދުއްވުމުގެ މައްސަލައަށް އިންތިހާއަށް އިތުރުވެފައިވާއިރު. މި ފަހުން ވަނީ އެކްސިޑެންޓުތައް ވެސް އިތުރުވެފަ އެވެ. މިދިޔަ ހަފުތާގެ ގެބަންދުގައި ހިނގި އެކްސިޑެންޓުތަކުގައި ދެ ޒުވާނަކު ވަނީ މަަރުވެފަ އެވެ.

ފުލުހުންގެ ވެބްސައިޓުގައި އާންމު ކޮށްފައިވާ ތަފާސްހިސާބުތައް ދައްކާ ގޮތުން މިދިޔަ އަހަރު އޮގަސްޓު މަހާ ހަމައަށް 1،476 އެކްސިޑެންޓެއް ހިނގި އެވެ. އޭގެ ތެރެއިން ގިނަ އެކްސިޑެންޓު މާލެ ސަރަހައްދުގައި ހިނގިއިރު 125 މީހަކަށް އަނިޔާވެ، ފަސް މީހަކު މަރުވި އެވެ.