ލޯ ސްކުއިންޓުވާ ނަމަ އަވަހަށް ފަރުވާ ހޯދާ!

ލޮލުގެ ކަޅި މިސް އެލައިންވެ، ދެ ކަޅި ދެ ދިމާލަށް ގޮސް ހުރުމަކީ ދިވެހިންގެ މެދުގައި ލޮލުގެ ވަރަށް އާއްމު މައްސަލައެކެވެ. މި މައްސަލަ އެންމެ ގިނައިން ކުރިމަތިވެފައި ހުންނަ ކަން ފާހަގަވަނީ ކުޑަކުދިންގެ އެވެ. ލޮލަށް ކުރިމަތިވާ މި މައްސަލައިގެ ނަމަކީ ސްޓްރެބިސްމަސް ނުވަތަ ސްކުއިންޓިން އެވެ.

ރާއްޖޭގައި ފުޅާދާއިރާއެއްގައި ލޮލުގެ ފަރުވާ ދެމުން އަންނަ އައިކެއާ ހޮސްޕިޓަލުގެ ކުޑަކުދިންގެ ލޮލުގެ ހާއްސަ ޑޮކްޓަރު އަރުޖުން މައްލާ ބާރި ވިދާޅުވީ މި މައްސަލައަކީ ކޮންމެ އުމުރެއްގައި ވެސް ދިމާވެދާނެ މައްސަލައެއް ކަމަށެވެ. އަދި މި މައްސަލަ ކުޑަކުދިންނަށް ކުރިމަތިވަނީ އުފެދުމުގައި ޖެނެޓިކަލް ޑީފެކްޓަކުން ކަމަށާއި އާއިލާގައި މި މައްސަލަ ހުންނަ ނަމަ ކުދިންނަށް މި މައްސަލަ ވާރުތަވުން އެކަށީގެންވާ ކަމަށް އޭނާ ވިދާޅުވި އެވެ.

ޑޮކްޓަރު ވިދާޅުވި ގޮތުގައި މި މައްސަލަ އަކީ ވީހާވެސް ތުއްތު އިރު ފަރުވާ ހޯދައިފި ނަމަ އެއްކޮށް ހައްލު ކުރެވިދާނެ މައްސައެކެވެ.

"އެންމެ ރަނގަޅީ މި މައްސަލަ ފާހަގަވުމުން ވީހާވެސް އަވަހަކަށް ޑޮކްޓަރަށް ދެއްކުން. ތުއްތު ކުއްޖާއަށް ތިން މަސްވުމުގެ ކުރިން ކޮންމެވެސް ވަރަކަށް ސްކުއިންޓުވެފައި ކަޅި ހުރުމަކީ އާއްމު ކަމެއް. އެކަމަކު ތިން މަހަށް ފަހު ވެސް، ސްކުއިންޓުވާކަން ފާހަގަވާ ނަމަ އަވަހަށް ޑޮކްޓަރަށް ދައްކަން ވާނެ." ޑޮކްޓަރު ވިދާޅުވި އެވެ.

ޑރ. އަރުޖުން ވިދާޅުވި ގޮތުގައި ސްކުއިންޓް ހުންނަ ކުޑަކުދިންގެ އެ މައްސަލަ އާއްމުކޮށް ފާހަގަވާނީ ފޮތް ކިޔަން ހުންނަ ވަގުތުތަކުގައި ނޫނީ ކުއްޖާ މާ ބޮޑަށް ވަރުބަލިވެފައި ހުންނަ ވަގުތުތަކުގަ އެވެ. އަދި މި މައްސަލަ ހުންނަ ކުދިން ވަކި ފަރާތަކަށް މާ ބޮޑަށް އަރިވެ އެއްޗިއްސަށް ބެލުމާއި އެއް ލޯ މަރައިގެން ތަންތަނަށް ބަލާ ހަދަ އެވެ.

ސްކުއިންޓުގެ މައްސަލައަށް ހައްލު ނުހޯދުމަކީ ލޮލުގެ އިތުރު މައްސަލަތައް ވެސް ކުރިމަތިވާ ކަމެކެވެ. އާއްމުކޮށް ފެނުމަށް ބަދަލު އައުމާއި "އެމްބްލިޔޯޕިއާ" (ލޭޒީ އައި)ގެ މައްސަލަ ވެސް ކުރިމަތިވެ އެވެ. މި މައްސަލައަކީ އެއް ލޮލުގެ ބާރު މާ ބޮޑަށް ދަށްވެ، އަމިއްލައަށް ކަޅި ލޮލުގެ އެތެރެ ފަރާތަށް ނުވަތަ ބޭރު ފަރާތަށް ދިއުމަށް ކިޔާ ނަމެކެވެ.

ޑރ. އަރުޖުން ވަނީ މި މައްސަލަ ފާހަގަވެއްޖެ ނަމަ ވީހާވެސް އަވަހަކަށް ޑޮކްޓަރަށް ދެއްކުމަށް ބާރު އަޅުއްވައިފަ އެވެ.

"މި މައްސަލައަކީ އަވަހަށް ފަރުވާ ހޯދައިފި ނަމަ ސާޖަރީއަކަށް ނުގޮސް ހައްލު ކުރެވޭނެ މައްސަލައެއް. އަދި އަވަހަށް ފަރުވާ ހޯދައިފި ނަމަ އެއްކޮށް ހައްލު ވެސް ކުރެވިދާނެ މައްސަލައެއް. މި މައްސަލައަށް ދޭ ފަރުވާ ބިނާ ވާނީ މައްސަލަ ކުރިމަތިވެފައި ހުރި މިންވަރަށް ބެލުމަށް ފަހު،" ޑރ. އަރުޖުން ވިދާޅުވި އެވެ.

ޑޮކްޓަރު ވިދާޅުވީ މި މައްސަލައަށް ދޭ ފަރުވާތަކުގެ ތެރޭގައި އައިނު ހެއްދުމާއި އައި ޕެޗު ތެރަޕީ އާއި ލޮލުގެ އެކްސަސައިޒްތައް ކުރުވުން ހިމެނެ އެވެ. އަދި ސްކުއިންޓިންގެ މައްސަލަ މާ ބޮޑަށް ގޯސްވެފައި ހުރި ނަމަ ސާޖަރީކުރަން ޖެހޭނެ ކަމަށް ޑޮކްޓަރު ވިދާޅުވި އެވެ.

އައިކެއާ ހޮސްޕިޓަލަކީ ލޮލުގެ ގިނަ ބަލިތަކަށް ފަރުވާ ދެމުން އަންނަ ތަނަކަށް ވާއިރު, ސްކުއިންޓިންއަށް ބޭނުންވާ ގިނަ ފަރުވާތައް މިތަނުން ދެ އެވެ. އަދި މިވަގުތު އެ ހޮސްޕިޓަލުން އަންނަނީ ސްކުއިންޓިންގެ މައްސަލައަށް ކުރާ ސާޖަރީ ފަށަން ވާން ޖެހޭ ތައްޔާރީތައް ވެސް ވަމުން ކަން ޑޮކްޓަރު އަރުޖުން ފާހަގަކުރެއްވި އެވެ.

ކުޑަކުދިންގެ އިތުރުން ބޮޑެތި މީހުންނަށް ވެސް މި މައްސަލަ ދިމާވާ އިރު، ބޮޑެތި މީހުންގެ މެދުގައި އާއްމު ކޮށް މި މައްސަލަ ދިމާވަނީ ލިބޭ ގެއްލުމެއްގެ ސަބަބުންނެވެ. ބޮޑެތި މީހުން މި މައްސަލަ ކުރިމަތިވާކަން ފާހަގަވުމުން ނުވަތަ ވިޝަން ޑަބަލްވާހެން ހީވުމުން ޑޮކްޓަރަށް ދައްކަން ވާނެ އެވެ.

ލޮލުގެ މައްސަލަތަކަކީ އަޅާނުލައި ދޫކޮށްލައިފި ނަމަ ލިބޭ ގެއްލުން ބޮޑުވާނެ ކަމެއް ކަމަށް ޑރ. އަރުޖުން ފާހަގަކުރައްވަ އެވެ. ޑޮކްޓަރުގެ އިރުޝާދަކީ ލޮލުގެ ކޮންމެ މައްސަލައެއް ކުރިމަތިވުމުން ވެސް ލަސްނުކޮށް ޑޮކްޓަރެއްގެ ލަފަޔާއި އިރުޝާދު ހޯދައި ބަލީގެ ފަރުވާ އަވަސްކުރުމެވެ.

ނޯޓު: މިއީ އައިކެއާގެ އެޑްވަޓޯރިއަލް އާޓިކަލެކެވެ.