ލޮލަށް ފުސް އެރުމުގެ ހައްލަށް ބޭނުންވާ ސާޖަރީ އައިކެއާއިން

ލޯ ފުސްވުން ނުވަތަ ކެޓެރެކްޓް އަކީ ގިނަ ބަޔަކަށް ކުރިމަތިވާ ލޮލުގެ މައްސަލައެކެވެ. އާއްމުކޮށް އުމުރުން 55 އަހަރުން މަތީގެ މީހުންނަށް ކުރިމަތިވާ މި މައްސަލައިގެ ސަބަބުން ސާފުކޮށް ފެނުމަށް ދަތިވެ, ފުސްވެ އެވެ. ރޭގަނޑު ތަންތަން ފެނުމަށް ދަތިވެ, އަލި އެޅުމުން އުނދަގޫ އިހުސާސް ކުރެވި, ކުލަތައް ފެންނަ ވަރު ފަނޑުވެ, ފެނުމަށް ބޮޑެތި އަސަރުތަކެއް ކުރެ އެވެ.

އައިކެއާގެ ލޮލުގެ ބަލިތަކަށް ހާއްސަ ޑރ. މުހައްމަދު އައްޒާމް ވިދާޅުވީ، ލޮލަށް ފުސްއެރުމުގެ މައްސަލަ އަކީ ތައިރޮއިޑާއި ހަކުރު ބަލި ފަދަ މައްސަލަތައް ހުންނަ މީހުންގެ މެދުގައި އާއްމު މައްސަލައެއް ކަމަށެވެ. މިއީ އާއްމުކޮށް އުމުރުން ދޮށީ މީހުންނަށް ކުރިމަތިވާ މައްސަލައެއް ކަމަށާއި މި މައްސަލަ އަށް އޮތް އެންމެ ރަނގަޅު ފަރުވާ އަކީ ކެޓެރެކްޓް ސާޖަރީ ހަދައި އާޓިފިޝަލް ލެންސެއް ލެއްވުން ކަމަށް އޭނާ ވިދާޅުވި އެވެ.

ޑރ. އައްޒާމް ވިދާޅުވި ގޮތުގައި މި މައްސަލަ ހުންނަ މީހަކު ސާޖަރީ ހަދަން ޑޮކްޓަރު ނިންމާނީ ވެސް ވަރަށް ރަނގަޅަށް ލޮލުގެ ފެނުމާއި ފުސް އަރާފައި ހުރި ވަރު ބަލައި ދެނެގަތުމަށް ފަހު އެވެ. ސާޖަރީއާ ގުޅޭ ގޮތުން ބަލިމީހާ އަށް ދޭން ޖެހޭ ހުރިހާ މައުލޫމާތުތަކެއް ހިއްސާކޮށް, އެންމެ ރަނގަޅު އޮޕްޝަންތައް ކިޔައިދޭނެ ކަމަށް ވިދާޅުވި އެވެ.

"އަޅުގަނޑުމެން މި ސާޖަރީގައި ލައްވާ އާޓިފިޝަލް ލެންސުގެ އެކި ވައްތަރުތައް އައިކެއާގައި ހުރޭ. އޭގެ ތެރޭގައި އެންމެ ސްޓޭންޑާޑް ލެންސުން ފެށިގެން ޕްރިމިއަމް ލެންސުތައް އެބަހުރި. ލެންސު ހިޔާރުކުރުމުގައި ޕޭޝަންޓުގެ ލޮލުގެ އިތުރު މައްސަލައެއް ހުރިތޯ ދެނެގަނެ, ޕޭޝަންޓުގެ ލައިފްސްޓައިލް ހުންނަ ގޮތަށް ބެލުމަށް ފަހު, އެންމެ ރަނގަޅު ލެންސުތަކުގެ އޮޕްޝަންސް އަޅުގަނޑުމެން ދެނީ،" އައްޒާމް ވިދާޅުވި އެވެ.

ޑޮކްޓަރު ވިދާޅުވި ގޮތުގައި ޕްރިމިއަމް ލެންސުތަކުގެ ތެރޭގައި ސްޕެޝަލް ފިލްޓާސް ހުންނަ ވައްތަރަކާއި އޮޕޭސިޓީ ނާރާ ވައްތަރަކާއި ޑިސްޓެންސް އަދި އިންޓަމީޑިއެޓް ވިޝަން ފެންނަ ވައްތަރަކާއި ޓްރައިފޯކަލް ލެންސު ވެސް ހިމެނޭ ކަމަށެވެ.

މި ސާޖަރީގައި ބޭނުންކުރާ ލެންސުތައް އެކި އަގުތަކުގައި ހުރެ އެވެ.

ލޮލުގެ ސާޖަރީއެއް ހަދަން ޖެހުމަކީ ގިނަ ބަޔަކު ކަންބޮޑުވާ ކަމެކެވެ. ސާޖަރީއަށް ވަގުތު ހޭދަކުރަން ޖެހުމާއި ލޮލުގައި ބޭސް އަޅައިގެން އުޅުމަކީ ވެސް ދަތިކަމަކަށް ވެސް ވެ އެވެ.

ޑރ. އައްޒާމް ވިދާޅުވީ އައިކެއާއިން ކެޓެރެކް ރިމޫވް ކުރުމަށް ހަދާ ސާޖަރީ އަކީ އެންމެ ފަހުގެ ޓެކްނޮލަޖީއާ އެކު، ނޮން އިންވޭސިވްކޮށް ހަދާ ސާޖަރީއެއް ކަމަށެވެ.

"މި ސާޖަރީ ހެދުމަށް ހޭދަވާނީ 10 ވަރަކަށް މިނިޓު. މި ސާޖަރީ ހަދާއިރު އެއްވެސް ތަދެއް އިހުސާސެއް ނުކުރެވޭނެ. ސާޖަރީ އަށް ފަހު ލޮލުގައި ބޭހެއް އަޅާކަށް ނުޖެހޭނެ. އަޅުގަނޑުމެން އަލްޓްރާ ސައުންޑް ޓެކްނޮލަޖީ ބޭނުންކޮށްގެން ލޭޒާއިން ފުސްކަހާލުމަށް ފަހު އޮޅާލާފައި އޮންނަ އާޓިފިޝަލް ލެންސެއް ލައްވާލާނީ. މި ލެންސު އަމިއްލައަށް ލޮލަށް އެޖަސްޓު ވާނެ. އެ ދުވަހު ވެސް ސާޖަރީގެ ރިޒަލްޓް ފެންނަން ފަށާނެ، ޑޮކްޓަރު ވިދާޅުވި އެވެ.

އޭނާ ވިދާޅުވީ މި ސާޖަރީ އަކީ މި މައްސަލައަށް އޮތް ދާއިމީ ހައްލެއް ކަމަށާއި ލެންސު ލެއްވުމަށް ފަހު, ލެންސު ބަދަލުކުރަން ޖެހުމާއި ފުސް އެރުން އަލުން ކުރިމަތިވުން ފަދަ މައްސަލައެއް ދިމާނުވާނެ ކަމަށެވެ.

ލޮލުގެ އެކި މައްސަލަތަކަކީ އުމުރުން ދޮށީ މީހުންގެ މެދުގައި އާއްމު ކަމަކަށް ވާއިރު, ލޮލުގެ ޗެކަޕްތައް ހަދަން ޖެހޭ ގަވާއިދުތަކުން ހެދުމަށް ޑރ. އައްޒާމް ބާރު އެޅުއްވި އެވެ.

ކެޓެރެކްޓް ސާޖަރީ ފަދަ އެކި ލޮލުގެ ސާޖަރީތަކާއި ލޮލުގެ އެކި ބަލިތަކުގެ ޗެކަޕްތައް އައިކެއާ ހޮސްޕިޓަލުން ހެދޭނެ އެވެ.

ނޯޓު: މިއީ އައިކެއާގެ އެޑްވަޓޯރިއަލް އާޓިކަލް އެކެވެ.