ޖިމިން އާއި ޖަންކޫކްގެ ވްލޮގްގެ ޓްރެއިލާ އާންމުކޮށްފި

ދެކުނު ކޮރެއާގެ މަޝްހޫރު ބޯއީ ބޭންޑް "ބީޓީއެސް"ގެ ދެ ލަވަކިޔުންތެރިން ކަމަށްވާ ޖިމިން އާއި ޖަންކޫކްގެ ޓްރެވަލް ވްލޮގްގެ ޓްރެއިލާ އާންމުކޮށްފި އެވެ.

ޖިމިން އާއި ޖަންކޫކްގެ "އާ ޔޫ ޝުއާ؟" އަކީ އެ ދެމީހުންގެ ދުނިޔޭގެ އެކި ތަންތަނަށް ކުރި ދަތުރުތައް ޑޮކިއުމެންޓްކޮށް ގެނެސްދޭ ވީލޮގްއެކެވެ.

އެ ވްލޮގްގައި ދައްކާނީ ޖިމިން އާއި ޖަންކޫކްގެ އެމެރިކާ ދަތުރާއި ކޮރެއާގެ ރަށެއް ކަމަށްވާ ޖެޖުއަށް ކުރި ދަތުރާއި ޖަޕާނުގެ ސިޓީއެއް ކަމަށްވާ ސަޕޯރޯގައި އެމީހުން ހޭދަކުރި ދުވަސްތަކުގައި ކުރި ކަންކަމެވެ.

ޓްރެއިލާއިން ފެންނަ ގޮތުގައި، ޖިމިން އާއި ޖަންކޫކްގެ އެ ދަތުރުގައި އެމީހުން އެކި ކަންކަމުގައި ބައިވެރިވެ އެވެ. އޭގެ ތެރޭގައި މަހަށް ދިއުމާއި ސްނޯގައި ސްކީންއަށް ދިއުމާއި ބޯޓު ދުއްވަން ދިއުމާއި ސުޕަމާޓުތަކުން ވިޔަފާރިކުރުން ކަހަލަ އެކި ކަންކަން ކުރެ އެވެ.

ޑިޒްނީ ޕްލަސް އިން ގެނެސްދޭ "އާ ޔޫ ޝުއާ؟" ސްޓްރީމް ކުރަން ފަށަނީ އަންނަ މަހު އަށެއްގަ އެވެ.