އެސްޓީއޯގެ ހޮޓެލް ސަރުކާރަށް ނަގައި، އެތަނުން ބައެއް މީޑިއާތަކަށް ދެނީ

އެސްޓީއޯ އިން ހުޅުމާލޭގައި ހަދަން ފެށުމަށްފަހު ހުއްޓިފައި އޮތް ހޮޓެލްގެ ބައެއް މީޑިއާތަކަށް ހާއްސަކުރަން ނިންމާފައިވާ ކަން ރައީސް ޑރ. މުހައްމަދު މުއިއްޒު އިއުލާން ކުރައްވައިފި އެވެ.

މީޑިއާތަކަށް ހާއްސަ އޮފީސް އިމާރާތެއް ހިމެނޭހެން މީޑިއާ ވިލެޖެއް ގާއިމް ކުރުމަކީ ރައީސްގެ ވައުދުފުޅެކެވެ.

މިނިވަން ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މީޑިއާ ވިލެޖް ގާއިމް ކުރާނެ ގޮތް ކެބިނެޓުން ނިންމާފައިވާ ކަމަށާއި އެކަން ކުރަން ނިންމާފައިވަނީ އެސްޓީއޯ އިން ހަދަން ފަށައި، ނުނިމި ހުރި ހޮޓެލްގައި ކަމަށެވެ.

"އެ ތަން މިހާރު އެ ވަނީ ސަރުކާރަށް ނަގާފައި. އެ ތަނުގެ ބައެއް ފްލޯތައް ހާއްސަ ކުރެވެނީ މީޑިއާ ވިލެޖް ގާއިމް ކުރަން. ކޮންމެ މީޑިއާއަކަށް ހަމަޖެހޭ އުސޫލަކުން ވަރަށް ކުޑަ އަގެއްގައި އެމީހުންގެ އޮފީސް ހިންގަން އެތަނުން ޖާގަ ދޫކުރާނަން،" ރައީސް ވިދާޅުވި އެވެ.

"ފެންވަރު ރަނގަޅު އެކި ފެންވަރުގެ ސްޓޫޑިއޯތައް އެ ތަނުގައި ހަދާނަން. ޓީވީ ސްޓޭޝަންތަކަށް ބޭނުންވާ ޕްރޮޑަކްޝަން ޖާގަ އާއި ވަސީލަތްތައް ފޯރުކޮށްދޭނަން. މީޑިއާތަކަށް ދުވަހަކު ވެސް ނުލިބޭހާ ރަނުގެ ފުރުސަތުތައް އެ ތަނުން ހަމަޖައްސައިދޭނަން."

ރައީސް ވިދާޅުވި ގޮތުގައި މީޑިއާ ވިލެޖްގެ މަސައްކަތް ކުރިއަށް އޮތް އެއް އަހަރު ތެރޭ ނިންމައިލެވޭނެ އެވެ.

އެސްޓީއޯ އިން ހުޅުމާލޭގައި އަޅަން ފެށި ބޮޑު ހޮޓެލްގެ މަޝްރޫއުއަކީ އެ ކުންފުނިން ވަރަށް އުއްމީދާ އެކު ފެށި މަޝްރޫއުއެއް ނަމަވެސް، ފައިސާގެ އެކި މައްސަލަތައް ކުރިމަތިވެ، އެ މަސައްކަތް ހުއްޓިފައި އޮންނަތާ އެތައް އަހަރެއް ވަނީ ވެފަ އެވެ. ހުޅުމާލޭގެ އެ ބޮޑު ބިން އޮތީ ބޭނުމެއް ނުކުރެވި އެވެ.

މީޑިއާ ވިލެޖު ގާއިމްކޮށް ދެއްވާނެ ކަމަށް ރައީސް ވައުދުވެ ވަޑައިގަތީ، އިންތިހާބުވުމަށް ފަހު ނޫސްވެރިންނާ އެކު ބޭއްވި ގުންޒަރުގަ އެވެ.

މީޑިއާ ވިލެޖެއް ތަރައްގީކޮށް ދެއްވާނެ ކަމަށް ރައީސް ވިދާޅުވީ ބޮޑު އަގުގައި ތަންތަން ކުއްޔަށް ހިފައިގެން އޮފީސް ހިންގަން ޖެހުމުން މީޑިއާތަކަށް މާލީ ގޮތުން ގޮންޖެހުންތަކާ ކުރިމަތިލާން ޖެހޭ ކަމުގެ ކަންބޮޑުވުން މީޑިއާތަކުން ފާޅުކޮށްފައި ވާތީ އެވެ.