އެންމެ ރަނގަޅު ގޮތަކީ ޒިންމާ ނަންގަވައި ގަވަރުނަރު އިސްތިއުފާ ދެއްވުން: ތޯރިގު

ގައުމުގެ އިގުތިސާދީ ހާލަތު ގޯސްވިއިރު، އެމްއެމްއޭގެ ގަވަރުނަރު އަލީ ހާޝިމް އެއްވެސް ކަމެއް ނުކުރެއްވުމުން މިހާރު އެންމެ ރަނގަޅު ގޮތަކީ އެކަމުގެ ޒިންމާ ނަންގަވައި އަމިއްލަ އަށް އިސްތިއުފާ ދެއްވުން ކަމަށް މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) މިއަދު ވިދާޅުވެއްޖެ އެވެ.

އަލީ ހާޝިމް މަގާމުން ވަކިކުރަން ރައީސް ޑރ. މުހައްމަދު މުއިއްޒަށް ލަފާ އެރުވުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމި ނިންމުމަށް މިއަދު މަޖިލީހުގެ ތަޅުމުގައި ބަހުސް ކުރައްވަމުން ޓޮމް ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 7.7 ބިލިއަން ރުފިޔާ ޗާޕު ކޮށްފައިވާ ކަމަށާއި އޭގެ ތެރެއިން ހަ ބިލިއަން ރުފިޔާ ކުޑަ އިންޓްރަސްޓް ރޭޓެއްގައި 50 އަހަރުން ދައްކާ ގޮތަށް ބަދަލު ކޮށްފައިވާ ކަމަށެވެ.

އޭގެ އިތުރުން ޖީޑީޕީ ޑެބްޓް ރޭޝިއޯ 60 ޕަސެންޓުގައި ހިފަހައްޓަން ޖެހޭ އިރު، އެ އަދަދު 120 ޕަސެންޓަށް އަރައިގެން ދިޔަ ކަމަށް ޓޮމް ވިދާޅުވި އެވެ.

އެ ހުރިހާ ކަމެއް ކުރި އިރު ގަވަރުނަރު އެއްވެސް ކަމެއް ނުކުރައްވައި "މަޑުމަޑުން ހުންނެވި" ކަމަށް ޓޮމް ވިދާޅުވި އެވެ.

"މާލިއްޔަތު ކޮމިޓީން މިހާރު ވެސް ލަފާ ދީފައި ވަނީ ގަވަރުނަރު ވަކިކުރަން ރައީސަށް ލަފާ ދޭން. އެންމެ ރަނގަޅު ގޮތަކީ ޒިންމާ އަދާ ނުކުރެވުނު ކަމަށް ބަލައި ގަވަރުނަރު އިސްތިއުފާ ދިނުން،" ޓޮމް ވިދާޅުވި އެވެ.

އޭނާ ވިދާޅުވި ގޮތުގައި ރާއްޖޭގެ އިގްތިސާދަށް ލިބިފައިވާ ގެއްލުމުގެ ޒިންމާ ގަވަރުނަރުގެ އިތުރުން އެމްޑީޕީގެ ސަރުކާރުން ވެސް ނަގަން ޖެހެ އެވެ.

ކޮވިޑް-19 ގެ ހާލަތު އޮތް އިރު އޭރުގެ ސަރުކާރުން މާލީ ކަންކަން ކުރަމުން ދިޔަ ގޮތުގެ ވާހަކަ އިދިކޮޅު ޕާޓީއެއްގެ ގޮތުގައި މަޖިލީހުގައި ތިއްބަވައިގެން ދައްކަވާފައިވާ ކަމަށާއި އެ މައްސަލައިގެ ތެރެއަށް ގަވަރުނަރު ވަނުމަށް ވެސް ގޮވާލި ކަމަށް ޓޮމް ވިދާޅުވި އެވެ.

ނަމަވެސް ގައުމު ބަނގުރޫޓުވާ ހިސާބަށް މިހާރު ގޮސްފައި ވަނީ އެމްޑީޕީ ސަރުކާރުގައި ގޯސް ނިންމުންތަކަށް ގަވަރުނަރު އަޅާ ނުލައްވައި ހުންނެވުމުގެ ސަބަބުން ކަމަށް ޓޮމް ވިދާޅުވި އެވެ.

ގަވަރުނަރުގެ މަގާމުން އަލީ ހާޝިމް ވަކިކުރުމުގެ މައްސަލަ ރައްޔިތުންގެ މަޖިލިހަށް ހުށަހެޅުއްވީ މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމެވެ.

ގަވަރުނަރު ވިދާޅުވީ މައްސަލަ ދިމާވީ ލަފާތަކަށް ކުރީގެ ސަރުކާރުން އަމަލު ނުކުރުމުން ކަމަށް

ނާޒިމާއި މަޖިލިހުގެ ބައެއް މެމްބަރުންގެ ތުހުމަތުތައް ރައްދު ދެއްވައި ގަވަރުނަރު މަޖިލިހަށް ފޮނުއްވީ ރިޕޯޓެކެވެ.

އެ ރިޕޯޓުގައި މައިގަނޑު ގޮތެއްގައި ގަވަރުނަރު ވިދާޅުވީ، އިގުތިސާދީ ކާރިސާއެއްގެ ބިރު މިހާރު ބޮޑުވެފައިވަނީ އެމްއެމްއޭ އާއި އެހެން ބައިނަލްއަގްވާމީ މާލީ އިދާރާތަކުން ދެމުންދިޔަ އިރުޝާދުތަކާއި ލަފާތަކަށް ވޭތުވެދިޔަ އަހަރުތަކުގައި ސަރުކާރުން އަހަމިއްޔަތު ކަން ނުދިނުމުގެ ސަބަބުން ކަމަށެވެ.

ގަވަރުނަރު އަލީ ހާޝިމް ވިދާޅުވީ، އިގުތިސާދީ ކާރިސާއެއް އައުމުގެ ކުރިން އެފަދަ ހާލަތަކުން ގައުމު ސަލާމަތް ކުރަން ބޭނުންވާ މައުލޫމާތާއި އިރުޝާދާއި އެހީ އެމްއެމްއޭ އިން ފޯރުކޮށްދީފައިވާނެ ކަމަށެވެ. މިހާރު ވެސް މަސައްކަތް ކުރަމުން އަންނަނީ އިގުތިސާދަށް މިވަގުތު ދިމާވެފައިވާ ގޮންޖެހުންތަކަށް ވިސްނުންތެރިކަމާ އެކީ ކުރިމަތިލުމަށް ކަމަށް ގަވަރުނަރުގެ ރިޕޯޓްގައި ވެ އެވެ.

"ވޭތުވެދިޔަ ދެ އަހަރުގެ ތެރޭގައި އެކަނިވެސް ރައްޔިތުންގެ މަޖިލީހުގެ މާލިއްޔަތު ކޮމިޓީގައި ބޭއްވުނު މަޝްވަރާތަކުން އިގުތިސާދަށް ނުރައްކާތައް ހުރި ކަމާއި އެ ނުރައްކާތަކުން އިގުތިސާދު ސަލާމަތް ކުރުމަށްޓަކައި އަޅަންޖެހޭ ފިޔަވަޅުތައް އެޅުމުގެ މުހިންމުކަން ސަރުކާރާއި ކަމާބެހޭ އެހެން ފަރާތްތަކާ ހިއްސާ ކޮށްފައިވާނެ،" ރިޕޯޓްގައި ފާހަގަކޮށްފައިވެ އެވެ.