ސަރުކާރުގެ ޑިވަލޮޕްމަންޓު ބޭންކުގައި ބައިވެރިވުމަށް އެސްޓީއޯއިން ވިސްނަނީ

ސަރުކާރުން މިދިޔަ މެއި މަހު އުފެއްދި ޑިވެލޮޕްމެންްޓު ބޭންކުގައި އެސްޓީއޯ އިން ބައިވެރިވުމުގެ ފުރުސަތު ލިބިފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެ އެވެ.

ރޭ ބޭއްވި އެ ކުންފުނީގެ އަހަރީ އާއްމު ޖަލްސާގައި ކުންފުނީގެ ހިއްސާދާރަކު ކުރި ސުވާލަކަށް ޖަވާބު ދެއްވަމުން ޝިމްހާދު ވިދާޅުވީ އެ ކުންފުނިން ތަރައްގީކުރަން ނިންމާފައިވާ ޑިޖިޓަލް ބޭންކުގެ ބަދަލުގައި ޑިވެލޮޕްމެންްޓު ބޭންކުގައި ބައިވެރިވުމުގެ ފުރުސަތު ލިބިފައިވާ ކަމަށެވެ.

އަދި އެ ކުންފުނިން މި ވަގުތު މަސައްކަތް ކުރަމުން ދަނީ އެ ކުންފުންޏަަށް އެންމެ ރަނގަޅީ އަމިއްލަ ބޭންކެއް ތަރައްގީކުރުންތޯ ނުވަތަ އެހެން ބޭންކެއްގައި ބައިވެރިވުންތޯ ދެނެގަތުމަށް ކަމަށް އޭނާ ވިދާޅުވި އެވެ.

އެސްޓީއޯއިން 'އިވޯލްވް'ގެ ނަމުގައި ޑިޖިޓަލް ބޭންކެއް ހެދުމުގެ ހުއްދައަށް އެދި ހެށަހެޅީ 2021 ވަނަ އަހަރު ސެޕްޓެމްބަރު މަހު އެވެ. އެމްއެމްއޭއިން އެސްޓީއޯގެ ހުށަހެޅުމަށް ހުއްދަ ނުދޭން ނިންމީ 2022 ވަނަ އަހަރުގެ ޖެނުއަރީ މަހު އެވެ.

އޭގެ ފަހުން މިކަމާ ގުޅޭ އިތުރު މައުލޫމާތު އެސްޓީއޯއިން ހިއްސާކޮށްފަ އެއް ނުވެ އެވެ.