ޒުވާން ހޭންޑްބޯޅަ ދެ ޓީމު ވެސް މޮޅުވެ އިތުބާރު ހޯދައިފި

އައިއެޗްއެފް ޓްރޮފީގައި ވާދަކުރާ ރާއްޖޭގެ 18 އަހަރުން ދަށާއި 20 އަހަރުން ދަށުގެ ގައުމީ ހޭންޑްބޯޅަ ޓީމު ކުޅުނު ފުރަތަމަ މެޗުތައް ކާމިޔާބުކޮށްފި އެވެ.

އިންޑިއާގެ ޖައިޕޫރުގެ ސަވާއީ މަން ސިންގް އިންޑޯ ސްޓޭޑިއަމްގައި އިއްޔެ ފެށި އައިއެޗްއެފް ޓްރޮފީ މުބާރާތުގައި ރާއްޖެ ހިމެނެނީ ޒޯން 2 ގަ އެވެ. މި ޒޯންގައި ރާއްޖެ ވާދަކުރަން ޖެހެނީ ނޭޕާލްގެ އިތުރުން އިންޑިއާ އާއި ބަންގްލަދޭޝްއާ އެވެ.

އެންމެ ފުރަތަމަ ކުޅުނު 18 އަހަރުން ދަށުގެ މެޗުގައި ރާއްޖޭން މޮޅުވީ ނޭޕާލާ ވާދަކޮށް 36-31 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ދިވެހި ޓީމުގެ ޝަހީމް ލަހުފާން އަހުމަދު އެވެ.

ވިހި އަހަރުން ދަށުގެ ޓީމުން ނޭޕާލް ބަލިކުރީ 30-28 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ދިވެހި ޓީމުގެ ގޯލްކީޕަރު ހުސެއިން ޔަނާލް އަކްރަމް އެވެ.

ދެ ވަނަ މެޗުގައި މިއަދު ދެ ޓީމު ވެސް އިންޑިއާއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ހުކުރު ދުވަހު ނުކުންނާނީ ބަންގްލަދޭޝްއާ ދެކޮޅަށެވެ. ލީގު ބުރުގައި ރޭންކިންގެ ގަދަ ދެ ޓީމު ފައިނަލް ކުޅެން ހަމަޖެހިފައި ވާއިރު، ތިން ވަނަ އަދި ހަތަރު ވަނައިގައި ނިންމާ ޓީމަށް އޮންނާނީ ތިން ވަނަ ހޮވާ މެޗެވެ.

މިދިޔަ އަހަރު ރާއްޖޭގެ 17 އަހަރުން ދަށާއި 19 އަހަރުން ދަށުގެ އަންހެން ޓީމު ވަނީ އައިއެޗްއެފް ޓްރޮފީގައި ވާދަކޮށްފަ އެވެ. ދެ ޓީމު ވެސް ވަނީ ނޭޕާލާ ވާދަކޮށް މޮޅުވެގެން ތިން ވަނަ ހޯދައިފަ އެވެ.