ސަލާމަތީ ފިޔަވަޅުތައް ވަރުގަދަކޮށް ބަންގްލަދޭޝްގެ ލޭބަރުން ގެނައުމަށް އޮތް ލިމިޓު އުވާލަން ހުށަހަޅަނީ

ސަލާމަތީ ފިޔަވަޅުތައް ވަރުގަދަކޮށް، ރާއްޖެއަށް ބަންގްލަދޭޝްގެ ލޭބަރުން ގެނައުމަށް ގާނޫނުން މިހާރު ކަނޑައަޅާފައި އޮތް 100،000 މީހުންގެ ލިމިޓު އުވާލަން ރައްޔިތުންގެ މަޖިލީހަށް ހުށަހަޅާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީގައި އިހުސާން ވިދާޅުވީ މި ވަގުތު ރާއްޖޭގައި އޮތް ލޭބަރުންގެ ޑިމާންޑާއި ކުރިއަށް އޮތް ތަނަށް އަންދާޒާކުރެވޭ ޑިމާންޑަށް ބަލާއިރުގައި، ބަންގްލަދޭޝްގެ 100،000 ލޭބަރުންގެ ލިމިޓަކީ އުވާލަން ޖެހޭ ނިންމުމެއް ކަމަށް އޭނާ ދެކިވަޑައިގަންނަވާ ކަމަށެވެ.

އިހުސާން އެގޮތަށް ވިދާޅުވީ، ބަންގްލަދޭޝްގެ ލޭބަރުން ގެނައުމަށް ވަކި ލިމިޑެޓެއް ކަނޑައަޅާފައި އޮތް ސަބަބާއި އެއީ ވަކި ގައުމެއްގެ ބަޔަކަށް ތަފާތުކުރުން ނޫންތޯ ކޮމެޓީގެ މެމްބަރު އަދި މާފަންނު އުތުރު ދާއިރާގެ މެމްބަރު މުހައްމަދު ނާޒިމް ކުރެއްވި ސުވާލަށް ދެއްވި ޖަވާބުގަ އެވެ.

ނަމަވެސް އެ ލިމިޓު އުވާލަން ވާނީ އިތުރު ފިޔަވަޅުތަކެއް އެޅުމަށް ފަހުގައި ކަމަށާއި އެހެން ނޫން ނަމަ އެއީ ކުރަން ރަނގަޅު ކަމެއް ކަމަށް އޭނާ ގަބޫލު ނުކުރައްވާ ކަމަށް ވެސް އިހުސާން ވިދާޅުވި އެވެ.

"ފުރަތަމަ ކަމަކީ އަޅުގަނޑުމެން ސިސްޓަމަށް މި ގެންނަ ބަދަލުތައް ގެނެސް 100 ޕަސެންޓް ބަޔޮމެޓްރިކަލީ އެކައުންޓެބަލް ކުރެވޭ ގޮތަށް މިކަން ކުރެވުނީމަ އަޅުގަނޑުމެންނަށް އެއަށް އެލައުކުރަން ބޮޑަށް ގަބޫލުކުރަން ފަސޭހަވާނީ،" އިހުސާން ވިދާޅުވި އެވެ.

"ހަމައެއާ އެކު ރަށްރަށަށް ގެންދެވޭ މީހުންނަށް މިހާރު ވޯކް ޕާމިޓް މި ދެވެނީ މުޅި ރާއްޖެއަށް. އޭގެ ބަދަލުގައި ރަށްރަށަށް ގެންދާ މީހާ، ރަށު ކައުންސިލުން ވެސް އެންޑޯޒްކުރާ ޕާމިޓަކަށް ވުން އެއީ މީގެ ދާއިމީ ހައްލަކަށް ވާނީ."

އިހުސާން ވިދާޅުވި ގޮތުގައި، ބަންގުލަދޭޝް ލޭބަރުންގެ ލިމިޓު އުވާލުން ބަރޯސާވަނީ ދެ ކަމަކަށެވެ.

"އެއީ، ސިސްޓަމަށް ބަދަލުތައް ގެނައުން. އެކަން ކުރިއަށް އޮތް ތިން ހަފުތާގެ ތެރޭގައި ނިންމާނަން،" އޭނާ ވިދާޅުވި އެވެ.

"ހަމައެއާއެކު [ބޯޑަރު] ހުޅުވާލުމާ އެކު މި ދަންނަވާ 100،000 މީހުން ލިމިޓު ހަމަވާނެ. އެހެން ވެއްޖެއްޔާ ދެން އަޅުގަނޑުމެން މަޖިލީހަށް ރިކޮމެންޑްކުރާނަން އެ ލިމިޓު ނަގައިދޭށޭ. އެކަމަކު އެ ނަގައިދޭނީ މި ދެންނެވި ސޭފްގާޑް މެޝާސްތައް އަޅުގަނޑުމެން އަޅާ ނިމުނީމަ."

އިހުސާން ވިދާޅުވި ގޮތުގައި ބޯޑާ ކޮންޓްރޯލް ސިސްޓަމާއި އެކްސްޕަރިޓޭޑް ސިސްޓަމް މެދުވެރިކޮށް ބެލި ބެލުމުން ރާއްޖޭގައި މި ވަގުތު 90،624 ބަންގުލަދޭޝްގެ މަސައްކަތްތެރިން އެބަ ތިއްބެވެ.

އޭނާ ވިދާޅުވި ގޮތުގައި، 100،000 މީހުންގެ ލިމިޓު ހަމަވާން ބާކީ 9،000 ޖާގަ އޮތުމުން އެ އަދަދަށް މީހުން ގެންނަން ވެސް ސަރުކާރުން ހުއްދަ ދިނެވެ. ނަމަވެސް، އޭގެ ނާޖާއިޒު ފައިދާ ވަނީ ނަގައިފަ އެވެ.

"[9،000 މީހުން ގެންނަން] އެލައުކުރުމުން ކުއްލިއަކަށް ފާހަގަކުރެވުނީ ކުރިން ބްލެކް ލިސްޓުކޮށްފައި ހުރި ބައެއް ކުންފުނިތަކަށް ދީފައި ހުރި ކޯޓާތަކަށް ގަވާއިދާ ހިލާފަށް ބޭރު މީހުން އެތެރެކުރަމުން އައިތަން. އެތެރެކުރެވުނީ ސިސްޓަމެޓިކަލީ ރަނގަޅަށް، ނަމަވެސް އެ މީހުން މާލެ ގެނެސްފައި މަގުމައްޗަށް ދޫކޮށްލަނީ. މި މައްސަލަ ފާހަގަވި ހިސާބުން ބޯޑަރު އެއްކޮށް ބަންދުކުރީ،" އޭނާ ވިދާޅުވި އެވެ.

"އެހެންވީމާ ދާއިމީ ގޮތެއްގައި އަޅުގަނޑުމެންނަށް ލޮކެއް އަޅުވާނުލެވެނީސް ބޯޑަރު ހުޅުވާލަން ބޭނުންނުވީ."

އިހުސާން ވިދާޅުވީ އެ ކުންފުނިތަކުގެ މައްސަލަ ފުލުހުން މިހާރު ތަހުގީގުކުރަމުން އަންނަ ކަމަށެވެ.

ރާއްޖޭގައި 280،000 އަށް ވުރެ ގިނަ ބިދޭސީ މަސައްކަތްތެރިން އުޅޭއިރު، އޭގެ ތެރޭގައި އެންމެ ގިނައީ ބަންގްލަދޭޝްގެ މީހުންނެވެ.