ސެވިއްޔާ އަށް ހަނި މޮޅެއް، ޔުވެންޓަސް ކުއާޓާއާ ގާތަށް

ލިސްބަން، ޕޯޗުގަލް (ފެބްރުއަރީ 23) - ޗެމްޕިއަންސް ލީގުގެ ދެ ވަނަ ބުރުގައި ރޭ އިނގިރޭސި ޗެމްޕިއަން ލެސްޓާ ސިޓީ އަތުން 2-1 އިން ސެވިއްޔާ އިން ހަނިމޮޅެއް ހޯދިއިރު، ރަށުންބޭރުގައި ޕޯޓޯ އަތުން 2-0 އިން މޮޅުވެ ޔުވެންޓަސް މުބާރާތުގެ ކުއާޓާ ފައިނަލާ ގާތަށް ޖެހިލައިފި އެވެ.

ރޭގެ މެޗުގައި ލީޑު ނަގަން ސެވިއްޔާ އަށް ލިބުނު ފުރަތަމަ ފުރުސަތު އެ ޓީމު އަތުންވީ ބޭކާރެވެ. މެޗުގެ 14 ވަނަ މިނިޓްގައި ސެވިއްޔާގެ ޔަކުއިން ކޮރޭއާ ފޮނުވާލި ޕެނަލްޓީ ލެސްޓާ ކީޕަރު ކެސްޕަ ޝްމައިކަލް ވަނީ މަތަކޮށްފަ އެވެ.

އެހެން ނަމަވެސް އޭގެ 10 މިނިޓް ފަހުން ސެވިއްޔާ އިން ވަނީ މެޗުގެ ލީޑު ނަގައިފަ އެވެ. އެ ޓީމަށް މި ލަނޑު ކާމިޔާބު ކޮށްދިނީ ޕަބްލޯ ސަނަބްރިއާ އެވެ. ސެވިއްޔާގެ ދެ ވަނަ ލަނޑު ޖެހީ މެޗުގެ 62 ވަނަ މިނިޓްގައި ކޮރޭއާ އެވެ.

ލެސްޓާ އަށް މި މެޗުގައި ޖަހައިދިން ހަމައެކަނި ލަނޑު މެޗުގެ 73 ވަނަ މިނިޓްގައި ޖެހީ ޖޭމީ ވާޑީ އެވެ. މިއީ ފާއިތުވި ނުވަ މެޗަށް ފަހު ވާޑީ ކާމިޔާބުކުރި ފުރަތަމަ ލަނޑެވެ. މި ލަނޑާ އެކު ލެސްޓާ އަށް ވަނީ ކުއާޓާ ފައިނަލަށް ދިއުމުގެ އުއްމީދުއާ ވެފަ އެވެ. އެއީ އަމިއްލަ ލެގުގައި ކުޅޭ މެޗުން 1-0 އިން ލެސްޓާ މޮޅުވިޔަސް ކުއާޓާގެ ޖާގައެއް ލިބޭނެތީ އެވެ.

އިޓަލީގެ ޗެމްޕިއަން ޔުވެންޓަސް އިން ރޭ ވަނީ ޕޯޓޯ ދަނޑުގައި މޮޅު ކުޅުމެއް ދައްކައިފަ އެވެ. ޕޯޓޯ އިން މެޗުގެ 65 އަށް ވުރެ ގިނަ މިނިޓް ކުޅުނީ އެއް ކުޅުންތެރިޔަކު މަދުކޮށެވެ. އެއީ މެޗުގެ 27 ވަނަ މިނިޓްގައި އެ ޓީމުގެ އަލެކްސް ޓެލެސް އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.

ޔުވެންޓަސްގެ ދެ ލަނޑު ވެސް ޖެހީ މެޗުގެ ފަހު 20 މިނިޓް ތެރޭގަ އެވެ. ފުރަތަމަ ލަނޑު މެޗުގެ 72 ވަނަ މިނިޓްގައި ކްރޮއޭޝިއާގެ މިޑްފީލްޑަރު މާކޯ ޖަކާ ޖެހިއިރު އޭގެ ދެ މިނިޓް ފަހުން ދެ ވަނަ ލަނޑު ޖެހީ ޑެނީ އަލްވޭސް އެވެ.

ރޭގެ މެޗަކީ ޔުވެންޓަސް ކީޕަރު ޖިއަންލުއިޖީ ބުފޮން އާއި ޕޯޓޯ ކީޕަރު އިކާ ކަސިއަސް އެއް ކުޅުންތެރިޔަކު އަނެއް ކުޅުންތެރިޔަކާ ދެކޮޅަށް ކުޅުނު 17 ވަނަ މެޗެވެ. ޕޯޓޯއާ ދެކޮޅަށް އެންމެ ފަހުން 2001 ވަނަ އަހަރު ޔުވެންޓަސް ކުޅުނު މެޗުގައި ވެސް އެ ޓީމުގެ ގޯލު ބެލެހެއްޓީ ބުފޮން އެވެ.