މަރުވެފައި އޮއްވައި ފެނުނީ ގެއްލިގެން ހޯދަން އިއުލާނުކުރި މީހާ

މާލޭގެ ގެއެއްގެ ތެރޭގައި މަރުވެފައިވާ އޮއްވައި ފެނިފައިވަނީ، ގެއްލިގެން މިއަދު ހޯދަން އިއުލާނުކުރި މީހާ ކަމަށް ފުލުހުން މިއަދު ބުނެފި އެވެ.

ވީ ގޮތެއް ނޭނގިގެން، މިދިޔަ ބުރާސްފަތި ދުވަހުން ފެށިގެން ފުލުހުން ހޯދަމުން ދިޔައީ މއ. ބޯޅަކިންކިރިމާގެ، އަހުމަދު އައިމަން 30، އެވެ. އެހެންވެ، އޭނާއާ ގުޅޭ އެއްވެސް މައުލޫމާތެއް އެނގިފައިވާނަމަ އެކަން ރިޕޯޓުކުރުމަށް ވަނީ އެދިފަ އެވެ.

އޭގެ ފަހުން، ފުލުހުން ވަނީ މ. ރަބީއުވިލާ ގެ ފުރަތަމަ ފަންގިފިލާގައި ފިރިހެނަކު މަރުވެފައި އޮތް ކަމުގެ ރިޕޯޓެއް 2:30 ހާއިރު ލިބިފައިވާތީ، އެ ސަރަހައްދުގައި ހަރަކާތްތެރިވަމުން އަންނަ ކަމަށް ބުނެފަ އެވެ.

ފުލުހުން މިރޭ ބުނީ މ. ރަބީއުވިލާ އިން މަރުވެފައި އޮއްވައި ފެނުނީ އައިމަން ކަން ޔަގީންކުރެވިފައިވާ ކަމަށާއި، އެކަން އިތުރަށް ތަހުގީގުކުރަމުންދާ ކަމަށެވެ. އެކަމަކު އިތުރު ތަފްސީލެއް އަދި ނުދެ އެވެ.