މޫދަށް އެރި އުޅެނިކޮށް އުޅަނދެއްގައި ޖެހި އަނިޔާވި މީހާ މަރުވެއްޖެ

ދަރުމަވަންތަ ހޮސްޕިޓަލް ކައިރިން މޫދުގައި އަނިޔާވެފައި އޮއްވާ މިއަދު ފެނުނު މީހާ މަރުވެއްޖެ އެވެ.

ބޭރު ތޮށިގަނޑާ ދިމާލުން މިއަދު މޫދުގައި އަނިޔާވެފައި އޮއްވާ ފެނުނީ ދިވެހި ފިރިހެނެކެވެ. އޭނާ އައިޖީއެމްއެޗްއަށް ގެންގޮސް ފަރުވާދެމުން ދަނިކޮށް މަރުވެފައިވާ ކަމަށް ފުލުހުން މައުލޫމާތު ދިނެވެ.

ހޮސްޕިޓަލްގެ ޑޮކްޓަރުންނާ ހަވާލާދީ، ފުލުހުން ބުނީ އެ މީހާގެ ބޮލަށް އަނިޔާވެފައިވާ ކަމަށެވެ. އޭނާ އަށް އަނިޔާވީ، ތޮށިގަނޑާ ދިމާލުން ދުއްވާފައި ދިޔަ "އުޅަނދެއް" ގައި ޖެހިގެން ކަމަށް ބެލެވޭ ކަމަށް ފުލުހުން ބުނެފައިވެ އެވެ.

އުމުރުން 55 އަހަރުގެ މީހާ މޫދަށް އެރި އުޅުނު ސަރަހައްދުގައި ލޭންޑިން ކްރާފްޓެއް އޮތެވެ. މައުލޫމާތު ލިބިފައިވާ ގޮތުގައި އެމީހާއަށް އަނިޔާވީ އެ ލޭންޑިން ކްރާފްޓް އޭނާގެ ގައިމަތިން ދިޔުމުންނެވެ.

އެ ސަރަހައްދަކީ މޫދަށް އެރި އުޅުނު މަނާ ތަނެކެވެ.