ޑިންގީ އަކުން ޖެހި މާކުރަތުގެ ޒުވާނަކު މަރުވެއްޖެ

ރ. މާކުރަތުގައި މިއަދު ފީނަން ގޮސް އުޅުނު ޒުވާނެއްގެ ގައިގައި ދުއްވާފަ ދިޔަ ޑިންގީއަކުން ޖެހި އޭނާ މަރުވެއްޖެ އެވެ.

އެ ހާދިސާގައި މަރުވީ އެރަށު ނަލަހިޔާގޭ، އަބްދުލް އަޒީޒް ހަސަން، 20، އެވެ.

ރ. އަތޮޅު ރީޖަނަލް ހޮސްޕިޓަލުގެ ޕަބްލިކް ރިލޭޝަން އޮފިސަރު ހަސަން ފަޒީލް ވިދާޅުވީ ޑިންގީއަކުން ޖެހިގެން ފަރުވާދޭން ގެނައިއިރު ވެސް ޒުވާނާ އޮތީ މަރުވެފައި ކަަމަށެވެ. އެކަމަކު އޭނާގެ ހަށިގަނޑުގެ ބޭރުފުށުން އެއްވެސް ގެއްލުމެއް ފެންނަން ނެތް ކަމަށް ފަޒީލް ވިދާޅުވި އެވެ.

މާކުރަތު ކައުންސިލްގެ ރައީސް ހަސަން އަލީ ވިދާޅުވި ގޮތުގައި އަބްދުލްއަޒީޒް މިއަދު ފީނަން ދިޔައީ އެކަންޏެވެ. ޑިންގީން ޖެހުނީ އެރަށު ނެރު ހިމެނޭ ސަރަހައްދުގައި ފީނަމުން ދަނިކޮށް ކަމަށް އޭނާ ވިދާޅުވި އެވެ.

"އަޅުގަނޑަށް ލަފާ ކުރެވެނީ ފީނަމުން ގޮސް ނޭވާލާން މައްޗަށް އެރި ވަގުތު ޑިންގީން ޖެހުނީ ކަމަށް،" ހަސަން ވިދާޅުވި އެވެ.

އެކްސިޑެންޓްވި ޑިންގީ އަކީ އެރަށުގައި ދުއްވާ ޑިންގީއެއް ކަމަށާއި ފުލުހުން އެ މައްސަލަ ތަހުގީގު ކުރަމުން އަންނަ ކަމަށް ހަސަން ވިދާޅުވި އެވެ.

މަރުވި އަޒީޒަކީ ސްކޫލް ނިންމުމަށް ފަހު، އާމްދަނީ ހޯދަން އިހި ނެގުމުގެ މަސައްކަތް ކުރާ މީހެއް ކަމަށް ވެސް ކައުންސިލުން ބުންޏެވެ.