ސަރުކާރުގެ ހުރިހާ ސްކޫލެއް އޭސީކޮށް، ޓީޗަރުން ތަމްރީނުކުރުމުގެ ގައުމީ ޕްރޮގްރާމެއް ފަށަނީ

ސަރުކާރު ހުރިހާ ސްކޫލެއް އޭސީކޮށް ޓީޗަރުން ތަމްރީނުކުރުމުގެ ޕްރޮގްރާމެއް، މި މަހު 26ގައި ފަށާ ދިރާސީ އަހަރު ކުރިއަށް ގެންދިއުމަށް ނިންމާފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.

ޓީޗަރުން ލިބުމުގެ ދަތިކަމަކީ ކޮންމެ އަހަރަކު ވެސް ސްކޫލުތައް އަލަށް ހުޅުވާއިރު ދިމާވާ މައްސަލައެކެވެ. ހާއްސަކޮށް މާއްދާތައް ކިޔަވައިދޭން ދިވެހި ޓީޗަރުން ނުލިބޭ މައްސަލަ އެވެ.

މިނިސްޓަރުގެ ފޭސްބުކުގައި ކުރެއްވި ޕޯސްޓެއްގައި ވިދާޅުވީ މިފެށޭ ދިރާސީ އަހަރު ތައުލީމީ ނިޒާމަށް ހެޔޮ ބަދަލުތަކެއް އަންނާނެ ކަމަށެވެ.

އެގޮތުން ޓީޗަރުން ތަމްރީނު ކުރުމުގެ ގައުމީ ޕްރޮގްރާމް ފެށުމާއި ސަރުކާރުގެ ހުރިހާ ސްކޫލެއް އޭސީ ކުރުމުގެ ޕްރޮޖެކްޓް ފަށާނެ ކަމަށް މިނިސްޓަރު ވިދާޅުވި އެވެ.

ޓީޗަރުން ތަމްރީނު ކުރުމުގެ ޕްރޮގްރާމުގެ ދަށުން ޓީޗަރުންނަކީ ގަދަރުވެރި ބައެއްކަމުގައި ހެދުމުގެ އަމަލީ މަސައްކަތް ފެށުމާއި ސްކޫލްތަކުގައި ޓީޗަރުން ހޭދަކުރާ ވަގުތު މަދުކުރާނެ ކަން މިނިސްޓަރު ވިދާޅުވި އެވެ.

ޓީޗަރުން ތަމްރީނުކުރުމުގެ އިތުރުން ސްކޫލުތަކުގައި އޭސީ ހަރުކުރުމުގެ މަޝްރޫއުގެ ތެރެއިން ދެ އަހަރު ތެރޭގައި ހުރިހާ ސްކޫލެއް އޭސީކޮށް ނިންމާނެ ކަމަށް ވެސް މިނިސްޓަރު ވިދާޅުވި އެވެ.

ސްކޫލުތަކުގައި އޭސީ ހަރުކުރުމުގެ ޕްރޮޖެކްޓެއް ސަރުކާރުން ފެށުމަށް ނިންމިއިރު، ބައެއް ސުކޫލުތަކުގައި އޭސީ ހަރުކޮށްފައި ނެތުމާއެކު ހޫނުގަދަވެ، ކްލާސްތަކަށް ފަންކާ އާއި އޭސީ ހޯދުމަށް ސްކޫލުތަކުގެ މެނޭޖުމެންޓުން ދަނީ ބެލެނިވެރިންގެ އެހީތެރިކަން ހޯދަމުންނެވެ. އެކަމާ ގިނަ ބައެއްގެ ފާޑުކިޔުން ވެސް ވަނީ މިނިސްޓްރީއަށް އަމާޒުވެފަ އެވެ.