ފޭދޫގެ ސްޕާއަކުން ފަސް މީހުން ހައްޔަރުކޮށްފި

ސ. ފޭދޫގައި ހިންގާ ސްޕާއަކުން ފަސް މީހުން އިއްޔެ ހައްޔަރުކޮށްފި އެވެ.

ފުލުހުން މިއަދު ބުނީ އައްޑޫ ފޭދޫގައި އިއްޔެ ހިންގި އޮޕަރޭޝަނެއްގައި އެ ރަށުގައި ސްޕާއެއްގެ ގޮތުގައި ހިންގާ ތަނެއް ބަލައި ފާސްކޮށް ދިވެހި ދެ ފިރިހެނުންނާއި ތައިލެންޑުގެ ތިން އަންހެނުން ހައްޔަރުކޮށްފައިވާ ކަމަށެވެ.

އިތުރު ތަފުސީލެއް ފުލުހުން އަދި ނުދެ އެވެ. އެ ފަސް މީހުންނަށް ކުރަނީ ކޮން ތުހުމަތެއް ކަމެއް ވެސް ފުލުހުން އަދި ނުބުނެ އެވެ.

ފުލުހުން ބުނީ މި މައްސަލަ ތަހުގީގުކުރަމުން އަންނަ ކަމަށެވެ.

ރާއްޖޭގައި ހަށިވިއްކުން އާންމުންވެ އާންމުންގެ ފާޑުކިޔުން ކަމާބެހޭ އިދާރާތަކަށް ވަރަށް ބޮޑަށް ވަނީ އަމާޒުވެފަ އެވެ. ފުލުހުން އަންނަނީ އެކި ފަހަރު މަތިން އޮޕަރޭޝަންތައް ހިންގައި ހަށިވިއްކާ ތަންތަން ރެއިޑްކޮށް، މީހުން ވެސް ހައްޔަރު ކުރަމުންނެވެ.