ރީނަލް އާޓަރީ އެންޖިއޯޕްލާސްޓީ ޕްރޮސީޖާ ޓްރީ ޓޮޕްގައި ހަދައިފި

ޓްރީޓޮޕް ހޮސްޕިޓަލުގެ ފުރަތަމަ ފަހަރަށް ރީނަލް އާޓަރީ އެންޖިއޯޕްލާސްޓީ ޕްރޮސީޖާ ކާމިޔާބުކަމާ އެކު ފުރިހަމަކޮށްފި އެވެ.

މިއީ އިންޓަވެންޝަނަލް ކާޑިއޮލޮޖީގެ ދާއިރާއިން ޓްރީޓޮޕް ހޮސްޕިޓަލަށް ލިބިގެންދިޔަ ކުރިއެރުމެއްގެ ގޮތުގައި އެ ހޮސްޕިޓަލުން ފާހަގަކުރެ އެވެ.

ރީނަލް އާޓަރީ އެންޖިއޯޕްލާސްޓީ އަކީ ހިމަވެފައި ނުވަތަ ބްލޮކްވެފައިވާ ކިޑްނީއަށް ލޭ ފޯރުކޮށްދޭ ނާރުތައް ހުޅުވައިދޭ މިނިމަލީ އިންވޭސިވް ޕްރޮސީޖާއެކެވެ. ބޮޑެތި އޯޕަން ސާޖަރީތަކާ ހިލާފަށް، މިފަދަ ޕްރޮސީޖާތައް ކުރިޔަށް ގެންދަނީ ވަރަށް ކުޑަ ކުޑަ އިންސިޝަންއެއް ހަދައިގެންނެވެ.

މި ޕްރޮސީޖާއިން ބަލިމީހާ ރިކަވާވެ އާއްމު ދިރިއުޅުމަށް ރުޖޫއުވާން ހޭދަވާ ވަގުތު މަދުވެ އެވެ. މިއީ ލޭގެ ޕްރެޝަރު މަތިވުމާއި ކިޑްނީގެ މަސައްކަތް ދަށްވުމާއި އެއާ ގުޅުން ހުރި އެހެނިހެން މައްސަލަތައް ހުންނަ މީހުންނަށް ދިރިއުޅުމަށް ވަރަށް ބޮޑު ލުއިކަމެއް ލިބިގެންދާނެ ޕްރޮސީޖާއެކެވެ.

ޓްރީ ޓޮޕް ހޮސްޕިޓަލުގައި މި ޕްރޮސީޖާ ހެދީ އެ ހޮސްޕިޓަލުގެ ކޮންސަލްޓަންޓް ކާޑިއޮލޮޖިސްޓް ޑރ. އަމިތު އަގަރްވާލް އަދި ހުނަރުވެރި ކާޑިއޮލޮޖީ ޓީމުންނެވެ. ޑރ. އަމިތު އަގަރްވާލް އަކީ ކާޑިއޮލޮޖީގެ ދާއިރާއިން ސްޕެޝަލައިޒްވެފައިވާ، ހިތުގެ ގިނަ ބަލިތައް ދެނެގަތުމުގައި ތަޖުރިބާކާރު އަދި ހުނަރުވެރި ޑޮކްޓަރެއް ކަމަށް ޓްރީ ޓޮޕް ހޮސްޕިޓަލުން ބުންޏެވެ.

ޑރ. އަމިތު ވަނީ ނޭޕާލްގުންޖް މެޑިކަލް ކޮލެޖުން އެމްބީބީއެސް އަދި ނޭޕާލްގެ އިންސްޓިޓިއުޓް އޮފް މެޑިސިން ކަތުމަންޑޫން އިންޓާނަލް މެޑިސިންގެ ދާއިރާއިން އެމްޑީ ހާސިލްކޮށްފަ އެވެ. އަދި ނޭޕާލްގެ ނޭޝަނަލް އެކަޑަމީ އޮފް މެޑިކަލް ސައިންސަސް އިން ކާޑިއޮލޮޖީގެ ދާއިރާއިން ސްޕެޝަލައިޒްވެ، އިންޑިއާގެ އިންޓަވެންޝަނަލް ކާޑިއޮލޮޖީގެ ދާއިރާއިން ވަނީ ތަމްރީނު ހޯދާފަ އެވެ. އަދި ޑރ. އަމިތު ވަނީ ނޭޕާލްގެ ނޭޝަނަލް މެޑިކަލް ކޮލެޖުގެ އެސިސްޓެންޓް ޕްރޮފެސަރުގެ މަގާމު ފުރައިފަ އެވެ. އޭނާ އަކީ މާލޭގެ އޭޑީކޭ ހޮސްޕިޓަލުގައި އިންޓަވެންޝަނަލް ކާޑިއޮލޮޖިސްޓެއްގެ ގޮތުގައި ވެސް މަސައްކަތް ކުރި ޑޮކްޓަރެކެވެ.

ޓްރީ ޓޮޕް ހޮސްޕިޓަލުގައި ޒަމާނީ ޓެކްނޮލޮޖީގެ ވަސީލަތްތަކާ އެކު ހިިތުގެ ބަލިތައް ދެނެގަނެ، އެ ބަލިތަކަށް ފަރުވާދިނުމަށް ހާއްސަ ޑިޕާޓްމަންޓެއް ހުރެ އެވެ. މި ޑިޕާޓްމަންޓުން ޕްރިވެންޓިވް ސްކްރީނިން އާއި މިނިމަލީ އިންވޭސިވް ޕްރޮސީޖާތަކުން ފެށިގެން ހިތުގެ ކޮމްޕްލެކްސް ބަލިތައް މެނޭޖްކުރުމުގެ ފަރުވާތައް ވެސް ލިބޭނެ އެވެ.