ޑަޔަލިލިސް ހެދުން ގެޔަށް، ފަރުވާ ހޯދުމަށް ބޮޑު ލުޔެއް

ކްރޮނިކް އަދި އެކިޔުޓް ކިޑްނީ ބަލިތައް ތަހައްމަލުކުރާ މީހުން ގިނަވެ، މި ބަލިތަކުން ކިޑްނީ ފެއިލްވެ ފަރުވާ ހޯދަންޖެހިފައިވާ ގިނަ ބަޔަކު އުޅެ އެވެ. ކިޑްނީ ފެއިލްވުމުން ކިޑްނީގެ މަސައްކަތްތައް ރިޕްލޭސް ކުރުމަށް ޑަޔަލިސިސް އަކީ ކިޑްނީ ޓްރާންސްޕްލާންޓަކާ ހަމައަށް ދަންދެން ކޮންމެހެން ވެސް ހޯދަން ޖެހޭ ފަރުވާއެކެވެ.

ޑަޔަލިސިސްގެ ދެ ވައްތަރެއްގެ ފަރުވާ އެހެން ގައުމުތަކުގައި ލިބެން ހުރި ނަމަވެސް ރާއްޖޭގައި މިހާތަނަށް ހެދެން ހުރީ ހަމައެކަނި ހީމޯ ޑަޔަލިސިސް އެވެ. ހީމޯ ޑަޔަލިސިސް އަކީ ހޮސްޕިޓަލަކަށް ގޮސްގެން ނޫނީ ނުހޯދޭނެ ފަރުވާ އެކެވެ. މިއީ ޕޭޝަންޓުންނަށް ވަރަށް ގިނަ ދަތިތަކެއް ކުރިމަތިވާ ކަމެކެވެ. ހާއްސަކޮށް ބައެއް ރަށްރަށުގައި މި ފަރުވާ ލިބެން ނެތުމަކީ ބަލި މީހުންނަށް ފަރުވާ ހޯދުމުގައި އެތައް ގޮންޖެހުންތަކެއް ކުރިމަތިވާ ކަމެކެވެ.

ޓްރީ ޓޮޕް ހޮސްޕިޓަލުގެ މެޑިކަލް ޑިރެކްޓަރު ޑރ. މްލާޑެން ނޯޓެކް ވެސް ފާހަގަކުރެއްވީ މިކަމެވެ.

"ހީމޯ ޑަޔަލިސިސް އަކީ ހަފްތާއަކު އެތައް ފަހަރަކު ހޮސްޕިޓަލަށް ގޮސް ހޯދަން ޖެހޭ ފަރުވާއަކަށް ވީމަ ވަރަށް ގިނަ ބަޔަކަށް އެކަމުގައި ދަތިތަކާ ކުރިމަތިވޭ. ހާއްސަކޮށް ރަށްރަށުން އަންނަ ޕޭޝަންޓުން ރަށުގައި ޑަޔަލިސިސް ހެދެން ނެތް ނަމަ މާލެ ނޫނީ އެ ހިދުމަތް ލިބެން ހުރި ރަށަކަށް ބަދަލުވާނެ ޖެހޭތީ އެކަމުގައި ހުރި ދަތިތައް ހިއްސާކޮށްފައި އެބަ ހުރި. އެކަމާ ކަންބޮޑުވެ ރޮއެފައި ވެސް އެބަހުރި،" ޑޮކްޓަރު ވިދާޅުވި އެވެ.

ޑޮކްޓަރު ވިދާޅުވީ ޑަޔަލިސިސް ހަދަން ޖެހުމުން އިތުރު ތަކުލީފުތަކެއް އުފުލަން ޖެހެނީ ރާއްޖޭގައި ހަމައެކަނި ހީމޯޑަޔަލިސިސް ހެދެން ހުރުމުން ކަމަށެވެ.

"ސިއްހީ ގޮތުން ތަރައްގީވެފައި ހުރި ކޮންމެ ގައުމަކުން ކިޑްނީ ފެއިލްވެ ފަރުވާ ހޯދާއިރު ޕޭޝަންޓުންނަށް ޑަޔަލިސިސްގެ އިތުރު އޮޕްޝަނެއް އެބަ ލިބޭ. އެއީ ގޭގައި ހުރެގެން ހެދޭ ޕެރިޓޯނިޔަލް ޑަޔަލިސިސްގެ އޮޕްޝަން. މި ޑަޔަލިސިސް އަކީ އަމިއްލައަށް ނުވަތަ މީހެއްގެ އެހީއާ އެކު ގޭގައި ހުރެގެން ހެދޭނެ ޑަޔަލިސިސް އެއް،" ޑޮކްޓަރު ވިދާޅުވި އެވެ.

ޕެރިޓޯނިޔަލް ޑަޔަލިސިސް އަކީ ޑިވައިސެއްގެ އެހީގައި އަމިއްލަ ހެދޭ ޑަޔަލިސިސް އެކެވެ. މި ޑަޔަލިސިސް ހެއްދުމަށް ބަނޑަށް ކެތީޓާ ހޮޅިއެއް ލައްވަން ޖެހެ އެވެ. އެހެންވެ، ބަނޑުގެ ބޮޑު އޮޕަރޭޝަނެއް ކޮށްފައި ހުރި ނަމަ މި ޑަޔަލިސިސް ނުހެދި ދާނެ އެވެ.

ޕެރިޓޯނިޔަލް ޑަޔަލިސިސް ދެ ގޮތަކަށް ހެދެ އެވެ. އެއީ މެނުއަލްކޮށް، ބަލީގެ ކުޑަބޮޑު މިނަށް ބަލައި ދުވާލަކު ތިން ހަތަރު ފަހަރު ކެތީޓާ ހޮޅިއާ ޑިވައިސް ގުޅައިގެން ހެދޭ ޑަޔަލިސިސް އާއި ރޭގަނޑު އެކަނި ޑިވައިސްއެއް ގުޅައިގެން މެނުއަލް ޕްރޮސެސް އޮޓަމޭޓަޑް ކޮށް ހެދެން ހުންނަ އަލްޓަމޭޓަޑް ޕެރިޓޯނިއަލް ޑަޔަލިސިސް އެވެ.

ޕެރިޓޯނިޔަލް ޑަޔަލިސިސްގެ ދެ ވައްތަރަކީ ވެސް ފުރިހަމައަށް މައުލޫމާތު ދިނުމުން ރައްކާތެރިކަމާ އެކު އަމިއްލައަށް ހެއްދޭނެ ޑަޔަލިސިސްއެކެވެ.

ޑޮކްޓަރު ވިދާޅުވި ގޮތުގައި މި ފަރުވާ އަކީ ބަލި މީހުންނަށް މިނިވަންކަން ލިބި ބާރުވެރިކަން ލިބޭ ފަރުވާއެކެވެ. އަދި ޑަޔަލިސިސް ހެދުމަށް ހޮސްޕިޓަލުގައި އެތައް ވަގުތެއް ހޭދަކުރުމުގެ ބަދަލުގައި ގޭގައި ކުޑައިރުކޮޅެއްގެ ތެރޭގައި މިކަން ކުރެވުމަކީ ޕޭޝަންޓުންނަށް ލިބޭ ބޮޑު ލުޔެއްގެ ގޮތުގައި ފާހަގަކުރެއްވި އެވެ.

ޑޮކްޓަރު ނޮޓެކް ވިދާޅުވީ އެ ހޮސްޕިޓަލުން މި ފަރުވާ ތައާރަފް ކުރަން ނިންމީ ވެސް މި ސަބަބުތަކާ ހުރެ ކަމަށެވެ.

"އަޅުގަނޑުމެން މިދިޔަ މަހުގެ ފަހު ހަފްތާގައި ޕެރިޓޯނިއަލް ޑަޔަލިސިސް މި ތައާރަފް ކުރީ ރާއްޖެ ފަދަ ޖަޒީރާ ގައުމަކަށް މި ފަދަ ފަރުވާއެއްގެ ބޭނުން ވިސްނޭތީ. މި ފަރުވާ އަކީ ރައްކާތެރިކަމާ އެކު އަމިއްލައަށް ކުރެވޭނެ ކަމެއް. މިކަން ރަނގަޅަށް ކުރުމަށް ބޭނުންވާ ހުރިހާ ގައިޑެންސެއް މި ހޮސްޕިޓަލުން ލިބޭނެ." ޑޮކްޓަރު ވިދާޅުވި އެވެ.

ޑރ. ނޮޓެކް ވިދާޅުވީ މި ފަރުވާ އަކީ ރާއްޖޭގައި އަލަށް އެ ހޮސްޕިޓަލުން ތައާރަފްކުރި ފަރުވާއެއް ނަމަވެސް އިންޑިއާ ފަދަ ކައިރި ގައުމަތަކަށް ގޮސް މި ފަރުވާ ދިވެހިން ހޯދަމުންދާ ކަމަށެވެ.

"މިއީ ރާއްޖެގައި އަލަށް ކުރި ނަމަވެސް ދިވެހިންނަށް އާ ކަމެއް ނޫން. މި ހޮސްޕިޓަލަށް ކިޑްނީ ފެއިލްވެގެން ފަރުވާ ހޯދަމުން އަންނަ ބައެއް ދިވެހި ޕޭޝަންޓުން މިހާރު ވެސް ދަނީ ޕެރިޓޯނިއަލް ޑަޔަލިސިސް ހަދަމުން،" ޑޮކްޓަރު ވިދާޅުވި އެވެ.

ޓްރީ ޓޮޕް ހޮސްޕިޓަލުން މި ހިދުމަތް ތައާރަފްކޮށްދިނީ މިދިޔަ މަހު އެ ހޮސްޕިޓަލަށް ޒިޔާރަތް ކުރެއްވި، ކުޑަކަމުދާ ނިޒާމާއި ޔޫރޮލޮޖީ ޓްރާންސްޕްލާންޓުގެ ފަރުވާގެ ހާއްސަ ޑޮކްޓަރު ޑރ. އިވާން ނެރެޓްޔަކް އެވެ. ޓްރީ ޓޮޕްއިން މި ހިދުމަތް ތައާރަފްކޮށްފައި ވަނީ ހެޔޮ އަގުގައި ޕެރިޓޯނިއަލް ޑައިލިސިސް އާއި އެކަމާ ގުޅުންހުރި ހުރިހާ ޕްރޮސީޖާތަކާއި ހިދުމަތްތަކަށް ސިފައިންނާއި ފުލުހުންގެ ހެލްތު އިންޝުއަރެންސާއި އަމިއްލަ އިންޝުއަރެންސް ކުންފުނިތަކުގެ އިންޝުއަރެންސް ޕެކޭޖްތަކުން ހެދޭނެ ގޮތަށެވެ.

އެ ހޮސްޕިޓަލުން މި ފަރުވާ ހޯދަން ބޭނުންވާ ފަރާތްތަކަށް އެކަމުގެ މައުލޫމާތު ޓްރީޓޮޕް ހޮސްޕިޓަލުގެ ކޯލް ސެންޓަރު ނަމްބަރު 3351610 އަށް ގުޅައިގެން ހޯދޭނެ އެވެ.

ޓްރީ ޓޮޕް ހޮސްޕިޓަލްގެ މެޑިކަލް ޑިރެކްޓަރު ޑރ. މްލާޑެން ނޯޓެކް ވިދާޅުވީ އެ ހޮސްޕިޓަލުން މަސައްކަތް ކުރަމުން ދަނީ މިފަދަ އާ ހިދުމަތްތައް ތައާރަފްކޮށް ބަލި މީހުންނަށް މިހާރަށް ވުރެ ލުއިފަސޭހަ ގޮތްތަކުގައި ފަރުވާ ލިބޭނެ މަގު ތަނަވަސް ކޮށްދިނުމަށް ކަމަށެވެ.