އީދުގެ ތައްޔާރީތައް އަހަރެއް އަހަރަކަށް ވަރުގަދަކުރައްވާނެ ކަމަށް ރައީސް ވިދާޅުވެއްޖެ

އީދު ކަހަލަ އިސްލާމީ މާތް މުނާސަބަތުތަކަށް ވާ ތައްޔާރީތައް އަހަރެއް އަހަރަކަށް ވަރުގަދަ ކުރައްވާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ކުޑަ އީދަށް ބޮކިފައްޗާއި ގިޑިގެތަކުން ސިޓީތަކާއި ރަށްތައް ދިއްލާލުމަށާއި ޖުމްހޫރީ މައިދާނުގެ ހުރި ފެންއަރުވާ ވަޑާން މަރާމާތުކޮށް އަލުން ހުޅުވުމަށް ރޭ ބޭއްވި ރަސްމިއްޔާތުގައި ރައީސް ވިދާޅުވީ އީދުގެ މުނާސަބަތަކީ އިސްލާމް ދީނުގައި މީސްތަކުންނަށް ދެއްވާފައިވާ ވަރަށް ބޮޑު ނިއުމަތެއް ކަމަށާއި މި ނިއުމަތުގެ މުހިންމުކަން އެންމެނަށް އަދި ހާއްސަކޮށް ކުޑަކުދިންނަށާއި ޒުވާނުންނަށް އިހުސާސްކޮށްދެން ޖެހޭ ކަމަށެވެ.

"އަޅުގަނޑުމެންނަކީ ސައްތައިންސައްތަ މުސްލިމް ގައުމެއް. އެހެންކަމުން، މި ގައުމުގައި އަޅުގަނޑުމެން އީދު ދުވަސް އަންނަކަން، ކުރީންސުރެ އެއަށް އިންތިޒާރުކޮށް އީދު ދުވަހަށްޓަކައި ތައްޔާރުވެ، އީދުގެ އުފަލުގައި ފުރިހަމަ އަށް، ދީނީ ހަމަތަކުގެ މަތިން ބައިވެރިވެ އީދުގެ އުފާ ފާޅުކުރަން ވާނެ،" ރައީސް ވިދާޅުވި އެވެ.

އީދުގެ މުނާސަބަތައް މުޅި ރާއްޖެ ޒީނަތްތެރިކުރުމަށް އެމަނިކުފާނު ގަސްތުކުރެއްވީ އެ މަގުސަދުގައި ކަމަށް ރައީސް ވިދާޅުވި އެވެ.

މިފަހަރު ކުޑަ އީދަށް މާލެ އާއި ސިޓީތަކާ އަދި އަތޮޅު ވެރިކަން ކުރާ ރަށްތަކުގައި އީދުގެ ދިއްލުން ވަނީ ދިއްލައިފަ އެވެ.

"އުއްމީދުކުރަނީ ކުރިއަށް އޮތް އަހަރު އަދި މިއަށް ވުރެ ގިނަ ރަށްތަކުގައި ދިއްލަން،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި، މިކަން ކޮށްދިނުމަށް މިހާރު ވެސް ވަރަށް ގިނަ ރަށްރަށުން ސަރުކާރަށް އަންނަނީ ރިކުއެސްޓްތައް ލިބެމުންނެވެ.

"ސަރުކާރުގެ ކެރިފޯރުންތެރިކަން ހުރި ވަރަކުން ބޮޑު އީދުގައި އަދި ދެން އަންނަ އަހަރުތަކުގެ އީދުގައި ވީހާ ވެސް ގިނަ ރަށްތަކެއްގައި މިކަން ކުރާނެ،" ރައީސް ވިދާޅުވި އެވެ.

ރައީސް ވިދާޅުވީ އެމަނިކުފާނު ބޭނުންފުޅު ވަނީ އެންމެ އެކުގައި އެއް ރޫހެއްގައި މި އީދު ކުލަގަދަ ގޮތެއް ފާހަގަކުރަން ކަމަށެވެ.

"އަޅުގަނޑުމެންނަކީ ދިވެހިން، ފަހުރުވެރި ދިވެހިން. ދިވެއްސަކަށް ވީތީ އަޅުގަނޑުމެންނަކީ އެއް ބައެއް. އެއް ނަސްލަކަށް ނިސްބަތްވާ، އެއް ބަހަކުން ވާހަކަދައްކާ، އެއް ދީނަކަށް ތަބާވާ، އެއް ބައެއް. އެއްބައިވަންތައް، އެއްބައެއްވަންތަ، ބައެއް. މި އެކުވެރިކަން އަޅުގަނޑުމެންގެ ތެރެއިން ނެތި ގޮސްގެން ނުވާނެ،" ރައީސް ވިދާޅުވި އެވެ.

ކޮންމެ ކަހަލަ ކަމެއް ކުރިމަތިވިޔަސް އަދި ކޮންމެ ކަހަލަ ހިޔާލު ތަފާތުވުމެއް އޮތަސް އަހަރެމެންނަކީ އެއްބައެއްކަން ހަނދާން ނައްތާލައިގެން ނުވާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ މިއަދު މައިންބަފައިން ވެސް ކުދިންނަށް ދަސްކޮށްދޭންވީ އެއްބައިވަންތަކަމުގެ ރޫހު ދިރުވުމަށެވެ.

"އަޅުގަނޑުމެންނަކީ އެންޑް އޮފް ދަ ޑޭ އެއްބައެއް. އެއްބައިވަންތަކަމުގެ އަޒުމް މިއަދު ވަރުގަދަކުރައްވާ،" ރައީސް ވިދާޅުވި އެވެ.

"އަޅުގަނޑުމެން ކޮންމެ ކުޑަކުއްޖަކަށް އުފާވެރިކަން ގެނެސްދޭން ބޭނުންވޭ. ކޮންމެ ކުއްޖަކަށް އެ ކުއްޖާގެ އުއްމީދުތައް ހާސިލުކޮށްދޭން ބޭނުންވޭ. އާއިލާތަކަށް އުފާވެރިކަން ގެނެސްދޭން ބޭނުންވޭ. އެހެންވީމަ، އެންމެ އެކުގައި މި ކަންކަމާ އެކީގައި ކުރިއަށް ދިޔައީމަ އުއްމީދުތައް ހާސިލުވާނެ."

ރައީސް ވިދާޅުވީ މާލޭގައި ދިރިއުޅޭ އެންމެން ވެސް މި އީދުގެ އުފާވެރިކަން ފާޅުކުރުމަށްޓަކައި އާއިލާތަކުން ބޭރަށް ނުކުމެ، އެ ބަޔަކު ބޭނުންވާ ގޮތަކަށް އާންމު ހަމަތަކުގެ މަތިން މަގުތަކާއި ގޯޅިތަކުގައި އެކި ކަހަލަ ހަރަކާތްތައް ވެސް ހިންގަން ފުރުސަތު ހުޅުވާލާފައިވާ ކަމަށެވެ.

ރަށްރަށުގައި ވެސް ގިނަ ބަޔަކު ބޭރަށް ނުކުމެ، މުސްލިމަކަށް ވީތީ ފަހުރުވެރިކަމާ އެކީގައި އުފާ ފާޅުކުރާ އީދަކަށް މި މުނާސަބަތު ހަދައިދިނުމަށް ރައީސް ރޭ އެދިވަޑައިގަތެވެ.