އަތޮޅުތެރެ އަށް ރައީސްގެ ފުރަތަމަ ދަތުރުފުޅު، އެންމެ ގިނަ ވޯޓު ލިބުނު ރަށުން

ވެރިކަމަށް ވަޑައިގަތުމަށްފަހު ރައީސް ޑރ. މުހައްމަދު މުއިއްޒު އަތޮޅުތެރެއަށް ކުރައްވާ ފުރަތަމަ ދަތުރުފުޅުގައި، އެ މަނިކުފާނަށް ނިސްބަތުން އެންމެ ގިނަ ވޯޓު ލިބުނު ރަށް، ތ. ގުރައިދުއާއެކު އެ އަތޮޅަށް ކުރައްވާ ދަތުރުފުޅެއް މިއަދު ފައްޓަވައިފި އެވެ.

ރައީސް އޮފީހުން ބުނީ އަންނަ ބުރާސްފަތި ދުވަހާ ހަމައަށް ކުރައްވާ ދަތުރުފުޅުގައި އެ އަތޮޅުގެ 11 ރަށަކަށް ވަޑައިގެން، ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީ އަދި އާއްމުންނާ ބައްދަލުކުރައްވާނެ ކަމަށެވެ.

ރަށްރަށުގެ ތަރައްގީ އަށް އެންމެ މުހިންމު މަޝްރޫއުތަކާއި އެ ރަށްރަށުގެ ރައްޔިތުންނަށް އެންމެ ބޭނުންވެފައިވާ ކަންކަމާ ގުޅޭގޮތުން ވެސް މަޝްވަރާ ކުރައްވާނެ ކަމަށް ރައީސް އޮފީހުން ބުންޏެވެ.

އެ މަނިކުފާނު ވަނީ، މަގާމާ ހަވާލުވެވަޑައިގަތުމަށްފަހު އެންމެ ފުރަތަމަ ވަޑައިގަންނަވާނީ މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުގައި އެންމެ ގިނަ ވޯޓު ލިބުނު ރަށަށް ކަމަށް އިންތިހާބުގައި ވިދާޅުވެފަ އެވެ. ރައީސށް ގުރައިދޫން 74 ޕަސެންޓު ވޯޓު ލިބިވަޑައިގަތެވެ.

ތ. އަތޮޅުގެ މި ދަތުރުފުޅުގައި ގުރައިދޫގެ އިތުރުން އެ އަތޮޅު ދިޔަމިގިއްޔާއި ގާދިއްފުށި، ވޭމަންޑޫ، ބުރުނި، ކަނޑޫދޫ، ވަންދޫ، ވޭމަންޑޫ، އޮމަދޫ، ކިނބިދޫ އަދި ތިމަރުފުއްޓަށް ވަޑައިގަންނަވާނެ އެވެ.

ވެރިކަން ކުރައްވާނީ ރައްޔިތުންގެ އަޑު އައްސަވައިގެން ކަމަށާއި އާއްމުންނާ ގިނަގިނައިން ބައްދަލުކޮށް މި ދައުރުގެ ތެރޭގައި ރާއްޖޭގެ ހުރިހާ ރަށަކަށް ވަޑައިގަންނަވާނެ ކަމަށް އެ މަނިކުފާނު ވިދާޅުވެފައިވެ އެވެ.