އިޒްރޭލަށް ޖާސޫސްކޮށްދިން ކަމުގެ ކުށުގައި އީރާނުން ހަތަރު މީހަކު މަރާލައިފި

އީރާންގެ ޑިފެންސް ސައިޓަކަށް ގެއްލުން ދިނުމަށް އެ ގައުމުގެ އެންމެ ބޮޑު ދުޝްމަން އިޒްރޭލާ ގުޅިގެން މަސައްކަތްކޮށް ޖާސޫސްކޮށްދިން ކަމުގެ ކުށުގައި އީރާނުން މަރުގެ ހުކުމް އިއްވި ހަތަރު މީހެއްގެ ހުކުމް އިއްޔެ ތަންފީޒުކޮށްފި އެވެ.

އީރާންގެ ޖުޑީޝަރީގެ ވެބްސައިޓް "މީޒާން" ގައި ބުނެފައިވާ ގޮތުގައި 2022 ވަނަ އަހަރު ހައްޔަރުކުރި ހަތަރު މީހުންނަށް މަރުގެ ހުކުމް އިއްވީ އިސްފަހާންގައި ހުންނަ ޑިފެންސް މިނިސްޓްރީގެ ސައިޓަކާ ދެކޮޅަށް ހިންގަން ހިންގަން އުޅުނު އޮޕަރޭޝަނެއްގައި ބައިވެރިވެފައި ވާތީ އެވެ.

"ބޮމުގެ ހަމަލާއެއް ރޭވި، ޒަޔަނިސްޓުންނާ ގުޅިގެން މަސައްކަތްކުރާ ގްރޫޕެއްގެ މި ހަތަރު މީހުންނަށް މިއަދު ހެނދުނު ވަނީ މަރުގެ ހުކުމް ތަންފީޒުކޮށްފައި،" ވެބްސައިޓްގައި ބުނެފައިވެ އެވެ.

އީރާނުން ބުނެފައިވަނީ މަރުގެ ހުކުމް އައި މި ހަތަރު މީހުންނަށް، އެ މީހުންނާ ހަވާލުވި އޮޕަރޭޝަންގެ ދޮޅު އަހަރެއްހާ ދުވަސް ކުރިން އިޒްރޭލުގެ ޖާސޫސީ އިދާރާ މޮސާޑުން ވަނީ ތަމްރީން ދީފަ އެވެ. އެ މީހުންނަށް ތަމްރީން ދިނީ މޮސާޑްގެ އެޖެންޓުން ތިބި އެފްރިކާގެ އަސްކަރީ މަރުކަޒުތަކަށް ފޮނުވައިގެން ކަމަށް ވެސް ބުނެފައިވެ އެވެ.

އީރާނުން މިދިޔަ އަހަރުގެ އޯގަސްޓް މަހު ބުނެފައިވާ ގޮތުގައި މޮސާޑުން އީރާންގެ ބެލަސްޓިކް މިސައިލް ޕްރޮޖެކްޓް ނާކާމިޔާބުކޮށްލަން ހިންގަން އުުޅުނު ވަރަށް ބޮޑު އޮޕަރޭޝަނެއް ވަނީ ނާކާމިޔާބުކޮށްލައިފަ އެވެ. އޭގެ ދެތިން މަސް ފަހުން އީރާނުން ވަނީ އަސްކަރީ ސައިޓަކަށް އިޒްރޭލުން ޑްރޯން ހަމަލާއެއް ދިން ކަމަށް ވެސް ބުނެފަ އެވެ. -- އޭއެފްޕީ