ބޮމުގެ ހަމަލާތައް ވަރުގަދަކުރުމަށް ފަހު އިޒްރޭލުގެ ޓޭންކްތައް ޣައްޒާގެ މެދުތެރެއަށް

އިޒްރޭލުގެ ހަމަލާތަކުގެ ސަބަބުން މިހާރުވެސް ގެދޮރު ގެއްލި ހާލުގައި ތިބި ޣައްޒާގެ އާންމުން އުޅޭ ހިސާބުތަކަށް އިޒްރޭލުން ވައިގެ މަގުން ހަމަލާތައް ވަރުގަދަކުރިތާ ދެތިން ދުވަސް ފަހުން އެއްގަމު މަގުން ޓޭންކްތަކުގައި ގޮސް ޣައްޒާގެ މެދުތެރެއަށް ވަދެއްޖެ އެވެ.

ޣައްޒާގެ މެދުތެރޭގައި އިޒްރޭލުގެ ޓޭންކުތައް އުޅެނިކޮށް ނަގާފައިވާ ފޮޓޯތައް ފަލަސްތީނުގެ ބައެއް ނޫސްވެރިން ސޯޝަލް މީޑިއާގައި އާންމުކޮށްފައިވެ އެވެ.

އެއްގަމު މަގުން ޣައްޒާގެ މެދުތެރެއަށް ވަދެ ހަމަލާ ދެމުން ގެންދާއިރު އާންމުން މިހާރު ތިބީ ހާލަތު އިތުރަށް ގޯސްވެދާނެ ކަމުގެ ބިރުވެރިކަމުގަ އެވެ. ހަމަލާތައް މިހާރު ދެމުން ގެންދަނީ މީގެ 12 ހަފްތާ ކުރިން އިޒްރޭލުން ދޭން ފެށި ހަމަލާތަކާ ހެދި ހާލުގައި ޖެހިފައިވާ އާންމުން ހިމާޔަތަށް ގޮސް ތޮއްޖެހިފައިވާ ހިސާބުގަ އެވެ.

ފަލަސްތީނުގެ ހެލްތު މިނިސްޓްރީން އިއްޔެ ބުނި ގޮތުގައި، އިއްޔެއާ ހަމައަސް 24 ގަޑިއިރު ތެރޭ އިޒްރޭލުގެ ވައިގެ ހަމަލާތަކުގައި 210 މީހަކު ވަނީ ޝަހީދުވެފަ އެވެ. މި އަދަދާ އެކު އިޒްރޭލުން މިފަހަރުގެ ހަމަލާތަކުގައި ޝަހީދުކޮށްލި ފަލަސްތީނު މީހުންގެ އަދަދު 21،320 އަށް އަރާފައިވާ ކަމަށް ބުންޏެވެ. މިއީ ހިސާރުކޮށްފައިވާ އޮންނަ ޣައްޒާގެ އާބާދީގެ ގާތްގަނޑަކަށް އެއް ޕަސެންޓާ އެއްވަރުގެ އަދަދެކެވެ.

އޮކްޓޫބަރު 7 ގައި ހަމާސް އިން އިޒްރޭލަށް ހަމަލާދީ ހާހެއްހާ މީހުން މަރާލުމުން ހަމާސް ނައްތާލުމުގެ ނަމުގައި އިޒްރޭލުން ދޭން ފެށި ހަމަލާތަކުގައި މިހާތަނަށް މަރުވި މީހުންގެ ތެރޭގައި ގިނައީ ކުޑަކުދިންނާއި އަންހެނުންނެވެ. ހަމަލާތައް ހުއްޓާލަށް އެކި ގައުުތަކުންނާއި ޖަމާއަތްތަކުން ގޮވާލަމުން ދާއިރު ވެސް އިޒްރޭލުގެ އާދައިގެމަތިން އެ ގޮވައިލުންތަކަށް އިޖާބައެއް ނުދެ އެވެ.