ޑްރަގް ގާނޫނަށް ބޮޑު އިސްލާހެއް، އަމުރު ނެތި ފަރުވާ އަށް ފޮނުވާ ގޮތް ހަދަނީ

މަސްތުވާތަކެތި ބޭނުންކުރާ މީހުން، ކޯޓު އަމުރެއް ނެތި ރިހެބިލިޓޭޓް ކުރެވޭ ގޮތަށް މަސްތުވާތަކެއްޗާ ބެހޭ ގާނޫނަށް އިސްލާހު ގެންނަން ނިންމާފައިވާ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.

މިނިސްޓަރު އުމަރު މީގެ ދެ ހަފުތާ ކުރިން "މިހާރު" އަށް ދެއްވި ހާއްސަ އިންޓަވިއުގައި ވިދާޅުވީ މަސްތުވާތަކެއްޗާ ބެހޭ ގާނޫނަށް އިސްލާހު ގެންނަން މި މަހު ހުށަހަޅުއްވާނެ ކަމަށެވެ. އޭރުން މަސްތުވާތަކެތީގެ ފަރުވާގެ މަގު ކުރުވެ، ފަރުވާ އެތައް ގުނައެއް އަވަސް ވާނެ ކަމަށް ވެސް ވިދާޅުވި އެވެ.

މިހާރު އަމަލުކުރާ އުސޫލާ ގުޅޭ ގޮތުން އުމަރު ވިދާޅުވީ މަގުމަތީގައި މަސްތުވެފައި ހުންނަ މީހާ ނަގައިގެން ވަރަށް ގިނަ މަރުހަލާތައް ކަޑައްތުކުރަން ޖެހޭ ކަމަށެވެ. އެ މީހެއްގެ ކުޑަކަމުދާތަކެތި މަސްތުވާތަކެއްޗަށް ޕޮޒިޓިވް ވެއްޖެ ނަމަ، މައްސަލަ ތަހުގީގުކޮށް ޕްރޮސެކިއުޓަ ޖެނެރަލްގެ އޮފީހަށް ފޮނުވައި ގޮތް ނިންމަނީ ކޯޓުންކަން ފާހަގަކުރެއްވި އެވެ.

ބައެއް ފަހަރަށް މައްސަލަތައް ނިންމަން ހަތަރު އަހަރު ހޭދަވެފައިވާ ކަމަށް މިނިސްޓަރު ވިދާޅުވި އެވެ.

"އަޅުގަނޑު މިހާރު މި ވަކާލާތު ކުރަނީ ސީދާ ރިހެބަށް ފޮނުވާ ގޮތަށް،" އުމަރު ވިދާޅުވި އެވެ.

އެ ގޮތަށް ފޮނުވާނީ، މިނިސްޓަރު ވިދާޅުވި ގޮތުގައި، ފުލުހުންގެ އިތުރުން އަދި އެހެން ފަރާތަކުން ވެސް އެ މީހެއްގެ ކުޑަކަމުދާތަކެތި ނަގައި ޓެސްޓް ކުރުމަށް ފަހު، އެ ދެ ފަހަރު ވެސް މަސްތުވާތަކެއްޗަށް ޕޮޒިޓިވް ވުމުންނެވެ. ފުލުހުން އޭރުން އެ މީހަކީ ފަރުވާ އަށް ޝަރުތު ފުރިހަމަވެފައިވާ މީހެއް ކަމަށް ވެސް އުމަރު ވިދާޅުވި އެވެ.

އެ ބަދަލާއެކު މައްސަލަތައް އަވަސްވުމުގެ އިތުރުން އިދާރީ އެތައް ހަރަދުތަކެއް ވެސް ކުޑަވެގެންދާނެ ކަމަށް މިނިސްޓަރު ދެކެވަޑައިގަންނަވަ އެވެ.

ގާނޫނަށް އިސްލާހު ގެނައުމަށް ފަހަރެއްގައި ފުލުހުންގެ ގާނޫނަށް ބަދަލުތަކެއް ގެންނަން ޖެހިދާނެ ކަމަށާއި އެކަމުގައި އެޓާނީ ޖެނެރަލާއި ޕޮރޮސިކިއުޓާ ޖެނެރަލާ އެކު މަޝްވަރާކުރައްވަމުން އަންނަ ކަމަށް މިނިސްޓަރު އުމަރު ވިދާޅުވި އެވެ.