ވަޒީރުންނަށް ރުހުން ދިނުމުގެ މައްސަލަ ވޯޓަށް ނާހައި ރިޔާސަތުން އަނބުރާ ފޮނުވައެއް ނުލެވޭނެ: ޓޮމް

ސަރުކާރުގެ މިނިސްޓަރުންނަށް ރުހުން ދިނުމުގެ މައްސަލަ އެޖެންޑާގައި ހިމެނުމަށް ފަހު، ނިޒާމީ މައްސަލައަކާ ގުޅުވައިގެން އެ މައްސަލަ ކޮމިޓީ އަށް ފޮނުވުމުގެ ބާރެއް ރިޔާސަތަށް ނޯންނާނެ ކަމަށް މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒު އައްޔަންކުރައްވާފައިވާ 22 މިނިސްޓަރުންނަށް ރުހުން ދިނުން މިއަދުގެ ޖަލްސާއަށް އެޖެންޑާ ކުރި އެވެ. ޖަލްސާ ފެށުމާ އެކު ތުޅާދޫ ދާއިރާގެ އެމްޑީޕީ މެމްބަރު ހިސާން ހުސެއިން ވަނީ މިނިސްޓްރީތަކުގެ މެންޑޭޓު ފާސްނުކޮށް މިނިސްޓަރަށް ޒިންމާތައް އަދާ ކުރެވޭނެކަމުގެ ގާބިލުކަން މަޖިލީހަށް ވަޒަން ނުކުރެވޭނެ ކަމަށް ވިދާޅުވެ ނިޒާމީ މައްސަލައެއް ފާހަގަ ކުރައްވައިފަ އެވެ.

މަޖިލީހުގެ ރިޔާސަތުގައި އިންނެވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވަނީ ހިސާންގެ އެ ވާހަކައާ ގުޅިގެން މިނިސްޓަރުންނަށް ރުހުން ދިނުމުގެ މައްސަލަ އަނބުރާ ކޮމިޓީ އަށް ފޮނުވާލަން ނިންމަވައިފަ އެވެ.

އެ މައްސަލާގައި މަޖިލީހުގައި މިއަދު ވާހަކަ ދައްކަވަމުން ޓޮމް ވިދާޅުވީ މަޖިލީހުގައި މައްސަލައެއް އެޖެންޑާ ކުރުމަށް ފަހު ޖަލްސާ ފެށުމުން އެޖެންޑާ އިން މަސައްކަތްތައް އުނި ކުރުމުގެ ބާރެއް ރިޔާސަތަކަށް ނުލިބޭ ކަމަށެވެ.

"ތުޅާދޫ ދާއިރާގެ މެންބަރު ހުށަހަޅުއްވާ ނިޒާމީ މައްސަލައަކުން މިތަނުގައި ތިބި 79 މެންބަރުންގެ މަސްއޫލިއްޔަތުތައް އަދާ ކުރުމަށް ހުރަސް އެޅޭ ގޮތަކަށް އިއްޒަތްތެރި ރައީސަކަށް ނުނިންމޭނެ. އިއްޒަތްތެރި ރައީސް ވެސް އަމަލު ކުރަން ޖެހޭނީ މަޖިލީހުގެ ގަވައިދަށް،" ޓޮމް ވިދާޅުވި އެވެ.

ޓޮމް ވިދާޅުވީ ނިޒާމީ މައްސަލައެއް ނަގައިގެން ކޮމިޓީ ރިޕޯޓެއް އަނބުރާ ފޮނުވާލުމަކީ މަޖިލީހުގެ ގަވައިދު ތަންދޭ ކަމެއް ނޫން ކަމަށެވެ.

މިހާތަނަށް އަމަލު ކޮށްފައިވާ ގޮތުން ކޮމިޓީ ރިޕޯޓެއް އަނބުރާ ފޮނުވާލަން ބޭނުންވެއްޖެ ނަމަ ހުށަހަޅައި ތާއީދުކޮށް ވޯޓު ގަޑީގައި ވޯޓަކަށް އަހަން ޖެހޭ ކަމަށް އޭނާ ވިދާޅުވި އެވެ.

"ވަޒީރުންނަށް ރުހުން ދިނުމުގެ މައްސަލަ ވެސް މަޖިލީހުގެ ޗެމްބަރުން ގޮތެއް ކަނޑަނާޅާ ފޮނުވާލެވިގެން ނުވާނެ،" ޓޮމް ވިދާޅުވި އެވެ. ވަޒީރުންނަށް ރުހުން ދިނުމުގެ މައްސަލަ ފޮނުވާފައިވާތާ މަހެއްވާ އިރު، މައްސަލަ އަދިވެސް ގޮތެއް ނުނިންމާ ބާއްވާފައިވާ ކަމަށް ޓޮމް ވިދާޅުވި އެވެ. ދައުލަތުގެ އެއް ބާރުން ފޮނުވާ މައްސަލަ ވީއެންމެ އަވަހަށް ނިންމުމަކީ މަޖިލިސް ރައީސްގެ ޒިންމާއެއް ކަމަށް ވެސް އޭނާ ވިދާޅުވި އެވެ.