ޑޮލަރުގެ މައްސަލަ: ޓޮމް ގޮވާލީ ވިޔަފާރިވެރިންނާ މަޝްވަރާކޮށް މެދުމިނުގެ ހައްލެއް ހޯދަން

ބޭރު ފައިސާގެ ގަވައިދަށް ގެނައި އިސްލާހާ އެކު ކުރިމަތިވެފައިވާ މައްސަލަތައް ހައްލުކުރުމުގައި ބޮޑެތި ވިޔަފާވެރިންނަށް ސިޔާސީ ގޮތުން ގޮންޖެހުމުގެ ބަދަލުގައި މަޝްވަރާ ކޮށްގެން މެދުމިނުގެ ހައްލަކަށް ދިޔުމަށް މަހިިބަދޫ ދާއިރާގެ މެންބަރު އަދި އަހުމަދު ތޯރިގު (ޓޮމް) ގޮވާލައްވައިފި އެވެ.

ޓޫރިޒަމް ދާއިރާ އިން ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ލާޒިމްވާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގަވައިދަށް ގެނައި އިސްލާހަށް ރިސޯޓް ދާއިރާގެ ބޮޑެތި ވިޔަފާރިތަކުން ވަނީ ދެކޮޅު ހަދައިފަ އެވެ.

ނަމަވެސް ސަރުކާރަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ތަކުރާރުކޮށް ވަނީ އެ ގަވައިދު ބަދަލެއް ނުކުރައްވާނެ ކަމަށް ވިދާޅުވެފަ އެވެ.

ރައްޔިތުންގެ މަޖިލީހުގައި މިރޭ ބޭއްވި ބަޖެޓް ބަހުސްގައި ޕީއެންސީގެ ނައިބު ރައީސް ޓޮމް ވިދާޅުވީ ޑޮލަރުގެ ދަތިކަން ހައްލު ކުރުމަށްޓަކައި ދައުލަތުން އަޅަމުން އަންނަ ފިޔަވަޅުތަކާ ދޭތެރޭ ވިސްނާލަން ޖެހޭ ކަމަށެވެ.

ފުރަތަމަ ކަމަކަށް، ގައުމުގެ ބޮޑެތި ވިޔަފާރިވެރިންނަށް ބަދުބަސް ބުނުން ހުއްޓާލަން ސަރުކާރާއި ޕީއެންސީގެ މަޖިލިސް މެންބަރުންނާއި ސިޔާސީ ފަރާތްތަކާއި އެކްޓިވިސްޓުންނަށް ގޮވާލާ ކަމަށް ޓޮމް ވިދާޅުވި އެވެ.

"ތަފާތު ނަންތަކުން އެ ވިޔަފާރިވެރިންނާ މުހާތަބުކުރުމާއި ސޯޝަލް މިޑިއާގެ ވަސީލަތްތަކުން ވިޔަފާރިންނަށް ހަޖޫޖަހައި ގޮންޖެހުން ހުއްޓާލަން ޖެހޭ،" ޓޮމް ވިދާޅުވި އެވެ.

ރާއްޖޭގެ އިގްތިސާދާއި މާލީ ކަންކަން އޮތީ ރަނގަޅު ހިސާބެއްގައި ނޫން ކަމާއި މި ހާލަތުގައި ފުންނާބު އުސް ވިޔަފާރިވެރިންނާ ސިޔާސީ ގޮތުން ދިމާކުރުމަކީ ރަނގަޅު ގޮތެއް ނޫން ކަމަށް ޓޮމް ވިދާޅުވި އެވެ.

އެންމެ ރަނގަޅު ގޮތަކީ މަޝްވަރާ ކޮށްގެން ކަންކަން ހައްލުކުރުން ކަމަށާއި ސަރުކާރާއި ވިޔަފާރިވެރިން މަޝްވަރާ ކޮށްގެން ޑޮލަރު މައްސަލާގައި މެދު މިނުގެ ހައްލަކަށް އަންނާނެ ކަމަށް އުންމީދު ކުރައްވާ ކަމަށް އޭނާ ވިދާޅުވި އެވެ.

މަރުކަޒީ ބޭންކް އެމްއެމްއޭ އިން އާންމުކުރި އާ ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ވިޔަފާރިތަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.

ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ.

ކެޓަގަރީ "ބީ" ގައި ހިމެނެނީ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

ނަމަވެސް ރާއްޖޭގެ ޓޫރިޒަމް ދާއިރާގެ އެންމެ ބޮޑެތި ބައެއް ވިޔަފާރިތަކުން ވަނީ އެ ގަވައިދަށް އަމަލު ކުރެވެން ނެތް ކަމަށް ބުނެފަ އެވެ. އެކަމަކު، ސަރުކާރުގެ ވިސްނުމަކީ އިގްތިސާދަށް ބޮޑު ފައިދާއެއް ލިބޭނެ ކަމަށް ލަފާކޮށްފައިވާ އެ ގަވާއިދުގައިވާ ގޮތަށް ކަންކަން ތަންފީޒު ކުރުމެވެ.