އީވާ ނެތި ނަޝީދުގެ މައްސަލަ ކުރިއަށް ނުގެންދެވޭނެ: އަމީންއާއްމު

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ހުށަހަޅާފައިވާ މައްސަލަ ކުރިޔަށް ގެންދެވޭނީ މަޖިލީހުގެ ނައިބު ރައީސް އީވާ އަބްދުﷲ ރިޔާސަތުގައި އިންނަވައިގެން ކަމަށް ވިދާޅުވެ އަމީންއާންމު ފާތިމަތު ނިއުޝާ މިއަދުގެ ޖަލްސާ ނިންމަވާލައްވައިފި އެވެ.

މަޖިލިސް ރައީސްގެ މަގާމުން ނަޝީދު ވަކި ކުރުމުގެ މައްސަލަ މިއަދަށް އެޖެންޑާ ކޮށްފައި ވަނިކޮށް އީވާ ވަނީ އާލާސްކަންފުޅާ އުޅުއްވާތީ މަޖިލީހަށް ހާޒިރު ނުވެވޭނެ ކަމަށް އަންގަވައި ސަލާން ފޮނުވައިފަ އެވެ.

ނަމަވެސް އެމްޑީޕީގެ ޕާލިމެންޓަރީ ގްރޫޕުން މިއަދު އަމީންއާންމަށް ފޮނުވި ސިޓީއެއްގައި ބުނީ އީވާ އަށް ޖަލްސާ އަށް ހާޒިރު ނުވެވޭނެ ކަމަށް އަންގާފައިވާތީ މަޖިލީހުގެ ގަވައިދުގެ 44 ވަނަ މާއްދާގައި ބުނާ އިޖުރާއަތުގެ ދަށުން ޖަލްސާ ކުރިޔަށް ގެންގޮސްދޭން އެދޭ ކަމަށެވެ.

އެ މާއްދާގައި ބުނާ ގޮތުން މަޖިލީހުގެ ރައީސް އާއި ނައިބު ރައީސް އަށް ވެސް ޖަލްސާގެ ރިޔާސަތު ނުބެލެހެއްޓޭ ހާލަތެއްގައި ދެން ރިޔާސަތުގައި އިންނަވާނީ މެދުނުކެނޑި އެންމެ ގިނަ ދުވަހު ހިދުމަތް ކުރެއްވި މެންބަރެވެ. އެއީ ވިލުފުށީ ދާއިރާގެ މެންބަރު ހަސަން އަފީފް އެވެ.

އެމްޑީޕީން އެގޮތަށް އެދުން ނަމަވެސް މިއަދުގެ ޖަލްސާ ފެށުމުގެ ކުރިން ވާހަކަ ދައްކަވަމުން ނިއުޝާ ވިދާޅުވީ މަޖިލީހުގެ ގަވައިދުގެ 44 ވަނަ މާއްދާގައި ރިޔާސަތު ބަލަހައްޓާވާނެ ފަރާތްތައް ކަނޑައަޅާފައިވީ ނަމަވެސް މަޖިލިސް ރައީސް މަގާމުން ވަކި ކުރުމާ ގުޅޭ ވަކި ބާބެއް މަޖިލީހުގެ ގަވައިދުގައި ހިމަނައި އެ ޖަލްސާއެއްގެ ރިޔާސަތު ބެލެހެއްޓުމުގެ މަސްއޫލިއްޔަތު ކަނޑައެޅިގެން މަޖިލީހުގެ ރައީސްއާ ހަވާލު ކޮށްފައިވާ ކަމަށެވެ.

"އިއްޒަތްތެރި މެންބަރުން، ރައްޔިތުންގެ މަޖިލީހުގެ ރައީސް މަގާމުން ވަކި ކުރުމުގެ ގަރާރަކީ މަޖިލީހުގެ ގަވައިދުގެ 260 ވަނަ މާއްދާގެ (ނ) ގައި ބަޔާން ކުރާ މުއްދަތު ދިނުމަށް ފަހު އެންމެ އަވަހަށް އަންނަ ރަސްމީ ބަންދު ނޫން ދުވަހު ބާއްވާ ޖަލްސާ އަށް ހުށަހަޅަން ޖެހޭ ގަރާރަކަށް ވާތީ މާދަމާގެ މަޖިލީހުގެ ޖަލްސާ އަށް ވެސް މި ގަރާރު އަލުން އެޖެންޑާކޮށް އެ ޖަލްސާގެ ރިޔާސަތު ބެލެހެއްޓެވުމަށް ނައިބު ރައީސަށް ދަންނަވާނަން،" ނިއުޝާ ވިދާޅުވި އެވެ.

މަޖިލީހުގެ ގަވައިދުގައި ބުނާ ގޮތުން، މަޖިލީހުގެ ރައީސްގެ އިތުބާރު ނެތް ކަމުގެ މައްސަލައިގެ ރިޔާސަތު ބަލަހައްޓަވާނީ މަޖިލީހުގެ ނައިބު ރައީސެވެ. މަޖިލީހުގެ ނައިބު ރައީސް ވަޑައިނުގަންނަވާ ހާލަތެއްގައި ވާނެ ގޮތެއް ގަވާއިދުގައި ސާފުކޮށް ބުނެފައެއް ނެތެވެ.

އެނގިފައިވާ ގޮތުގައި މިދިޔަ ހަފުތާ އިން ފެށިގެން ހުމުގެ އާލާސްކަންފުޅެއްގައި އުޅުއްވާތާ ޓެސްޓު ހެއްދެވި އިރު އީވާ ވަނީ ޑެންގީ އަށް ޕޮޒިޓިވްވެފަ އެވެ.

މަޖިލީހުގެ މެޖޯރިޓީ އޮތް އެމްޑީޕީން ބުނެފައި ވަނީ ނަޝީދު ވަކި ކުރުމުގެ ގަރާރު ކުރިއަށް ނުގެންގޮސް މަޖިލީހުގެ އެއްވެސް މަސައްކަތަކަށް އެއްބާރުލުން ނުދޭނެ ކަމަށެވެ.

ނަޝީދު ރިޔާސަތުގައި އިންނަވައިގެން، އަންނަ މަހު 17 ގައި އިންތިހާބީ ރައީސް ޑރ. މުހައްމަދު މުއިއްޒު ކުރައްވާ ހުވާ ސައްހަ ނުވާނެ ކަމަށާއި އެ މަނިކުފާނުގެ ކެބިނެޓަށް ވެސް ރުހުން ނުދޭނެ ކަމުގެ އިންޒާރު ވެސް އެމްޑީޕީން ވަނީ ދީފަ އެވެ.