އަމީންއާންމުގެ ސިޓީއެއް ނަޝީދަށް: އީވާގެ މައްސަލަ ކުރިއަށް ގެންދެވޭނެ ގޮތްތަކެއް

ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތް ކަމުގެ މައްސަލަ މަޖިލީހުގެ ނިޒާމްގެ ތެރޭގައި ނުހުއްޓި ކުރިއަށް ގެންދެވޭނެ ގޮތެއް ހަމަޖައްސަވައި ދެއްވުމަށް މަޖިލީހުގެ ރައީސް މުހައްމަދު ނަޝީދުގެ އަރިހުން މަޖިލީހުގެ އަމީންއާންމު ފާތުމަތު ނިއުޝާ މިއަދު އެދިވަޑައިގެންފި އެވެ.

އީވާގެ މައްސަލަ މިއަދުގެ ޖަލްސާއަށް އެޖެންޑާ ކޮށްފައި އޮތަސް، އެ މައްސަލަ ކުރިއަށް ގެންދެވެން ނެތް ކަމަށް އަމީންއާންމު އިއުލާނުކުރެއްވީ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ނަޝީދު އަންގަވާފައިވާތީ އެވެ.

މަޖިލީހުގެ ގަވާއިދުގައި ބުނާ ގޮތުން، މަޖިލީހުގެ ނައިބު ރައީސްގެ އިތުބާރު ނެތް ކަމުގެ މައްސަލައެއް ކުރިއަށް ގެންދެވޭ ޖަލްސާއެއްގެ ރިޔާސަތުގައި އިންނަވާނީ މަޖިލީހުގެ ރައީސެވެ. އެ އާއެކު އީވާގެ އިތުބާރު ނެތް ކަމުގެ މައްސަލަ ކުރިއަށް ގެންދެވޭނެ ގޮތަކާމެދު ވަނީ ސުވާލު އުފެދިފަ އެވެ.

އަމީންއާންމު ނަޝީދަށް ފޮނުއްވި ތިން ސަފުހާގެ ދިގު ސިޓީއެއްގައި އޭނާ ވަނީ އެ މައްސަލަ ކުރިއަށް ގެންދެވިދާނެ ލަފާތަކެއް ވެސް ދެއްވައިފަ އެވެ.

އީވާގެ މައްސަލަ އެޖެންޑާ ކުރުމުގައި މަޖިލީހުގެ އާންމު ކޮމިޓީ އާ އެކު މަޖިލީހުގެ ދާއިމީ ކޮމިޓީތައް އަލުން އެކުލަވާނުލެވި އޮތުން ވެސް ހުރަހަކަށްވި އެވެ. އެއީ އެ މައްސަލައިގެ ބަހުސް ކުރުމާއި ދިފާއުވުމުގެ ވަގުތު އާންމު ކޮމިޓީން ކަނޑައަޅަން ޖެހޭތީ އެވެ.

އެކަމަކު ނިއުޝާގެ ސިޓީގައި ވިދާޅުވީ މަޖިލީހުގެ އާންމު ކޮމިޓީގެ މަސައްކަތްތައް މަޑުޖެހިފައި އޮތުމަކީ މަޖިލީހުގެ ނައިބު ރައީސް ވަކިކުރުމުގެ މައްސަލަ މަޖިލީހުގެ ޖަލްސާއަށް ހުށަނާޅައި މަޑުޖެއްސިދާނެ ސަބަބެއް ކަމަށް ފެނިވަޑައިނުގަންނަވާ ކަމަށެވެ.

އެގޮތުން، މަޖިލީހުގެ ދާއިމީ ކޮމިޓީތަކުގައި ތިއްބަވާ މެމްބަރުންގެ ނިސްބަތަށް އައި ބަދަލު، ޕާޓީތަކުގެ މެދުގައި އެއްބަސްނުވެވުނަސް، އެކަމާ ގުޅޭގޮތުން މަޖިލީހުން ގޮތެއް ކަނޑައެޅުމަށްޓަކައި އެ މައްސަލަ ދެން އެންމެ އަވަހަށް އޮންނަ މަޖިލީހުގެ އާންމު ޖަލްސާއަކަށް އެޖެންޑާކޮށް ދެއްވުމަށް އެ ސިޓީގައި ނަޝީދުގެ އަރިހުން އެދިވަޑައިގެންފައި ވެ އެވެ.

އަދި އީވާ ވަކިކުރުމުގެ މައްސަލައިގެ ރިޔާސަތު ބަލަހައްޓަވަން ނަޝީދު އުޒުރިވެރިވެވަޑައިގަންނަވާނަމަ، އެ މަސްއޫލިއްޔަތު، މަޖިލީހުގެ ގަވާއިދުގައިވާ ގޮތަށް އެހެން ފަރާތަކާ ހަވާލުކުރެއްވުން ވެސް ނިއުޝާ ހުށަހެޅުއްވި ހައްލުތަކުގެ ތެރޭގައި ހިމެނެ އެވެ.

"...ރިޔާސަތު ބެލެހެއްޓެވުމުގެ މަސްއޫލިއްޔަތު މަޖިލީހުގެ ގަވާއިދާ އެއްގޮތްވާ ގޮތުގެމަތިން މަޖިލީހުގެ ރައީސް ކަނޑައެޅިގެން އެހެން ފަރާތަކާ ހަވާލުކުރައްވައ،ި އެ ޖަލްސާގައި މަޖިލީހުގެ ގަވާއިދުގެ 205 ވަނަ މާއްދާގެ (ކ) ގައި ބުނާ ބަހުސްގެ ވަގުތުތަކާއި އަދަދުތައް މަޖިލީހުން ކަނޑައަޅައި، އެ ގަރާރުގެ މަސައްކަތް ކުރިއަށް ގެންދިއުމެވެ،" ދެވަނަ ހައްލެއްގެ ގޮތުގައި ނިއުޝާ ހުށަހެޅުއްވި އެވެ.

އެ ސިޓީގައި ނަޝީދަށް ހުށަހެޅުއްވި ތިން ވަނަ ހައްލަކީ އީވާގެ މައްސަލައިގެ ބަހުސް ކުރިއަށް ގެންދާނެ ގޮތަކާމެދު މަޖިލީހުން ގޮތެއް ކަނޑައެޅުމަށްޓަކައި އާންމު ޖަލްސާއަކަށް އެކަން އެޖެންޑާ ކުރުމެވެ.

ރިޔާސަތު ބެލެހެއްޓުވުމަށް އުޒުރުވެރިވެވަޑައިގަންނަވާ ކަމަށް އަންގަވައި ނަޝީދު ފޮނުއްވި ސިޓީގައި ރިޔާސަތު ބެލެހެއްޓެވުމުން އެއްކިބާވެވަޑައިގެންނެވި ނަމަވެސް، މަޖިލީހުގެ އެންމެހައި ކަންކަން ހިންގެވުމުގައި ދެމިހުންނަވާނެ ކަމަށާއި އަމީންއާންމުގެ މަސްއޫލިއްޔަތުތަކަށް ހުރަސްއެޅޭނެ އެއްވެސް ކަމަށް ނުކުރައްވާނެކަމުގެ ޔަގީންކަން ދެއްވާފައިވާ ކަން ވެސް ނިއުޝާ ވަނީ ފާހަގަކުރައްވައިފަ އެވެ.

"...މަޖިލީހުގެ ނައިބު ރައީސްގެ މަޤާމުން ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަކިކުރުމަށް ހުށަހަޅާފައިވާ ގަރާރުގެ މަސައްކަތް މަޖިލީހުގެ ނިޒާމްގެ ތެރޭގައި ނުހުއްޓި ކުރިއަށް ގެންދެވޭނެ ގޮތެއް ހަމަޖައްސަވައި ދެއްވުމަށް އަދަބުވެރިކަމާއެކު ދަންނަވަމެވެ،" ސިޓީ ނިންމަވާލައްވަމުން ނިއުޝާ ވިދާޅުވި އެވެ.