ނިއުޝާ، ފިލްޒާ އަދި ސާޖަންޓް އެޓް އާމްސް ތޮލްހަތުގެ ދައުރު ދަންމާލައިފި

ރައްޔިތުންގެ މަޖިލީހުގެ އިސް މަގާމުތަކުގައި މިހާރު ތިއްބެވި ތިން ބޭފުޅުންގެ ދައުރު ދަންމާލަން މަޖިލީހުން ފާސްކޮށްފި އެވެ.

މަޖިލީހުގެ މިއަދުގެ ޖަލްސާގައި ވަނީ މަޖިލިސް ގަވައިދުގައިވާ ގޮތުގެ މަތީން މަޖިލީހުގެ އަމީންއާންމު، ކައުންސެލް ޖެނެރަލް އަދި ސާޖަންޓް އެޓް އާމްސް އައްޔަންކުރުމަށް ވޯޓަށް އަހައިފަ އެވެ.

އަމީންއާންމުގެ މަގާމަށް އިއްތިފާގުން ފާސްކޮށްފައިވަނީ މިހާރު ވެސް އެ މަގާމުގައި ހުންނެވި ފާތިމަތު ނިއުޝާގެ ނަމެވެ. ކައުންސެލް ޖެނެރަލްގެ މަގާމުގައި މިހާރު ވެސް އެ މަގާމުގައި ހުންނެވި ފާތިމަތު ފިލްޒާ ބަހައްޓަން ފާސްކުރިއިރު، ސާޖަންޓް އެޓް އާމްސް ކަމަށް ހަމަޖައްސަން ފާސްކޮށްފައިވަނީ މިދިޔަ މާޗް މަހު އެ މަގާމަށް އައްޔަން ކުރި ތޮލްހަތު ހަސަން އެވެ.

މަޖިލިހުގެ ގަވައިދުގައި ބުނާ ގޮތުން އަލަށް އެކުލަވާލާ ކޮންމެ މަޖިލިހެއް އިންތިހާބުވެ މަސައްކަތް ފެށުމަށް ފަހު، ހިނގާ ފުރަތަމަ ދެ ދައުރު ނިމުމުގެ ކުރިން އަމީން އާންމަކާއި ކައުންސެލް ޖެނެރަލަކާއި ސާޖެންޓް އެޓް އާމްސްގެ މަގާމަށް ބޭފުޅަކު އައްޔަން ކުރަން ޖެހޭނެ އެވެ. އަދި ގަވައިދަށް އަމަލު ކުރަން ފެށުމަށް ފަހު ހިނގާ ފުރަތަމަ ދެ ދައުރު ނިމުމުގެ ކުރިން މަޖިލިހުން އެހެން ގޮތަކަށް ކަނޑަނާޅާ ހިނދަކު، ހިނގަމުންދާ މަޖިލިހުގައި އެ ތިން މަގާމަށް ބޭފުޅުން އައްޔަން ކުރަން ވާނެ ކަމަށް ގަވައިދުގައިވެ އެވެ.

ގަވައިދުގައި ބުނީ އަމީން އާންމު، ކައުންސެލް ޖެނެރަލް އަދި ސާޖަންޓް އެޓް އާމްސްގެ މަގާމަށް މީހުން އައްޔަން ކުރުމުގައި އެ މަގާމުތަކަށް ކުރިމަތިލުމުގެ ފުރުސަތު މަޖިލިހުގެ ރައީސް އާންމުކޮށް ހުޅުވާލަން ވާނެ ކަމަށެވެ. އަދި ޝަރުތު ހަމަވާ މީހުންގެ ނަންތައް މަޖިލިހުގެ ރައީސް މަޖިލިހަށް ހުށަހަޅައި އެއިން ކޮންމެ މަގާމަކަށް ބޭފުޅުން އައްޔަން ކުރާނީ މެމްބަރުންގެ އަޣުލަބިއްޔަތުން ފާސްވާ މީހެއް ކަމަށް ގަވައިދުގައިވެ އެވެ.

ނަމަވެސް މި ދައުރުގައި ވެސް އަދި މިދިޔަ ދައުރުގައި ވެސް މި މަގާމުތަކަށް ބޭފުޅުން އައްޔަންކުރީ އިއުލާނު ކުރުމެއް ނެތި އެވެ.

އަމީން އާންމާއި ކައުންސެލް ޖެނެރަލާއި ސާޖެންޓް އެޓް އާމްސްގެ މުއްދަތަކީ ފަސް އަހަރު ދުވަހެވެ.

މަޖިލިހުގެ ގަވައިދުގައިވާ ގޮތުން ރައްޔިތުންގެ މަޖިލިހުގެ ރައީސް އާއި ނައިބު ރައީސް ނެގުމަށް ފަހު، ދެން މަޖިލިހުގައި އެންމެ އިސް ބޭފުޅަކަށް ހުންނަވާނީ އަމީން އާންމެވެ. ސާޖެންޓް އެޓް އާމްސްއަކީ، ރައްޔިތުންގެ މަޖިލީހުގެ އަމީންއާންމުގެ މަގާމަށްފަހު ތިން ވަނައަށް އެންމެ އިސްވެރިޔާ އެވެ.