އިތުރުކުރި އަދަދާ އެކު ބަޖެޓް ޑެފިސިޓް 15 ބިލިއަނަށް

ސަޕްލިމެންޓްރީ ބަޖެޓަށް އިތުރު ކުރާ 6.5 ބިލިއަން ރުފިޔާއާ އެކު ދައުލަތުގެ ޑެފިސިޓް 15 ބިލިއަނަށް އަރާނެ ކަމަށް ފިނޭންސް މިނިސްޓްރީން އާންމުކުރި މައުލޫމާތުން ދައްކައިފި އެވެ.

ފިނޭންސް މިނިސްޓްރީގެ ސަޕްލިމެންޓްރީ ބަޖެޓު ރިޕޯޓުގައި ވާގޮތުން މިއަހަރުގެ ޑެފިސިޓް ހުންނާނީ ޖީޑީޕީގެ ނިސްބަތުން 14 ޕަސެންޓުގަ އެވެ. ކުރިން ޑެފިސިޓް ހުރީ ޖީޑީޕީގެ ނިސްބަތުން 8.3 ޕަސެންޓުގަ އެވެ. މިދިޔަ އަހަރު ދައުލަތުގެ ބަޖެޓު ޑެފިސިޓް ހުރީ 11 ބިލިއަން ރުފިޔާގަ އެވެ. އެއީ ޖީޑީޕީގެ ނިސްބަތުން 12 ޕަސެންޓެވެ.

ސަރުކާރުން އަންނަ އަހަރަށް ހުށަހަޅާ ބަޖެޓުގައި އެންމެ ބޮޑު އިސްކަމެއްދޭނީ ދައުލަތުގެ ބަޖެޓު ޑެފިސިޓް ޖީޑީޕީގެ ނިސްބަތުން ފަސް ޕަސެންޓުގައި ހިފެހެއްޓުމަށް ކަމަށް އެ މިނިސްޓްރީން ބުންޏެވެ.

މިއަހަރު ނިމޭ އިރު ދައުލަތުގެ ހަރަދު 47 ބިލިއަން ރުފިޔާއަށް އަރާނެ ކަމަށް ލަފާކުރެ އެވެ. އަދި ދައުލަތުގެ އާމްދަނީ 32 ބިލިއަން ރުފިޔާއަށް އަރާނެ ކަމަށް ލަފާކުރެ އެވެ.

ބަޖެޓަށް އިތުރުކުރަ ފައިސާ ހޯދަން ކަނޑައަޅާފައިވަނީ، ބަޖެޓު ސަޕޯޓު ލޯނުގެ ތިން ބިލިއަން ރުފިޔާ އާއި ޓީބިލުން 1.9 ބިލިއަން ރުފިޔާ އާއި ބޭރުން ހޯދި ލޯނުން އެއް ބިލިއަން ރުފިޔާ އެވެ.

ޑެފިސިޓަށް އިތުރު، 6.5 ބިލިއަން ރުފިޔާ އިތުރުވި ދައުލަތުގެ ދަރަންޏަށް ވެސް ވަނީ ކުރިން ލަފާ ކުރި އަދަދަށް ވުރެ އިތުރަށް ހަ ބިލިއަން ރުފިޔާ އިތުރުވެފަ އެވެ. މިއަހަރު ނިމޭ އިރު ދައުލަތުގެ ޖުމްލަ ދަރަނި ހުންނާނީ 120 ބިލިއަން ރުފިޔާގަ އެވެ.