ފެނަކައިގެ 200 މިލިއަނާއި މިފްކޯގެ 150 މިލިއަންގެ ލޯނަށް ސަރުކާރުން ގެރެންޓީ ދީފި

ފެނަކަ އިން ނެގި 200 މިލިއަން ރުފިޔާގެ ލޯނަކާއި މިފްކޯގެ 150 މިލިއަން ރުފިޔާގެ ލޯނަކަށް ސަރުކާރުން ގެރެންޓީ ދީފި އެވެ.

މާލިއްޔަތު ކޮމިޓީން އެދިގެން ފިނޭންސް މިނިސްޓްރީން ހިއްސާކުރި މައުލޫމާތުގައިވާ ގޮތުން ފެނަކަ އިން 200 މިލިއަން ރުފިޔާގެ ފައިނޭންސިން ނެގީ އެމްއައިބީއިންނެވެ. އެ ލޯނު ނެގީ 3.5 ޕަސެންޓްގެ ޕްރޮފިޓް ރޭޓުގަ އެވެ. އެ ލޯނު އަނބުރާ ދައްކާ އިރު 218 މިލިއަން ރުފިޔާ އެމްއައިބީ އަށް ދައްކަން ޖެހޭނެ އެވެ. މިދިޔަ ޖޫން 22 ވަނަ ދުވަހު ނެގި އެ ލޯނު ދައްކައި ނިމަން ޖެހޭނީ 2026 އަށެވެ.

މިފްކޯ އިން 150 މިލިއަން ރުފިޔާގެ ލޯނު ނެގީ ހަބީބް ބޭންކުންނެވެ. އެ ބޭންކުން ލޯނު ނެގީ ވެސް 8.89 ޕަސެންޓް އިންޓްރެސްޓް ރޭޓުގަ އެވެ. އެ ލޯނު އަނބުރާ ދައްކާ އިރު 160 މިލިއަން ރުފިޔާ ހޭދަކުރަން ޖެހޭ އިރު، ލޯނު އަނބުރާ ދައްކަން ނިންމަން ޖެހެނީ 2028 ވަނަ އަހަރު އެވެ. މިފްކޯ އިން މި ލޯނު ނަގާފައި ވަނީ ޖޫން 19 ގަ އެވެ.

ފެނަކަ އާއި އެމްއައިބީގެ ލޯނަށް ސަރުކާރުން ގެރެންޓީ ދީފައިވާ އިރު މިދިޔަ އަހަރު ވެސް ފިނޭންސް މިނިސްޓްރީން ވަނީ ސަރުކާރު ހިއްސާވާ ކުންފުނިތަކުން ނެގި ފަސް ލޯނަކަށް ގެރެންޓީ ދީފަ އެވެ. މިދިޔަ އަހަރު ގެރެންޓީ ދިން ލޯނުތަކުގެ އަދަދު 7.4 ބިލިއަން ރުފިޔާ އަށް އަރަ އެވެ.

މި އަހަރު ސަރުކާރުން ވަނީ ތިން ލޯނެއް ނަގައިފަ އެވެ. އެއީ ވޯލްޑް ބޭންކުން ނެގި ދެ ލޯނަކާއި ހަންގޭރިއަން އެގްޒިމް ބޭންކުން ނެގި ލޯނެކެވެ. އެ ލޯނުތަކުގެ ޖުމްލަ އަދަދު 108 މިލިއަން ޑޮލަރު (1.7 ބިލިއަން ރުފިޔާ) އެވެ.

މިދިޔަ އަހަރު 8 ލޯނަކަށް 6.7 ބިލިއަން ސަރުކާރުން ހޯދައިފައި ވެ އެވެ. ދައުލަތުގެ ޖުމްލަ ދަރަނި 100 މިލިއަނަށް ވުރެ މަތީގައި ހުރި އިރު 50 ބިލިއަން ރުފިޔާ އަކީ ބޭރުގެ ދަރަންޏެވެ. އެތެރޭގެ ދަރަންޏަކީ 59 ބިލިއަން ރުފިޔާ އެވެ. އެއީ އުފެއްދުންތެރިކަމުގެ ނިސްބަތުން 113 ޕަސެންޓެވެ.