އެއްވެސް އެގްރީމަންޓެއް ނުފޮރުވާނެ ކަމަށް ޔަގީން ކުރަން: މުއިއްޒު

އޭނާ އެކުލަވައިލާ ސަރުކާރު ވެރިކަމާ ހަވާލުވުމުގެ ކުރިން މިހާރު ހިނގާ ޓްރާންސިޝަނަލް މުއްދަތުގެ ތެރޭގައި ސަރުކާރުގެ އެކި އިދާރާތަކަށް ޓީމުތައް ދާނެ ކަމަށާއި މި ސަރުކާރުން ހަދާފައިވާ އެއްވެސް އެއްބަސްވުމެއް ނުފޮރުވާނެ ކަމަށް ޔަގީން ކުރައްވާ ކަމަށް ހޮނިހިރު ދުވަހުގެ ރިޔާސީ އިންތިހާބުގައި ރާއްޖޭގެ ވެރިކަމަށް ހޮވި ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އިންތިހާބުގެ ބޮޑު ކާމިޔާބީ ފާހަގަކުރަން ބޭއްވި ހަފުލާގައި ދިވެހި ރައްޔިތުންނާ މުހާތަބު ކުރައްވަމުން އެ މަނިކުފާނު ވިދާޅުވީ، އަންނަ ނޮވެމްބަރު 17 ގައި ވެރިކަމުގެ ހުވާ ކުރެއްވުމުގެ ކުރިން މައުލޫމާތު ހޯދަން ޓީމުތައް ސަރުކާރުގެ އިދާރާތަކަށް ދިއުމުން ޒިންދާރު ގޮތެއްގައި އަމަލު ކުރަން އެދިވަޑައިގަންނަވާ ކަމަށެވެ. އެ ކަން އެ ގޮތަށް މި ސަރުކާރުން ކުރާނެ ކަމުގެ ޔަގީންކަން އެބައޮތް ކަމަށް މުއިއްޒު ވިދާޅުވި އެވެ.

"އަޅުގަނޑުމެން ބޭނުންވާނެ ބަލަން މައުލޫމާތު. އެއީ އަޅުގަނޑު ބޭނުން ރައްޔިތުންނަށް ހަގީގީ މަސައްކަތް ކޮށްދޭން. ނަތީޖާ ނެރެދޭން. އެހެންވީމާ އެގްރީމަންޓެއްގެ އެއްބައި ފޮރުވާފައި އަނެއްބައި ދައްކައި ހެދީމަކާ ރަނގަޅެއް ނުވާނެ،" މުއިއްޒު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި، ޓްރާންސިޝަނަލް މުއްދަތުގައި ސަރުކާރުން ކަންކަން ކުރާނީ ވަރަށް ޒިންމާދާރު ގޮތެއްގައި ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހު ވެސް އިއްޔެ ދެއްވި އެވެ.

ރާއްޖޭގެ އާ ރައީސަކަށް މުއިއްޒު އިންތިހާބު ކުރުމާ ގުޅިގެން ރައީސް އިބްރާހިމް މުހައްމަދު ސޯލިހު އިއްޔެ ވަނީ އެ މަނިކުފާނާ ބައްދަލުކުރައްވައިފަ އެވެ.

މުއިއްޒުގެ ޓީމުން ރިޔާސީ އިންތިހާބަށް ކެމްޕެއިން ކުރިއިރު، އެންމެ ބޮޑަށް ފެންމަތި ކުރި އެއް ކަމަކީ މި ސަރުކާރުން ހަދާފައިވާ އެކިއެކި އެއްބަސްވުންތައް ހާމަނުކުރާ މައްސަލަ އެވެ. އޭގެ ތެރޭގައި އަމީނީ މަގު ހެދުމުގެ އެއްބަސްވުމާއި އިންޑިއާއާ އެކު ހަދާފައިވާ އެކިއެކި އެއްބަސްވުންތަކުގެ ވާހަކަ އޭރު ދެއްކި އެވެ.

އިންތިހާބީ ރައީސް މުއިއްޒު މިރޭ ވިދާޅުވީ، ނޮވެމްބަރު 17 ގައި އެ މަނިކުފާނު ވެރިކަމާ ހަވާލުވެވަޑައިގަންނަވާއިރު، މައުލޫމަތުތައް ލިބި، ހުންނާނީ ބާރު ސްޕީޑްގައި ސަރުކާރު ހިންގަން ފެށޭވަރު ވެފައި ކަމަށެވެ. އެކަމަކު، ރައްޔިތުންގެ މަޖިލިހުގެ އެއްބާރުލުމަށް މުއިއްޒު އެދިވަޑައިގަތެވެ.

"ރައްޔިތުންގެ މަޖިލިހުގައި ވެސް ތިއްބެވީ އިންތިހާބު ކުރެވިފައިވާ ބޭފުޅުން. އެ ބޭފުޅުން ވެސް ބޭނުންފުޅުވެލައްވާނެ ޑިމޮކްރެޓިކް ޕްރޮސެސް އަށް ރެސްޕެކްޓް ކުރައްވަން. އެހެންވީމާ މި ދުވަސްކޮޅު ވެސް އަޅުގަނޑު އެދެނީ އަދި ޔަގީން ކުރަނީ ރައްޔިތުންގެ މަޖިލިހުގެ ފުރިހަމަ އެއްބާރުލުން އަޅުގަނޑަށް ދެއްވާނެ ކަމަށް،" މުއިއްޒު ވިދާޅުވި އެވެ.

މާލޭގެ މޭޔަރުކަން ވެސް ކުރައްވާ މުއިއްޒު ވިދާޅުވީ، ރައްޔިތުންގެ މަޖިލިހުގެ ރައީސް މުހައްމަދު ނަޝީދާ އެކު މާދަމާ ބައްދަލުވުމެއް އެބައޮތް ކަމަށާއި އެ ވާހަކަ އެ މަނިކުފާނަށް ދަންނަވާނެ ކަމަށެވެ.