ބޭސްފަރުވާއަށް ފަހު އަދީބު ރާއްޖެ ވަޑައިގެންފި

22 ސެޕްޓެމްބަރ 2023

ޖަލު ހުކުމެއް ތަންފީޒު ކުރައްވަމުން ގެންދަވަނިކޮށް ސިންގަޕޫރަށް ބޭސްފަރުވާއަށް ވަޑައިގެންނެވި ކުރީގެ ނައިބު ރައީސް އަހުމަދު އަދީބު މިރޭ އެނބުރި ރާއްޖެ ވަޑައިގެންފި އެވެ.

ފާތިމަތު އަޖްފާން

ޑޮކްޓަރުންގެ ލަފައާ އެކު ބޭރުން ފަރުވާ ހޯއްދަވަން އަދީބު ސިންގަޕޫރަށް ވަޑައިގަތީ ޖުލައި 12 ވަނަ ދުވަހުގެ އެވެ. ކަރެކްޝަނަލް ސާވިސް އާއި ފުލުހުންގެ ބެލުމުގެ ދަށުން އެ ގައުމަށް ވަޑައިގަތުމުގެ ހުއްދަ ސަރުކާރުން ފުރަތަމަ ދިނީ 10 ދުވަހަށެވެ. ނަމަވެސް އެ މުއްދަތު ހަމަވުމުން ދިން މުއްދަތު ވެސް ހަމަވެ ފަހުން ވަނީ އަންނަ މަހުގެ ފުރަތަމަ ދުވަހާ ހަމައަށް އިތުރު ކޮށްދީފަ އެވެ.

އަދީބު އިސްވެ ހުންނަވައިގެން އުފެއްދެވި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އިން މިރޭ ބުނީ އަދީބު އެނބުރި ވަޑައިގަތީ ފަރުވާގެ ފުރަތަމަ މަރުހަލާ ނިމިފައި ވާތީ ކަމަށެވެ. އަދި އަންނަ މަހު އަނެއްކާވެސް ރާއްޖެއިން ބޭރަށް ދާން ޖެހޭނެ ކަމަށް ޑޮކްޓަރުން ލަފާ ދީފައިވާ ކަމަށް އެ ޕާޓީން ބުންޏެވެ.

ޑޮކްޓަރުންގެ ލަފައާ އެއްގޮތަށް ބޭރަށް ވަޑައިގަތުމަށް އަދީބަށް ސަރުކާރުން ހުއްދަ ދެއްވާފައިވާތީ އެކަމަށް ޝުކުރު އަދާކުރާ ކަމަށް ވެސް އެމްޓީޑީއިން ބުންޏެވެ.

Update on MTD President @Ahmed_Adeeb's Medical Treatment — (22 September 2023 - 10:00 PM)

We are pleased to announce that the first phase of Mr. Adeeb's medical treatments has been successfully completed. As per the recommendation of his doctors, the second and final phase of… pic.twitter.com/eoxQm3hE0O
— Maldives Third-Way Democrats (@MTDSecretariat) September 22, 2023

އެމްއެމްޕީއާރްސީގެ ކޮރަޕްޝަން މައްސަލާގައި އަދީބަށް 20 އަހަރުގެ ޖަލު ހުކުމެއް އިއްވައި، އަދި ދެ މިލިއަން ރުފިޔާއިން ޖޫރިމަނާ ކުރީ 2020 ވަނަ އަހަރު އެވެ. އެއީ ދައުލަތާ އެކު ހެދި އިއުތިރާފު އެއްބަސްވުމާ އެކު ދިން ލުއި އަދަބެވެ. އަދީބު ޖަލަށްލާން ހުކުމްކުރި ނަމަވެސް ސިއްހީ ސަބަބުތަކަކާ ހެދި އޭނާ ހުކުމް ތަންފީޒު ކުރައްވަނީ ގޭ ބަންދުގަ އެވެ.

އަދީބު ވަނީ ޕެރޯލްގެ ދަށުން އަދަބު ލުއިކުރަން ހުށަހަޅައިފަ އެވެ. އެކަމަކު އެ ހުށަހެޅުމަށް އަދި ގޮތެއް ނުނިންމަ އެވެ.

Comments