އަލީ އާރިފް ޖޭޕީގެ ސެކްރެޓަރީ ޖެނެރަލްކަމުން އިސްތިއުފާ ދެއްވައިފި

ޖުމްހޫރީ ޕާޓީގެ ސެކްރެޓަރީ ޖެނެރަލް އަލީ އާރިފް އެ މަގާމުން މިއަދު އިސްތިއުފާ ދެއްވައިފި އެވެ.

އޮކްޓޫބަރު 23، 2019 ގައި ޖޭޕީގެ އިދާރީ އެންމެ އިސް މަގާމަށް އައްޔަންކުރި ކެލާ ދާއިރާގެ ކުރީގެ މެމްބަރު އަލީ އާރިފް އެ މަގާމުން އިސްތިއުފާ ދެއްވިކަން އެ ޕާޓީގެ އިސް އޮފިޝަލަކު "މިހާރު" އަށް ކަށަވަރު ކޮށްދެއްވި އެވެ.

"މިއަދު ބޭއްވި ކައުންސިލްގެ ބައްދަލުވުމަށް ފަހު އަލީ އާރިފް ވަނީ ޕާޓީގެ މުވައްޒަފުންނާ ބައްދަލުކުރައްވައި އިސްތިއުފާ ދެއްވި ކަމަށް ވިދާޅުވެފައި،" އޮފިޝަލް ވިދާޅުވި އެވެ.

އެކަމަކު އޭނާ އަދި ޖޭޕީން ވަކިނުވާ ކަމަށް ވެ އެވެ.

މި މަހުގެ 30 ގައި ބާއްވާ ރިޔާސީ އިންތިހާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ޖޭޕީން މިއަދު ނިންމިއިރު އަލީ އާރިފަކީ އެންމެ ގިނަ ބައެއްގެ ތާއީދާ އެކު ދެވަނަ ބުރަށް ދަތުރުކުރެއްވި ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުގެ އާއިލީ ބޭފުޅެކެވެ. އެކަމަކު އޮގަސްޓް 2019 ގައި ޕީޕީއެމުން ވަކިވެވަޑައިގެން ޖޭޕީއާ ގުޅިވަޑައިގެންނެވި ފަހުން މުއިއްޒާ މާ ބޮޑު ގުޅުމެއް ނުބާއްވާ ކަމަށް އާއިލާގެ ބޭފުޅަކު ވިދާޅުވި އެވެ.