ރީތި ޕާސިން ގޭމެއް ކުޅެ ބޮޑު ތަފާތަކުން ރާއްޖެ ބަލިކޮށް އިންޑިއާ ފައިނަލަށް

ހިތްގައިމު ރީތި ޕާސިން ގޭމެއް ކުޅެ ރާއްޖޭގެ މައްޗަށް 8-0 ގެ ތަފާތުބޮޑު ނަތީޖާއަކުން މޮޅުވެ 16 އަހަރުންދަށުގެ ސާފް ޗެމްޕިއަންޝިޕްގެ ފައިނަލަށް އިންޑިއާ ދަތުރުކޮށްފި އެވެ.

ބޫޓާނުގައި މިހާރު ކުރިއަށްދާ މުބާރާތުގައި އިންޑިއާގެ އެންމެ ބޮޑު ތަފާތަކީ އެ ޓީމުން ދަމަހައްޓަމުން އަންނަ ބޯލް ޕޮޒެޝަނާއި ޕާސިން ގޭމެވެ. ގުރޫޕް ސްޓޭޖުގައި ބަންގްލަދޭޝް އަދި ނޭޕާލާ ދެކޮޅަށް ކުޅުނު ދެ މެޗު ގައި ވެސް އިންޑިއާއިން އެ ސްޓައިލް ދެމެހެއްޓި އެވެ. އެ ދެ މެޗު އިންޑިއާ މޮޅުވީ އެއް ނަތީޖަ އަކުންނެވެ. ދެ މެޗު ވެސް ކާމިޔާބު ކުރީ 1-0 ންނެވެ.

އިންޑިއާގެ އެމްޑީ އަބްޝާ އާއި އައިރްބޯލަންގް ކަރްތަންގްމާވް ވަނީ ކޮންމެ ކުޅުންތެރިޔަކު ދެ ލަނޑު ޖަހައިފަ އެވެ.

ފުރަތަމަ ހާފުގައި ރާއްޖޭގެ ޓީމަށް އެއް ވެސް މަސައްކަތެއް ނުކުރެވުނެވެ. އިންޑިއާ އެ ހާފް ނިންމާލީ ދެ ލަނޑުގެ ލީޑްގައި އޮވެގެންނެވެ.

މެޗުގެ 21 ވަނަ މިނެޓްގައި ވިޝާލް ޔަދޭވް އިންޑިއާ އަށް ލީޑް ނަގައިދިނީ މުހައްމަދު ކައިފް ނަގައިދިން ބޯޅައިންނެވެ. ދެވަނަ ލަނޑު ކައިފް ޖެހީ ނެގި ކޯނަރަ ބޮލުން ގޯލްގެ ތެރެއަށް ވައްދައިލައިގެންނެވެ.

ދެވަނަ ހާފްގެ ކުރީކޮޅު ލެވިޝް ޒަންގްމިންލުން ވަނީ ރޫޅި ހާވިއާ ވެފައި އޮތް ރާއްޖޭގެ ޑިފެންސްތެރެއިން ވަދެ އިންޑިއާގެ ތިންވަނަ ލަނޑު ޖެހައި ދީފަ އެވެ. އޭގެ 10 މިނެޓް ފަހުން ކަރްތަންގްމާވް އިންޑިއާގެ ހަތަރު ވަނަ ލަނޑު ޖެހި އެވެ.

މަންބްހާ މަލަންގިއަން އިންޑިއާގެ ފަސްވަނަ ލަނޑު ޖެހީ 70 ވަނަ މިނެޓްގަ އެވެ. އަބްޝާ ވަނީ 78 އަދި 84 ވަނަ މިނެޓްގައި އިންޑިއާ އަށް ލަނޑުތައް ޖަހައި ދީފަ އެވެ. އޭނާގެ ދެވަނަ ލަނޑު ޖެހުމުގެ ކުރިން ކަރްތަންގްމާވް އިންޑިއާ އަށް ހަތްވަނަ ލަނޑު ޖަހައިދިނެވެ.

ފައިނަލުގައި އިންޑިއާ އާ ވާދަކުރަން ޖެހޭނީ ބަންގްލަދޭޝާއި ޕާކިސްތާނުގެ ތެރެއިން ޓީމެކެވެ. ގުރޫޕް ބީ ގެ އެއްވަނަ ހޯދި ޕާކިސްތާނާއި އިންޑިއާ ހިމެނޭ ގުރޫޕް ބީ ގެ ދެވަނަ ހޯދި ބަންގްލަދޭޝް ސެމީ ފައިނަލު ދެވަނަ މެޗުގައި މިއަދު ވާދަކުރާނެ އެވެ.