އުފަން ރަށުން މުއިއްޒަށް ރަތްދޫލައިގެ ހޫނު މަރުހަބާއެއް!

އިދިކޮޅު ކޯލިޝަންގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒުގެ އުފަން ރަށް، ހއ. ވަށަފަރުން އޭނާއަށް ރަތް ދޫލައިގެ ހޫނު މަރުހަބާއެއް މިއަދު ކިޔައިފި އެވެ.

ރިޔާސީ އިންތިހާބުގެ ކެމްޕެއިނަށް، ރާއްޖޭގެ އެންމެ އުތުރަށް ފެއްޓެވި ދަތުރުގައި، މުއިއްޒު މި ރަށަށް ވަޑައިގަތުމުން، އޭނާ އަށް މަރުހަބާ ކިޔުމަށް، 900 އެއްހާ މީހުންގެ އާބާދީއެއް އޮތް މި ރަށުން ގިނަ ބަޔަކު ނުކުތެވެ. އެއާއެކު އެންމެން އެއް އަޑަކުން ގޮވާލާފައި ވަނީ "ވަށަފަރު މުއިއްޒު" ރިޔާސީ އިންތިހާބުން ހޮވުމަށެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ހައުސިން މިނިސްޓަރުކަން ކުރެއްވި މުއިއްޒުގެ ބައްޕަ، ޝެއިހު ހުސެއިން އަބްދުއްރަހުމާނަކީ މި ރަށަށް އުފަން ބޭފުޅެކެވެ. މުއިއްޒު ލިބިވަޑައިގަތީ މާލޭގެ ބޭފުޅަކާ ކައިވެނި ބައްލަވައިގެންނެވެ.

މި ރަށުގެ ފުރަތަމަ ޝެއިހު، ހުސެއިން އަބްދުއްރަހްމާނަކީ ކުރީގެ ރައީސް މައުމޫން އަބްދުލް ގައްޔޫމާއެކު މިސްރުން ތައުލީމް ހާސިލްކުރެއްވި ބޭފުޅެކެވެ. ދެހާސް ފަނަރަ ވަނަ އަހަރުގައި އޭނާ އަވަހާރަވިއިރު އުމުރުން 71 އަހަރެވެ.

އެ އާއިލާގެ އެހެން ބޭފުޅުން ދިރިއުޅުއްވަނީ ވަށަފަރުގަ އެވެ.

މި ރަށުން ވާހަކަދެއްކި މީހަކު ބުނީ މުއިއްޒު ހައުސިން މިނިސްޓަރުކަމުގައި އުފަން ރަށަށް ހާއްސަ އިސްކަމެއް ދެއްވި ކަމަށެވެ. ބަނދަރުގެ ދަތިކަން ހައްލުކޮށްދިނުމުގެ އިތުރުން ޒުވާނުން ކުޅޭނެ ބަށިކޯޓަކާއި ފުޓްސަލް ދަނޑެއް ހަދައި، ޒުވާނުންނަށް ހިތްހަމަޖެހުންތަކެއް ގެނެސްދިން ކަމަށް ބުންޏެވެ.

"މި ރަށަށް ވެސް ދޭތެރެދޭތެރެއިން ވަޑައިގަންނަވާނެ. ރަށު މީހުންނާ ގާތް ގުޅުމެއް ބާއްވާނެ." އޭނާ ބުންޏެވެ.