ޔާމީނާ ވެރިކަން ހަވާލުކޮށްފާނެތޯ ސުވާލު ކުރުމުން މުއިއްޒުގެ ސީދާ ޖަވާބެއް ނެތް!

އަންނަ މަހުގެ 9 ގައި ބާއްވާ ރިޔާސީ އިންތިހާބު ކާމިޔާބު ވެއްޖެ ނަމަ އިސްތިއުފާ ދެއްވުމަށް ފަހު، ކުރީގެ ރައީސް އަބްދުﷲ ޔާމީނަށް ވެރިކަން ހަވާލު ކޮށްފާނެތޯ ކުރި ސުވާލަށް ޕީޕީއެމް/ޕީއެންސީގެ ކެންޑިޑޭޓް އަދި މާލޭގެ މޭޔަރު ޑރ. މުހައްމަދު މުއިއްޒު ސީދާ ޖަވާބެއް ރޭ ނުދެއްވި އެވެ.

އިންތިހާބުގައި ވާދަކުރުމުގެ ފުރުސަތު ޔާމީނަށް ގެއްލުމާ އެކު އެ މަނިކުފާނުގެ އެދިވަޑައިގަތުމަކީ އިންތިހާބު ބޮއިކޮޓް ކުރުމެވެ. ނަމަވެސް ޕީޕީއެމް/ޕީއެންސީގެ ސެނެޓުން މުއިއްޒުގެ ފަހަތަށް އަރަން ނިންމުމާ އެކު ޕާޓީ ވަރަށް ބޮޑަށް ދެބައިވި އެވެ.

ނަމަވެސް ދެ ޕާޓީގެ ލީޑަޝިޕުން ރޭ ވަނީ އެއްގަލަކަށް އަރައި، ނޫސްވެރިންގެ ބައްދަލުވުމެއް ބާއްވައި ރިޔާސީ އިންތިހާބުގައި ޔާމީނާއި މުޅި ލީޑަޝިޕް ވެސް މުއިއްޒު އެންޑޯޒް ކުރަން ނިންމިކަން އިއުލާން ކޮށްފަ އެވެ.

ކުއްލިއަކަށް ވިސްނުން ބަދަލު ކުރެއްވީ ކީއްވެގެންތޯ ސުވާލު ކުރުމުން ވަކި ޖަވާބެއް ލީޑަޝިޕުން ނުދިނެވެ. އެކަމަކު، ވިދާޅުވީ އެއީ ޔާމީންގެ މަޝްވަރާގެ މަތިން ނިންމަވާ ނިންމުންތަކެއް ކަމެކެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވި ގޮތުގައި އޭނާ އެންމެ ފުރަތަމަ ކުރައްވާނެ މަސައްކަތަކީ ޔާމީން މިނިވަން ކުރުމެވެ.

އިސްތިއުފާ ދެއްވުމަށް ފަހު ޔާމީނާ ވެރިކަން ހަވާލު ކުރައްވާނެތޯ ސުވާލު ކުރުމުން މުއިއްޒު ސީދާ ޖަވާބެއް ނުދެއްވި އެވެ. ވިދާޅުވީ ހުރިހާ ކަމެއް ވެސް ކުރައްވާނީ ޔާމީންގެ މަޝްވަރާއާ އެކު ކަމަށެވެ.

ނޫސްވެރިންގެ ބައްދަލުވުމުގައި މުއިއްޒު ތަކުރާރުކޮށް ވިދާޅުވަމުން ގެންދެވީ އޭނާގެ ވެރިކަމެއްގައި ހުރިހާ ކަމެއް ކުރައްވާނީ ޔާމީންގެ ލަފަ އާއި މަޝްވަރާގެ މަތިން ކަމަށެވެ. އަދި ފަސް އަހަރުގެ ތެރޭގައި ކުރިއަށް ގެންދަވާނީ ޔާމީންގެ ތަރައްގީގެ ލެގަސީ ކަމަށް އޭނާ ވިދާޅުވި އެވެ. ހާރިޖީ ސިޔާސަތު ވެސް ބައްޓަން ކުރައްވާނީ "ޔާމީން ކުރެއްވި ގޮތަށް" ވަކި ގައުމަކަށް ތަފާތު ނުކޮށް ކަމަށް ވެސް ވިދާޅުވި އެވެ.